شاڭعى كورولى 75 جاستا

سپورت • 06 تامىز، 2020

شاڭعى كورولى 75 جاستا

12 رەت كورسەتىلدى

قازاق سپورتىنىڭ وتكەنىن قازبالاساڭ قازىناعا تولى. ءاربىر سپورتشىنىڭ جەتىستىككە دەيىنگى ءجۇرىپ وتكەن جولى، جاسىماعان جىگەرى مەن ءوز سپورتىنا دەگەن ادالدىعى ادام جانىن تەبىرەنتەدى. ءار جەڭىستىڭ ارتىندا ءتاتتى ەستەلىك، جەڭىلىستىڭ ارتىندا اششى وكىنىش تۇراتىنى انىق. جەڭىسى مەن جەڭىلىسى قاتار جۇرەتىن سپورتتا قايمىقپاعان اڭىز سپورتشىلاردىڭ ەرلىگىن بۇگىنگى ۇرپاق ءبىلۋى ءتيىس.

Egemen Qazaqstan

يۆان گارانين بۇگىندە 75 جاسقا تولىپ وتىر. زامانىنىڭ زاڭعارى بولعان يۆان گارانيندى زامانداستارى «شاڭعى كورولى» دەپ اتاعان. ۇزدىكتەر كوشىن باستاپ الەم چەمپيوناتىن باعىندىرعان. كسرو قۇرامىندا وليمپيا ويىندارىنىڭ جۇلدەگەرى اتانىپ، جانكۇيەرگە ەستەن كەتپەس قۋانىش سىيلاعان. ولاي دەيتىن سەبەبىمىز، 1976 جىلعى وليمپيا ويىندارىندا كسرو شاڭعى قۇراماسى شاڭعى جارىسىندا ءدال يۆان گارانينىڭ ارقاسىندا ەستافەتا بويىنشا قولا جۇلدەنى قورجىنعا سالادى. كسرو كومانداسىنىڭ قۇرامىنا كىل مىقتىلار جينالعان ەدى. دەسە دە، قورىتىندى كەزەڭدە گارانين جارىس جولىنا شىعاتىن بولعاندىقتان وعان ارتىلعان جاۋاپكەرشىلىك جۇگى اۋىر ەدى. شەشۋشى كەزەڭ الدىندا كسرو سپورتشىلارى 6-ورىنعا تۇراقتادى. جاۋاپتى ساتتە مۇمكىندىكتى ءمۇلت جىبەرۋگە بولمايتىنىن تۇسىنگەن گارانين جارىس جولىنا شىعاردا شىمىرلىق تانىتىپ، شاڭعىسىن سايلاپ ۇلگەرەدى.

ينسبرۋكتەگى وليمپيا ويىندارىندا يۆان گارانين 30 شاقىرىمدىق باسەكەدە قولا جۇلدەگەر اتاندى. الايدا گارانين 50 شاقىرىمدى باعىندىرا الماي قالعانىنا ءالى كۇنگە دەيىن وكىنەتىنىن ايتادى. سەبەبى، ءدال وسى شاقىرىمدا سىنعا تۇسكەندى جانى سۇيەتىن، 50 شاقىرىمدىق جارىستا ابدەن شىنىققان شاڭعى شەبەرى اتانىپ ۇلگەرگەن سپورتشى ەدى. يۆان يۆانوۆيچ 75 جاسقا كەلسە دە ءالى شىمىر. ول اپتاسىنا بەس رەت جاتتىعۋ جاساپ، 20 شاقىرىم قاشىقتىقتى باعىندىرادى. مىقتى سپورتشى تەك ءوزىن ەمەس، اينالاسىنداعىلاردى دا جىگەرلەندىرىپ، رۋح بەرىپ جۇرەدى. كوپكە ۇلگى بولىپ، حالىقتىڭ كۋميرى اتاندى. ونىڭ جەڭىستى جولىن جالعاستىرعىسى كەلگەندەر سانىندا شەك بولمادى. ماسەلەن، تاۋەلسىز قازاقستاننىڭ تۇڭعىش وليمپيادا چەمپيونى ۆلاديمير سميرنوۆتى اعا بۋىننىڭ ءداستۇرىن ءساتتى ءىلىپ اكەتتى دەۋگە بولادى. سەبەبى، شاڭعىشى سميرنوۆ يۆان گارانيننىڭ باستاماسىن جالعاستىرىپ، وليمپ شىڭىن باعىندىردى.