«استانا»
بيىلعى ەۋروكۋبوك باسەكەسىن قازاقستاندىق كلۋبتاردان ادەتتەگىدەي ەلوردانىڭ «استانا» كومانداسى باستاپ بەرەدى. ەلىمىزدىڭ التى دۇركىن چەمپيونى جارىستى جىل سايىن چەمپيوندار ليگاسىنىڭ ىرىكتەۋىنەن باستاپ, ەۋروپا ليگاسىنىڭ توپتىق كەزەڭىمەن اياقتايتىن. بيىل دا «استانا» دودانى چەمپيوندار ليگاسىنىڭ العاشقى ىرىكتەۋ كەزەڭىنەن باستاعالى تۇر. قارسىلاس – «دينامو-برەست». 60 جىلدىق تاريحى بار بەلارۋس كومانداسى بىلتىر ءوز ەلىنىڭ چەمپيونى اتانىپ, چەمپيوندار ليگاسىنا قاتىسۋعا مۇمكىندىك الدى. دەسە دە بيىلعى بىرىنشىلىكتە جاعدايلارى اسا ءماز ەمەس. برەست فۋتبولشىلارى وسى ماۋسىمدا وتكىزگەن 19 ويىندا 29 ۇپاي جيناپ, تۋرنير كەستەسىندە 9-ورىندا كەلەدى. سالىستىرمالى تۇردە كلۋبتىڭ جاعدايى «استاناعا» قاراعاندا ءتاۋىر. ال ەلدەگى ەپيدەميالىق جاعدايعا بايلانىستى فۋتبولدان قازاقستان چەمپيوناتى بەس ايدان بەرى توقتاپ تۇر. سايكەسىنشە, ەلوردا كومانداسى وسىنشا ۋاقىتتان بەرى ءالى بىردە-ءبىر رەسمي ماتچ وتكىزگەن جوق. ال قازىر بەلارۋس بىرىنشىلىگى ناعىز قىزعان شاعىندا, فۋتبولشىلار تولىق بابىندا دەۋگە بولادى.
«استانا» قۇرامى بىلتىرعى جىلمەن سالىستىرعاندا بيىل ءسال بولسىن كۇشەيگەن. جىل باسىندا دانيانىڭ «كوپەنگاگەن» كلۋبىنان كيپرلىك شابۋىلشى پيەروس سوتيريۋ, بىلتىر «قايسار» ساپىندا دوپ تەپكەن ارمەنيالىق جارتىلاي قورعاۋشى تيگران بارسەگيان, بەلارۋستىڭ «شاحتەرىنەن» ماكس ەبونگ سەكىلدى جاڭا ويىنشىلار كەلدى. ال «دينامو-برەست» قۇرامىندا قازاق فۋتبولىنا, جانكۇيەرلەرىنە ءجۇزى ءھام اتى تانىس بىرقاتار فۋتبولشى بار. مىسالى, كوماندانىڭ ۆيتسە-كاپيتانى سەرگەي كيسلياك 2018 جىلى پاۆلوداردىڭ «ەرتىس» كلۋبىندا 16 ويىن وتكىزگەن. سونىمەن قاتار قازاق توپىراعىندا تۋىپ, قاراعاندىنىڭ «شاحتەر», قوستانايدىڭ «توبىل» قۇرامىندا ويناعان ميحايل گوردەيچۋك تە «دينامودا» دوپ تەبەدى. كەزىندە ۋكراينا قۇراماسى مەن كيەۆتىڭ «ديناموسىن» ورگە سۇيرەگەن ارتەم ميلەۆسكي دە برەست كلۋبىنىڭ بەلسەندى فۋتبولشىسى.
ەكى كوماندا اراسىنداعى ماتچ 18 تامىزدا برەست قالاسىندا وتەتىن بولىپ بەكىتىلدى. جاڭا ەرەجەگە ساي كەزدەسۋ ءبىر ماتچتان تۇرادى. نەگىزگى ۋاقىتتا جەڭىمپاز انىقتالماسا, قوسىمشا ۋاقىت جانە پەنالتي سەرياسى بەلگىلەنەدى.
«قايرات»
جىل سايىن ەۋروكۋبوك باسەكەلەرىندە توپتىق كەزەڭگە شىعۋدى كوزدەيتىن «قايرات» ەۋروپا ليگاسىنىڭ الدىندا كەزىندە رەسەيدىڭ تسسكا كلۋبى مەن برازيليا ۇلتتىق قۇراماسىندا جاسىنداي جارقىلداعان شابۋىلشى ۆاگنەر لاۆپەن قۇرامىن كۇشەيتتى. ءدال وسى فۋتبولشى ەۋروپا ليگاسىندا قالاي توپ جارۋدىڭ سىرىن بىلەدى. ويتكەنى لاۆ 2004/05 جىلعى ماۋسىمدا تسسكا-مەن ۋەفا كۋبوگىندا جەڭىمپاز اتانعان ەدى.
