ايماقتار • 07 تامىز، 2020

ارزان تون الامىن دەپ الدانىپ قالدى

86 رەت كورسەتىلدى

قازىرگى كارانتين كەزىندە دۇكەندەر جابىق بولىپ، ادامداردىڭ تاۋارلاردى وزدەرى الا المايتىنىن بىلگەن ينتەرنەت-الاياقتار دا جاڭا ادىستەر تاپقان. ولار Instagram جەلىسىنە تاۋارلار ارزانداتىلىپ ساتىلۋدا نەمەسە جەڭىلدىكتەر بەرىلەدى دەگەن مازمۇنداعى حابارلاندىرۋلار بەرىپ، وتىرىك سۋرەتتەردى كورسەتىپ، اڭقاۋ ادامداردى الداپ تۇسىرۋدە. سونىڭ ءبىرى جۋىردا پەتروپاۆل قالاسىندا بولدى.

اڭقاۋ بويجەتكەن الدامىش حابارلاندىرۋعا سەنىپ، قۇندىز تون الا قويماق بولىپ، «الدىن الا تولەۋگە ءتيىستى» 85 مىڭ تەڭگە اقشاسىن اۋدارىپ جىبەرگەن. اقشا كەتكەن بويىندا بايلانىس تا ساپ ءۇزىلىپتى. بويجەتكەن ەكى كوزىنەن جاسىن ساۋلاتىپ، پوليتسياعا قايرىلعان. سويتسە، مۇنداي شاعىمدار پوليتسيادا وتە كوپ ەكەن. جىل باسىنان بەرى وبلىس پوليتسەيلەرى وندايدىڭ 42 ء–سىن اشىپتى.

سولتۇستىكقازاقستاندىق پوليتسيا ماماندارى ينتەرنەت-الاياقتاردىڭ بىرنەشە ءتۇرلى ءادىسى بارىن تۇرعىندارعا جەتكىزۋدە. سونىڭ ىشىندەگى ەڭ كوپ تاراعانى وسى – تاۋار باعاسىنا الدىن الا تولەم جاساتۋ ەكەن. سونداي-اق «بانكتەنبىز» دەپ قوڭىراۋ شالىپ، شاعىن نەسيە اپەرەمىز دەگەن الداۋ ارقىلى بانك شوتىنا قول جەتكىزۋ دە كوپ تاراعان ايلانىڭ ءبىرى. جەكە قۇجاتتاردى نەمەسە قۇجاتتاردىڭ كوشىرمەلەرىن قولعا تۇسىرگەن قاسكويلەر شاعىن نەسيە رەسىمدەيدى. كوپ جاعدايدا بۇل جابىرلەنۋشىلەردىڭ تانىستارى بولىپ جاتادى، الاياقتار ونىڭ كارتالارىنا اقشا تۇسەتىنىن العا تارتىپ، بەلگىلى ءبىر سەبەپتەرمەن كارتالارىن پايدالانا المايتىندىقتان جابىرلەنۋشىدەن ونىڭ كارتاسىنىڭ ءنومىرىن ايتىپ جىبەرۋدى وتىنەدى. جابىرلەنۋشىلەر كەلىپ تۇسكەن اقشانىڭ وزىنە رەسىمدەلگەن شاعىن نەسيە ەكەنىن بىلمەي، تۇسكەن اقشانى الاياقتارعا بەرىپ جىبەرەدى، ال تولەۋ مىندەتى وزىندە قالادى.

الاياقتىقتىڭ تاعى ءبىر ءادىسى الدايتىن ادامىنا «بانكتەنبىز» دەپ قوڭىراۋ شالىپ، بىرەۋدىڭ ونىڭ شوتىنا «بۇزىپ كىرگەندىگىن» حابارلاۋ. كەيىن قىلمىسكەرلەر سمس ارقىلى كەلەتىن كودتى ايتۋىن سۇرايدى. شىن مانىندە بۇل ءبىر رەتتىك پارول، ول الاياقتارعا شوتقا قول جەتكىزۋگە مۇمكىندىك بەرەدى. مۇندايدا ابىرجىماۋ كەرەك. ارقاشاندا بانك قىزمەتكەرلەرى جەكە جانە قارجى تۋرالى اقپاراتتى تالاپ ەتپەيتىنىن ەستە ساقتاعان ءجون. سوندىقتان بانك بولىمشەسىنە نە call-ورتالىعىنا جۇگىنگەن دۇرىس. ەگەر ءسىز ينتەرنەت-الاياقتاردىڭ ارباۋىنا ءتۇسىپ قالساڭىز، تەز ارادا پوليتسياعا جۇگىنىڭىز، دەيدى پوليتسيا قىزمەتكەرلەرى. وسىنىڭ ءبارى ولار تۇرعىندارعا تاراتقان جادىنامادا دا جازىلعان.

پەتروپاۆل

سوڭعى جاڭالىقتار

الىستان جەتكەن العىس

ايماقتار • بۇگىن، 14:10

ۇقساس جاڭالىقتار