جىل باسىنان بەرى مۇناي ءوڭىرىنىڭ پوليتسەيلەرى 467 ماس جۇرگىزۋشىنى, ونىڭ ىشىندە 370-ءىن وبلىس ورتالىعىندا ۇستادى.
– 46 ادام ماس كۇيىندە كولىك جۇرگىزىپ قانا قويماي, جۇرگىزۋشى كۋالىگى دە بولعان جوق. بۇل قۇقىق بۇزۋشىلىقتىڭ قىلمىستىق جازالاناتىن ارەكەت بەلگىلەرى بولعاندىقتان, ولارعا قاتىستى قر قك-ءنىڭ 346-بابى بويىنشا سوتقا دەيىنگى تەرگەۋ باستالدى, – دەپ اتاپ ءوتتى پوليتسيا دەپارتامەنتىندە.
ولاردىڭ قاتارىندا مۇمكىندىگى شەكتەۋلى جاندار (تورتەۋى), ءۇش جۇكتى ايەل, سونداي-اق كامەلەتكە تولماعان ەكى ءجاسوسپىرىم بار.
مىسالى, 15 شىلدەگە قاراعان ءتۇنى اتىراۋ قالاسىنىڭ ورتالىعىندا ءتارتىپ ساقشىلارى 32 جاستاعى قالا تۇرعىنىن ۇستادى. ايەل جۇكتىلىكتىڭ بەسىنشى ايىندا بولدى, بىراق بۇل ونىڭ "Nissan Juke" كولىگىن باسقارۋعا جانە ءوز ىسىنە بارۋعا كەدەرگى بولمادى. كەيىننەن سوت اكىمشىلىك ءىستىڭ ماتەريالدارىن قاراپ, ونى كولىك جۇرگىزۋ قۇقىعىنان ايىردى.
ءبىر اپتادان كەيىن, تۇندە ساتباەۆ-پۋشكين كوشەلەرىنىڭ قيىلىسىندا 17 جاسار ءجاسوسپىرىم باسقارعان "Nissan Tiida" ماركالى اۆتوكولىك توقتاتىلدى. جۇرگىزۋشىنىڭ كۋالىگى بولعان جوق, ال ساراپتاما ناتيجەلەرى ونىڭ ماس كۇيىندە كولىك تىزگىنىن باسقارعانى بەلگىلى بولدى. بۇل جاعدايدا كامەلەتكە تولماعان بالانىڭ اتا-اناسى جاۋاپقا تارتىلدى, اكىمشىلىك سوت ولارعا 27 780 تەڭگە ايىپپۇل سالدى. سونىمەن قاتار, ءجاسوسپىرىمنىڭ اتا-اناسىن يۋۆەنالدى سوت كۇتىپ وتىر. وندا اقبتك-ءنىڭ 442-بابى "كامەلەتكە تولماعانداردىڭ تۇنگى ۋاقىتتا زاڭدى وكىلدەرىنىڭ ەرىپ ءجۇرۋىنسىز تۇرعىن ۇيدەن تىس جەردە بولۋى" بويىنشا ماتەريالدار جىبەرىلدى.
بارلىق ءتارتىپ بۇزۋشىلار اقبتك-ءنىڭ 608-بابى "كولىك قۇرالىن ماس كۇيىندە جۇرگىزۋشىنى باسقارۋ" بويىنشا اكىمشىلىك جاۋاپكەرشىلىككە تارتىلدى. پوليتسەيلەر وسى جىلدىڭ قاڭتار ايىنان باستاپ كولىكتى ماس كۇيىندە باسقارعانى ءۇشىن جازا كۇشەيتىلگەنىن ەسكە سالادى. مۇنداي قۇقىق بۇزۋشىلاردى 15 تاۋلىككە اكىمشىلىك قاماۋعا الۋ جانە جەتى جىل مەرزىمگە باسقارۋ قۇقىعىنان ايىرۋ كۇتىپ تۇر. ال قايتا قۇقىق بۇزۋشىلىق بولعان جاعدايدا قاماۋعا الۋ مەرزىمى 20 تاۋلىككە دەيىن, ال قۇقىقتان ايىرۋ – سەگىز جىلعا دەيىن ۇزارتىلدى.
