قالا اكىمىنىڭ ايتۋىنشا, №4 جانە 7 قالالىق ەمحانالار وزدەرىنىڭ نەگىزگى باعىتتارى بويىنشا تولىق جۇمىس ىستەي باستادى. ال قالعاندارى وزدەرىنىڭ نەگىزگى جۇمىستارىنا كەزەڭ-كەزەڭىمەن ورالادى.
تاعى ءبىر توقتالا كەتۋگە ءتيىستى جايت, كۇزگى-قىسقى ماۋسىمدا ىندەتتىڭ جاڭا تولقىنىنىڭ بولۋى مۇمكىن ەكەنىن ەسكەرە وتىرىپ, ستاتسيونارلاردىڭ كوۆيدتى گوسپيتالدەر رەجىمىمەن جۇمىس ىستەۋ جوسپارى ازىرلەنگەن.
«كۇنىنە شامامەن 200 گوسپيتال جۇمىس ىستەيتىن بولادى. ىندەت شارىقتاعان كەزدە ءبىز 500-گە جۋىق ناۋقاستى اۋرۋحانالارعا جاتقىزدىق. بۇل قالانىڭ مەديتسينا جۇيەسىنە تۇسەتىن وتە اۋىر جۇك. ىندەتتىڭ جاڭا تولقىنىنا قارسى ءىس-ارەكەت جوسپارىنا ساي ستاتسيونارلار 2-3 كۇن ىشىندە كوۆيدتى ناۋقاستاردى ەمدەۋگە دايىن بولۋلارى ءتيىس», دەپ اتاپ ءوتتى ب.ساعىنتاەۆ.
سونىمەن قاتار جەدەل جۇمىس ىستەۋ ءۇشىن مەديتسينالىق كومەكتىڭ العاشقى بۋىنى – العاشقى مەديتسينالىق-سانيتارلىق كومەك نەمەسە ەمحانا بايلانىسى كۇشەيتىلۋدە. ۋچاسكەلىك دارىگەرلەر سوزىلمالى اۋرۋلارى بار تاۋەكەل توبىنداعى قالالىقتاردى باقىلاۋعا الۋى ءتيىس. ال بۇل وسى توپتاعى جۇقتىرۋشىلاردى دەر كەزىندە انىقتاۋعا مۇمكىندىك بەرەدى.
ساۋالدامالارعا سايكەس, كۆي جۇقتىرعانداردىڭ ىشىندە ستاتسيونارلارعا سىرقاتتىڭ اسقىنۋ تۇرىمەن تۇسكەن 55%-ى ۇيدە ەمدەلسە, 31%-ى جەكە كلينيكالارعا, 14%-ى – وزدەرى تىركەلگەن ەمحانالارعا, ۋچاسكەلىك دارىگەرلەرگە بارعان.
«وسىعان وراي, ءبىز كۆي بەلگىلەرى پايدا بولعان كەزدە نە ىستەۋ كەرەك, كىمگە جانە قايدا جۇگىنۋگە بولاتىنى تۋرالى نۇسقاۋلىقتار ازىرلەدىك. امبۋلاتوريالىق ەم الاتىن ءارى ەمحانالار دارىگەرلەرىنىڭ باقىلاۋىندا بولاتىن ناۋقاستاردى قاجەتتى ءدارى-دارمەكتەرمەن قامتاماسىز ەتتىك. وسى ماقساتتا ءدارى-دارمەكتەردى تۇراقتاندىرۋ قورى قۇرىلدى, وعان 5 ملرد تەڭگە ءبولىندى», دەدى قالا اكىمى.
سونىمەن قاتار پتر تەستىلەۋدىڭ قۋاتى ارتادى. بۇگىندە 455 مىڭ پتر سىناقتارى وتكىزىلدى. تەستىلەۋدەن قالا تۇرعىندارىنىڭ شامامەن 15-17%-ى ءوتتى. بۇل ناقتى ەپيدەميالىق كورىنىستى بىلۋگە جانە ۋاقىتىندا قاجەتتى شارالاردى قابىلداۋعا مۇمكىندىك بەرەدى.
