بۇرىن بولماعان ۆيرۋستى جۇقتىرۋ دا, ودان ساۋىعۋ دا ءتۇرلى-ءتۇرلى ويعا جەتەلەيدى. ەڭ قىمبات دەگەن ءدارى-دارمەكتەردىڭ ءوزى دە داۋا بولماي, كەلمەستىڭ كەمەسىنە ءمىنىپ كەتىپ جاتقانداردى كوز كورىپ وتىر. كەرىسىنشە, قاراپايىم پرەپاراتتاردان, انادان-مىنادان ءتاۋىر بولعاندار دا جەتكىلىكتى. قىسقاسى, وزىق مەديتسينالىق تەحنولوگيالارمەن مۇزداي قارۋلانعان ەلدەردىڭ ءوزى ىندەت ورشىگەن كەزدە ۆيرۋستىڭ قۇلقىنىن تاني الماي, دارمەنسىز بولعانىنا كۋا بولعانىمىز راس.
ال كارانتيندىك رەجىمنىڭ ونە بويىندا ەڭ قات بولعان قۇرال قاراپايىم عانا ماسكا بولدى. العاشقىدا قولدا بار ماسكالارىن قىمباتقا ساتىپ, جوقتارى قولدان تىگىپ, پايدا تاپقاندار بولدى. ءالى دە قۇنى شارىقتاپ تۇرعان كوپكيىستى, ءتىپتى ديزاينەرلىك ماسكالار بار. اقپان ايىندا فرانتسيادا پاندەميا ءورشي باستاعاندا LVMN حولدينگىنە قاراستى, قىمبات برەندتەر شىعارىپ كەلگەن الەمگە ايگىلى Dior, Guerlain, Givenchy سىندى ەليتالىق كومپانيالار ءاتىر ورنىنا انتيباكتەريالدى گەل مەن ماسكا شىعارا باستاعان-دى. LVMN تەك اقپان ايىندا 14 ملرد ەۋرو شىعىنعا باتقانىنا قاراماستان, وسىنداي شەشىم قابىلدادى. بۇرىن-سوڭدى حولدينگ تاريحىندا بولماعان وراسان شىعىن ونىڭ پرەزيدەنتى بەرنارد ارنوعا حالقىنىڭ قامى ءۇشىن وسى قادامعا بارۋعا كەدەرگى كەلتىرگەن جوق.
«ەندى ليۋكس برەندتى كومپانيالار ءوزىنىڭ قىتايلىق قۇرىلىمدارى ارقىلى بەتپەردە تىگۋگە كوشتى. وسى سەيسەنبى كۇنى ەكى ۇشاق ون ميلليونداي بەتپەردەنى ەۋروپاعا جەتكىزدى. ەندىگى جەردە فرانتسياعا اپتا سايىن 10 ميلليونداي بەتپەردە جەتكىزىلىپ وتىرماق. وسىنداي تۇككە تۇرعىسىز بۇيىمدار اسا قات بولعان كەزدە, اقشا ەشقانداي ءرول اتقارماي قالاتىنىنا كوزىمىز جەتتى», دەپ جازدى فرانتسياداعى قازاقتار قاۋىمداستىعىنىڭ پرەزيدەنتى بەرلين يريشەۆ ءوزىنىڭ الەۋمەتتىك پاراقشاسىندا. بۇل – ەۋروپانىڭ ەڭ دامىعان ەلىندەگى ماسكاعا قاتىستى ءبىر عانا مىسال.
ايتا بەرسەڭ, بەتپەردەنىڭ جىرى كوپ. ويتكەنى ءبىزدىڭ تۇبەگەيلى وزگەرگەن تىرشىلىگىمىزدە ءوزىمىزدى ساقتاۋدىڭ ەڭ ءتيىمدى جولى سانيتارلىق-گيگيەنالىق نورمالاردى ساقتاۋ مەن ماسكا تاعۋ بولىپ تۇر.
