ارنا باسشىلىعى اتاپ كەتكەندەي, حاباردىڭ ماقساتى – كىشكەنتاي كورەرمەندەرگە دەنساۋلىققا قاتىستى ماڭىزدى اقپاراتتى ويىن تۇرىندە بەرە وتىرىپ, سالاۋاتتى ءومىر سالتىن ناسيحاتتاۋ. پاندەميا كەزىندە تۇتاس الەم كوروناۆيرۋسپەن كۇرەسىپ, دەنساۋلىقتى كۇتۋ ءبىرىنشى ورىنعا شىقتى. جوبا كىشكەنتاي كورەرمەندەرگە «دەنساۋلىق – زور بايلىق» ەكەنىن ۇعىندىرۋدى ماقسات ەتەدى. كوگىلدىر ەكرانعا جاڭا شىققان تىڭ ايدار كارانتين رەجىمىندە قاۋىپسىزدىك شارالارىن ساقتاۋدىڭ ماڭىزى تۋرالى ءتۇسىندىرىپ, سپورتپەن دوس بولۋعا شاقىرادى.
بۇعان دەيىن «ماۋسىم ايىنان باستاپ «Qazaqstan» تەلەارناسىنان بەس كۇن بويى تىكەلەي ەفيردە «تەلەدارىگەر» جوباسى شىعا باستاعانى دا ايتا كەتكەن ءجون. جالپى, بۇل پاندەميا كورسەتىپ بەرگەندەي ءدال قازىرگى كەزەڭدە ەل تۇرعىندارىنا, اسىرەسە شالعاي اۋىل-ايماقتاعى كورەرمەنگە قازىرگى كۇردەلى احۋالعا بايلانىستى كۇندەلىكتى مەديتسينالىق كەڭەس بەرۋ وتە وزەكتى بولىپ وتىر. جوعارىداعى جاڭا جوبالار ارقىلى دارىگەرلەر تىكەلەي ەفير بارىسىندا COVID-19 ۆيرۋسى مەن وزگە دە اۋرۋلاردان ساقتانۋ مەن الدىن الۋ شارالارى, ەمدەۋ تاسىلدەرى تۋرالى نۇسقاۋلىق بەرەدى.
الايدا بۇل تۇرعىدا بالالاردىڭ دا كوكەيىندە ءتۇرلى سۇراقتاردىڭ تۋىندايتىنى ءسوزسىز. ۇلكەندەر ءوز الدىنا, بالالاردى ىندەتتەن قورعاۋ – باستى ماسەلە. ول اتا-انالاردىڭ جاۋاپكەرشىلىگىمەن قاتار, كىشكەنتايلاردىڭ وزىنە اۋرۋدىڭ قاۋپىن تۇسىندىرە وتىرىپ جۇزەگە اسىرىلاتىنى ءسوزسىز. «Balapan» ارناسى وسى ىسكە اتسالىسۋدى كوزدەيدى. «بۇل جوبا «قازاقستان» تەلەراديوكورپوراتسياسىنىڭ وسى باعىتتاعى اقپاراتتاندىرۋ شارالارىنىڭ جالعاسى», دەپ حابارلايدى تەلەراديوكورپوراتسيانىڭ ءباسپاسوز قىزمەتى.
«ساۋ بولايىق!» تەلەجوباسى ەفيرگە اپتاسىنا ءۇش رەت دۇيسەنبى, سارسەنبى, جۇما كۇندەرى ساعات 12:00-دە جانە 19:25-تە شىعادى. باعدارلامانىڭ «كەرەك دەرەك» ايدارىندا مەديتسينا سالاسىنا قاتىستى تەرميندەر جەڭىل تىلمەن تۇسىندىرىلسە, «شىمىر بول!» ايدارىندا ءتۇرلى جاتتىعۋلار كورسەتىلەدى. «جاتتا, ەستە ساقتا!» ءبولىمى باعدارلاما قورىتىندىسى رەتىندە سۇراق-جاۋاپ تۇرىندە وتەدى.
جاڭا جوبانىڭ ەرەكشەلىگى, باعدارلاماعا ەكران الدىندا وتىرعان كورەرمەندەر دە اتسالىسا الادى. ول ءۇشىن جاتتىعۋ جاساپ, ارنانىڭ رەسمي پاراقشاسىن بەلگىلەپ, الەۋمەتتىك جەلىگە جۇكتەۋ قاجەت. ەڭ ۇزدىك بەينە جاتتىعۋ «شىمىر بول!» ايدارىندا كورسەتىلەدى.
جوبا «Balapan» ارناسىنىڭ ەفيرىنەن جىل سوڭىنا دەيىن جالعاسپاق.