سونداي-اق الماتى قالاسىنىڭ اكىمى باقىتجان ساعىنتاەۆ №17 قالالىق ەمحانادا العاشقى مەديتسينالىق-سانيتارلىق كومەكتىڭ كۆي ىندەتىنىڭ جاڭا تولقىنى جاعدايىنا قالاي بەيىمدەلەتىنىن تەكسەردى. قالا اكىمى ءباسپاسوز قىزمەتىنىڭ حابارلاۋىنشا, №17 ەمحانادا تازا جانە قاۋىپتى اۋماقتار ارنايى بولىنگەن, فيلترلەر مەن باقىلاۋ بەكەتتەرى ورناتىلعان. ناۋقاستار اراسى بولىنگەن, ياعني ەمدەلۋگە جاتقىزىلاتىن نەمەسە تەكسەرۋدەن وتەتىن جرۆي بەلگىلەرى بار سىرقاتتار, بالالار, جۇكتى ايەلدەر ءوزارا ارالاسپايدى. بۇرىنعىداي دالىزدە بىرگە تۇرمايدى. ولارعا جەكە پروتسەدۋرالىق جانە زەرتحانالىق كابينەتتەر, كىرەتىن, شىعاتىن ورىندار ۇيىمداستىرىلعان. ماقسات – ۆيرۋستىڭ اۋرۋحانا ىشىندە تارالۋىنا جانە قىزمەتكەرلەردىڭ ۆيرۋستى جۇقتىرۋىنا جول بەرمەۋ.
№17 ەمحاناعا بوستاندىق اۋدانىنىڭ 82 مىڭ تۇرعىنى تىركەلگەن. ولاردىڭ 28 مىڭعا جۋىعى سوزىلمالى اۋرۋى بولعاندىقتان ديسپانسەرلىك ەسەپتە تۇرعاندار, اراسىندا قان قىسىمىنا, قانت ديابەتىنە, جۇرەكتىڭ يشەميالىق اۋرۋىنا شالدىققان ناۋقاستار بار.
قالا اكىمى ب.ساعىنتاەۆ «قاۋىپتى توپتاعىلارعا» جەتە نازار اۋدارۋدى تاپسىردى, ويتكەنى ولار كۆي جۇقتىراتىن بولسا, جاعدايلارى ناشارلاپ, سىرقاتى اسقىنۋى مۇمكىن. سونداي-اق قالانىڭ بارلىق ەمحانا باسشىلارىنا پيك-تەرمەن قوسا قاجەتتى اقپارات جازىلعان نۇسقاۋلىقتاردى تاراتۋ تاپسىرىلدى, وندا جرۆي بەلگىلەرى پايدا بولعان كەزدە كىمدەرگە جۇگىنۋ كەرەگى كورسەتىلگەن.
بۇگىندە قۇرامىندا ەمحانالاردىڭ 40 مامانى بار 16 ءموبيلدى توپ امبۋلاتوريالىق ەم الىپ جاتقان ناۋقاستاردىڭ جاعدايىن باقىلاۋدا. قازىر كۆي-دەن ساۋىعىپ شىققان 8, سىرقاتى جەڭىل 1 جانە 18 سيمپتومسىز ناۋقاس ەسەپتە تۇر. جالپى, قالادا العاشقى مەديتسينالىق-سانيتارلىق كومەكتىڭ 74 ۇيىمى جۇمىس ىستەيدى, ونىڭ 39-ى مەملەكەتتىك, وعان شامامەن 1,7 ملن ادام تىركەلگەن. ال 35 جەكە ۇيىمعا 340 مىڭعا جۋىق ادام تىركەلگەن. ىندەت شارىقتاعان كەزدە, 15 ماۋسىمنان 15 شىلدە ارالىعىندا 2450 ۆيرۋس جۇقتىرۋشى ۇيدە, دارىگەرلەردىڭ باقىلاۋىندا ەم الدى. قازىر 825 ناۋقاس تىركەلگەن. قۇرامىندا 925 دارىگەرى بار 300 ءموبيلدى توپ قۇرىلدى. ىندەتتىڭ جاڭا تولقىنىنا دايىندىق بارىسىندا بۇل رەسۋرستار ەكى ەسەگە ارتاتىن بولادى. مىندەت – كۆي بويىنشا ەپيدەميالىق احۋال ءورشيتىن بولسا, ناۋقاستار مەن ۆيرۋس جۇقتىرۋشىلاردىدىڭ باسىم بولىگىن زاماناۋي مەديتسينالىق كومەكپەن كەڭىنەن قامتۋ. الماتىنىڭ بارلىق دەنساۋلىق جۇيەسى وسىعان باعىتتالعان.
الماتى