ءتىپتى مامىر ايىنىڭ سوڭىندا الماتىدا ماسكاسىز جۇرگەنى ءۇشىن سالىناتىن ايىپپۇلدىڭ ەڭ ۇلكەنى – 1 ملن 389 مىڭ تەڭگە بولدى. بۇل ءىرى كاسىپ يەلەرىنە, زاڭدى تۇلعالارعا قاتىستى بولاتىن. الماتى قالاسىنىڭ مەملەكەتتىك باس سانيتار دارىگەرى كارانتين ەرەجەسىن ساقتاۋدى تالاپ ەتۋ ءۇشىن وسىنداي قاتاڭ شارالار قابىلداۋعا ءماجبۇر بولعانىن بىلەمىز.
نەگە مۇنىڭ بارلىعىن جىپكە تىزگەندەي تاتپىشتەپ وتىرمىز؟ وسى جولداردى جازۋعا كوزبەن كورىپ, قۇلاقپەن ەستىگەن, ءتىپتى جانىمىزعا باتقان ەكى جاعداي تۇرتكى بولدى. قازىر ەلىمىزدە ىندەت جۇقتىرعانداردىڭ رەسمي سانى 95 مىڭعا جاقىندادى. ءبىر اۋلەت, ءبىر وتباسىنان ءبىر ەمەس, بىرنەشە جاقىنىن جەر قوينىنا قاتار تاپسىرىپ, قايعىدان قان جۇتىپ وتىرعاندار بار. ۇلتىمىز اياۋلى تۇلعالارىنان ايىرىلدى. بىراق سوعان قاراماستان كوپشىلىك ورىندار مەن كوشەدە ماسكا تاعۋعا قارسى داۋىس, قول جيناپ جۇرگەندەر كىمنىڭ ءومىرىن ءسۇرىپ وتىر؟
تاياۋدا ءدارىحانا كەزەگىندە تۇرعان ەدىك. ءدارى ساتىپ الۋشىلار اراقاشىقتىق ساقتاۋعا جانە دارىحاناعا ماسكامەن بىرتىندەپ كىرۋگە ءتيىس بولعاندىقتان, كۇتۋگە تۋرا كەلدى. ال ءدارىحانا ەسىگىنە ماسكاسىز كىرۋگە بولمايتىنى تايعا تاڭبا باسقانداي جازىلىپ تۇر. وسى كەزەككە وتىزدىڭ ار جاق, بەر جاعىنداعى ماسكاسىز جىگىت القىنا جەتىپ, ەسىكتەگى جازۋدى كورىپ: ء«وي اكەڭ, بۇل جەرگە دە ماسكا كەرەك ەكەن عوي» دەپ داعدارعانداي تۇرىپ قالدى. سوسىن الدىندا تۇرعان جيىرمالارداعى جىگىتكە قاراپ: «ىنىشەك, ماسكاڭدى بەرە تۇرشى-ەي, تەز كىرىپ ءبىر ءدارى ساتىپ الىپ شىعايىن» دەدى باسى ىستەپ كەتكەنىنە قۋانىپ. جۇرت – تاڭعالىپ, دەمىن ىشىنە تارتىپ قاراپ تۇر.
– شىنىمەن بەرە تۇرايىن با؟ – دەدى «قايىرىمدى» جىگىت قارسىلاسپاي.
– ءيا, بەرە تۇرشى, بالە بولدى عوي وسى ماسكا دەگەن!
بەردى. ول بىرەۋدىڭ جۋىلا-جۋىلا تۇتەسى شىعىپ كەتكەن ماسكاسىن كيىپ, دارىحاناعا كىرىپ كەتتى. كەرەگىن تاپپادى ما, الدە ىزدەگەنى تەز تابىلدى ما, كوپ بوگەلگەن جوق, ءدارىحانادان جىلدام شىقتى. بەتپەردەسىن بەرگەن جىگىت كۇتىپ تۇر. ول قايتارىپ بەردى. بۇل قايتا كيىپ الدى.
مۇنىڭ اتىن نە دەيدى؟ ءبىز كىمبىز؟ قايدا بارا جاتىرمىز؟
