تۇركىستاندا كارانتين تالاپتارىن بۇزعاندارعا 42 ملن ايىپپۇل سالىندى

وڭتۇستىك قازاقستان • 04 تامىز، 2020

تۇركىستاندا كارانتين تالاپتارىن بۇزعاندارعا 42 ملن تەڭگە ايىپپۇل سالىندى

63 رەت كورسەتىلدى

تۇركىستاندا كارانتين تالاپتارىن بۇزعاندارعا 42 ملن تەڭگە ايىپپۇل سالىندى، دەپ حابارلايدى Egemen.kz

تۇركىستان وبلىسىندا كارانتين تالاپتارىن ساقتاماعاندارعا اكىمشىلىك قۇقىق بۇزۋشىلىق تۋرالى 769 حاتتاما تولتىرىلىپ، 42 ميلليون 322 مىڭ 830 تەڭگە كولەمىندە ايىپپۇل سالىندى.

ونىڭ 26 ميلليون 784 مىڭ 75 تەڭگەسى ءوندىرىلدى. بۇل تۋرالى وبلىستىق تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ باسشىسى نۇربەك نىشانوۆ حابارلادى.

نۇربەك سادىقبەك ۇلىنىڭ ايتۋىنشا، وڭىردە كوروناۆيرۋستى ينفەكتسيانىڭ الدىن الۋ ماقساتىندا 5 شىلدە مەن 3 تامىز ارالىعىندا ءموبيلدى توپتارمەن اتالعان دەپارتامەنتتىڭ اۋداندىق جانە قالالىق باسقارما ماماندارى بىرلەسىپ كارانتين رەجيمى كەزىندە قىزمەت كورسەتەتىن وبەكتىلەرگە مونيتورينگىلەۋ جۇمىستارىن جۇرگىزىلگەن. 7061 نىساندى ارالاۋ ناتيجەسىندە 1386-سىنىڭ كارانتين تالاپتارىن بۇزعانى انىقتالدى. تارقاتىپ ايتقاندا، قازاقستان رەسپۋبليكاسى اكىمشىلىك قۇقىقبۇزۋشىلىق كودەكسىنىڭ 425-بابىنىڭ 1-تارماعىمەن 732 جەكە تۇلعاعا 30 ايلىق ەسەپتىك كورسەتكىش كولەمىندە (اەك) ايىپپۇل سالىنعان. سونىمەن قاتار 33 جەكە كاسىپكەرگە، 3 زاڭدى تۇلعاعا جانە 1 لاۋازىمدى تۇلعاعا اكىمشىلىك حاتتامالار تولتىرىلىپ، جالپى 230 اەك كولەمىندە ايىپپۇل تولەۋ مىندەتتەلگەن. دەگەنمەن، كارانتين ءتارتىبىن ساقتاماعاندارعا جەڭىلدىك تە قاراستىرىلعان. 7 كۇن ىشىندە ايىپپ ۇلىن وتەيتىن بولسا، 50 پايىزىن تولەيدى.

رەيد بارىسىندا سونداي-اق تىيىم سالىنعان وتباسىلىق، مەرەكەلىك ءىس-شارالار انىقتالىپ، توقتاتىلدى.

اتاپ ايتقاندا، 50 ادامعا دەيىن قوناق شاقىرىپ، ارىس قالاسىندا – 8، كەلەس اۋدانىندا – 2، سارىاعاش اۋدانىندا – 2، سايرام اۋدانىندا 2 بەتاشار تويلارى ۇيىمداستىرىلعانى بەلگىلى بولدى.

سول سياقتى قازىعۇرت، سايرام، تولەبي اۋداندارىنداعى اۋىلداردا 50-دەن اسا ازاماتتاردى جيناپ قىز ۇزاتۋدىڭ 3 فاكتىسى انىقتالعان. ءتىپتى، سانسىز بابتار مەكەنىندە ۇجىمدىق وتباسىلىق مەرەكەنى اتاپ وتۋگە دە توقتاۋ سالىندى. سونىمەن قاتار، جۇمىس ىستەپ تۇرعاندىعى زەردەلەۋ بارىسىندا دالەلدەنگەن تولەبي اۋدانىنداعى 4 دەمالىس ورنىنىڭ جۇمىستارى توقتالدى.

ولاردىڭ قوجايىندارىنا اكىمشىلىك حاتتاما تولتىرىلىپ، 230 اەك كولەمىندە ايىپپۇل سالىندى.

كارانتين ءتارتىبىن بۇزعاندارداردىڭ باسىم بولىگى ماسكا تاقپاعان، قىزمەت كورسەتۋشىلەر ءبىر رەت پايدالانىلاتىن قولعاپتار كيمەگەن، نىسانداردا انتيسەپتيگى بار سانيتايزەرلەر ورناتپاعان جانە كۇندەلىكتى دەزينفەكتسيالىق زالالسىزداندىرۋ جۇمىستارىن جۇرگىزبەگەن.

سونداي-اق، تۇركىستان وبلىسىنىڭ باس مەملەكەتتىك سانيتاريالىق دارىگەرىنىڭ قاۋلىسىنا سايكەس جابىلعان ورىنداردىڭ جۇمىستارىن جالعاستىرعاندارى، قىزمەت كورسەتۋ مەرزىمى شەكتەلگەن نىسانداردىڭ اراسىندا ۋاقىتقا قاراماستان ىستەپ تۇرعاندارى دا كەزدەسكەن.

ءوز كەزەگىندە تۇركىستان وبلىستىق تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى تۇرعىنداردى كارانتين تالاپتارىن ساقتاپ، جاقىندارىنا جاناشىرلىق تانىتىپ، وزدەرىن ينفەكتسيادان قورعاۋعا شاقىرادى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز