شىن مانىندە اۋرۋحاناداعى دارىگەرلەردىڭ, اسىرەسە, ينفەكتسيونيست-دارىگەرلەردىڭ قىزمەتى وتە اۋىر ەكەنىنە كوز جەتكىزدىك. جەدەل جاردەمدەگى, اۋرۋحاناداعى دارىگەرلەر, مەدبيكەلەر مەن تازالىقشىلار ىندەتتەن قورعانۋ ءۇشىن قورعانىش كيىمىن كيىپ, تۇمشالانىپ جۇرەدى. مۇنداي كيىممەن بىرنەشە ساعات بويىنا جۇمىس ىستەۋ وڭاي ما؟ سوعان قاراماستان, ناۋقاس جانداردىڭ جانىنان تابىلىپ, ەكپەلەرىن ەگىپ, دارىلەرىن دەر كەزىندە بەرىپ, اۋزىمىزعا سۋسىن تامىزىپ, قامقور بولعان جاندارعا مىڭ تاعزىم! ويتكەنى ولار دەرتى جانىنا باتقان ناۋقاستارعا قاناتىمەن سۋ سەپكەن قارلىعاشتاي تىنىم تاپپايدى. بار مەيىرىمى مەن جان جىلۋىن توگىپ ءجۇر. جۇقپالى ىندەتتىڭ قاتەرلى ەكەنىن بىلە تۇرا, قاۋىپتىڭ ورتاسىندا جۇرگەن اق جەلەڭدى دارىگەرلەرگە قانداي قۇرمەت كورسەتىلسە دە ارتىق ەتپەيدى.
كۇنى-ءتۇنى اسا قاۋىپتى ۆيرۋستىڭ وشاعىندا, ناۋقاستاردىڭ جانىندا بولۋ ءۇشىن جۇرەك كەرەك. كەيدە مەديتسينا قىزمەتكەرلەرىنىڭ سونشاما ۇمتىلعانىنا قاراماستان, قايتىس بولعان ادامداردى كورگەندە جۇرەگىڭ قارس ايىرىلادى. مەن اۋرۋحانادا دارىگەرلەردىڭ ادام ومىرىنە اراشا ءتۇسىپ, جانتالاسقان ساتتەرىنىڭ كۋاسى بولدىم. سوندىقتان دارىگەرلەرگە باسىمدى يەمىن! بار جاقسىلىققا يە بولسىن! اللا قولداسىن!
دەرتىمىز اسقىنىپ, ءومىر مەن ءولىمنىڭ ورتاسىندا جاتقان كەزدە كىم جىلى ءسوزىن ايتىپ, جانىڭا كەلسە, سول ادام ۇمىتىلمايدى ەكەن. سونىڭ ءبىرى – اتىراۋ وبلىسىنىڭ اكىمى ماحامبەت دوسمۇحامبەتوۆ. بىرنەشە رەت اۋرۋحاناعا كەلىپ, اۋىرىپ جاتقان ادامدارمەن سويلەسىپ, ناۋقاستاردىڭ جاعدايىمەن تانىسقان اكىمنىڭ ادامگەرشىلىگىنە ءتانتى بولعانىمىز راس. ءدارى-دارمەكتىڭ دەر كەزىندە جەتكىزىلۋىن, اۋرۋحانانىڭ سىرقاتتارعا كەرەكتى اپپاراتتارمەن قامتاماسىز ەتىلۋىن ۇنەمى قاداعالاپ وتىردى. قاۋىپتى ىندەت دەندەگەن كەزدە بۇقارا حالىقپەن جاقىن بولىپ, باسىنا قيىندىق تۇسكەن جاندارمەن قايعىنى بولىسە ءبىلۋ – پاراساتتىلىق.
قازىر جاعدايىمىز جاقسارىپ, دەنساۋلىعىمىز قالىپقا ءتۇستى. وتباسىمىزعا امان ورالدىق. ءالى دە ۇيدەن دارىگەرلەردىڭ بەلگىلەگەن ەمىن الۋدامىز. ۋچاسكەلىك دارىگەرلەر كەلىپ, قىزۋىمىزدى ولشەپ, كۇندەلىكتى نۇسقاۋلارىن بەرەدى. ءبىز سەكىلدى مىڭداعان ادامدى قاۋىپتى ىندەتتەن قۇتقارىپ قالعان №2 اۋرۋحانانىڭ باس دارىگەرىنە, ورىنباسارلارى مەن دارىگەرلەرگە, ورتا بۋىن مەديتسينا قىزمەتكەرلەرىنە, تازالىقشىلارعا, بارىنە رازىمىز. بۇل اۋرۋحانادا جۇمىس جاقسى جولعا قويىلعانىنا كۋا بولدىق.
اينالايىن, اعايىن, كارانتيندىك شەكتەۋلەردى, جەكە باس گيگيەناسىن ساقتاعانىمىز ءجون. دەننىڭ ساۋلىعى, ەلدىڭ اماندىعى ءۇشىن دارىگەرلەر ايتقان تالاپقا باعىنايىق. توي, ساداقانى ازىرشە قويا تۇرايىق. ءوزىمىزدىڭ دە, وزگەنىڭ ومىرىنە قاۋىپ توندىرمەيىك. سوندا عانا حالقىمىز امان بولادى, ەلىمىز وركەندەيدى. امان بولايىق, اعايىن!
ءىليا جاقانوۆ,
قازاقستان مەن قىرعىزستاننىڭ ەڭبەك سىڭىرگەن قايراتكەرى,
كومپوزيتور, ونەر زەرتتەۋشىسى,
«وتان» وردەنىنىڭ يەگەرى
اتىراۋ وبلىسى