ەۋروپا ليگاسىنىڭ العاشقى ىرىكتەۋ كەزەڭىندەگى «قايراتتىڭ» قارسىلاسىنا توقتالساق. الماتى كلۋبىنىڭ ءبىرىنشى كەزەڭدە ەرەۆاننىڭ «نوا» كومانداسىمەن كەزدەسەدى. 2017 جىلى قۇرىلعان كلۋب العاشىندا «ارتساح» دەپ اتالعان. 2019 جىلدىڭ جازىنان باستاپ كلۋبتىڭ اتى «نوا» بولىپ وزگەرىپ, سول جىلى ارمەنيا چەمپيوناتىندا ەكىنشى ورىنعا تابان تىرەدى. ءسويتىپ «نوا» تاريحتا ءبىرىنشى رەت ەۋروپا ليگاسىندا باق سىناۋعا مۇمكىندىك الدى.
«نوا» كلۋبىنىڭ ويىنشىلارى «قايرات» فۋتبولشىلارىنا قاراعاندا ويىن تاجىريبەسى دە, فيزيكالىق مۇمكىندىگى دە جەتكىلىكتى. 9 تامىزدا «نوا» ارمەنيا سۋپەركۋبوگىندا «ارارات-ارمەنيا» كومانداسىمەن كەزدەسىپ, 120 مينۋتقا سوزىلعان ويىندا 2:1 ەسەبىمەن جەڭىسكە جەتتى. سونىمەن قاتار اتالعان كوماندا شىلدە ايىندا ءتورت كەزدەسۋ وتكىزىپ, ۇشەۋىندە قارسىلاستارىنان باسىم تۇسكەن. «قايراتقا» قارسى وتەتىن ويىنعا دەيىن ارمەنيا كومانداسى چەمپيوناتتا ەكى ماتچ وتكىزەدى. «قايرات» تا ەكى كەزدەسۋ وتكىزىپ ۇلگەرەدى, بىراق فۋتبولشىلاردىڭ سپورتتىق بابىنا ەنۋ ءۇشىن كەم دەگەندە 5-6 ويىن كەرەك. دەسە دە ەكى كلۋب تاجىريبەگە سۇيەنىپ وينايتىنى جاسىرىن ەمەس. ال تاجىريبە جاعىنان باسىمدىق «قايرات» فۋتبولشىلارىندا ەكەنى انىق. ەكى كوماندا اراسىنداعى باسەكە 27 تامىزدا الماتىدا وتەدى.
«ورداباسى»
كەيىنگى جىلدارى ەۋروپا ليگاسىنىڭ تۇراقتى قاتىسۋشىسىنا اينالعان شىمكەنتتىڭ «ورداباسى» كلۋبى بيىلعى ىرىكتەۋدى رۋمىنيانىڭ «بوتوشاني» كلۋبىنا قارسى باستايدى. 2001 جىلى قۇرىلعان كوماندا ءوز تاريحىندا ەكىنشى مارتە ەۋروپا ليگاسىندا باق سىناۋعا مۇمكىندىك الدى. ەڭ العاش 2015/16 جىلى ەكىنشى ىرىكتەۋ كەزەڭىندە چەحيانىڭ «لەگيا» كلۋبىمەن كەزدەسىپ, ەكى ويىن قورىتىندىسى بويىنشا 4:0 ەسەبىمەن جەڭىلىپ قالعان.
كوماندانى رۋمىندىق مامان ماريۋس كرويتورۋ جاتتىقتىرادى. ول 2010/11 جىلدارى قازاقستان چەمپيوناتىندا دوپ تەۋىپ, «اتىراۋ» كومانداسىنىڭ قاتارىندا ونەر كورسەتكەن. كلۋب قۇرامىندا جەرگىلىكتى ويىنشىلارمەن قاتار 12 لەگيونەر دوپ تەبەدى. ولاردىڭ ىشىندە – ءۇش فۋتبولشى اۋستريادان, ەكى فۋتبولشى ارگەنتينا مەن سولتۇستىك ماكەدونيادان. سونىمەن قاتار گەرمانيا, فرانتسيا, حورۆاتيا, گرەتسيا, جانە البانيادان ويىنشىلار بار. كلۋبتىڭ ۇزدىك سۇرمەرگەنى حورۆاتيالىق ماركو دۋگاندجيچ, ول 13 ماتچتا 8 دوپ سوقتى.
ەستەرىڭىزدە بولسا, بىلتىر «ورداباسى» كلۋبى ەۋروپا ليگاسىنىڭ ەكىنشى ىرىكتەۋ كەزەڭىندە «ملادا بولەسلاۆ» كومانداسىنان 4:3 ەسەبىمەن جەڭىلىپ قالعان ەدى. شىمكەنت كومانداسىنىڭ قۇرامىنا قاراپ, بىلتىرعى ساتسىزدىكتەن ساباق الماعانىن بايقاۋعا بولادى. كلۋب قىسقى جانە جازعى ترانسفەردە تەك ءبىر عانا فۋتبولشىنى ساتىپ الدى (رۋبەن بريدجيدو, جارتىلاي قورعاۋشى). قىسقى ءۇزىلىس كەزىندە بىلتىر كومانداعا اجەپتاۋىر ەڭبەگى سىڭگەن قاقپاشى دميتري نەپوگودوۆ, قورعاۋشى سەرگەي مالىي جانە شابۋىلشى الەكسەي ششەتكين كلۋبتان كەتتى. ەكى ۇجىم اراسىنداعى تارتىستى كەزدەسۋدى 27 تامىزدا تاماشالايمىز.
