ايماقتار • 04 تامىز، 2020

30 جىل بۇرىن ەرلىكپەن قازا تاپقان ينسپەكتور ەسكە الىندى

33 رەت كورسەتىلدى

بۇل وقيعا وسىدان تۋرا وتىز جىل بۇرىن پەتروپاۆل قالاسىنىڭ "جۇمىسشى" كەنتىندە بولعان ەدى. ءۇي-ءىشىنىڭ بەرەكەسىن الىپ، قويدىرماق بولعان كورشىلەرىن دە ۇرىپ، بالاعاتتاپ جاتقان سوتتالىپ كەلگەن ماسكۇنەمنىڭ قىلىعىن كورگەندەر ونى ۋچاسكەلىك ينسپەكتور الەكسەي ششەرباكوۆقا جەتكىزەدى، دەپ حابارلايدى Egemen.kz

ءبىر ماسكۇنەمدى ساباسىنا ءتۇسىرۋ ءۇشىن جەدەل توپ شاقىرماي، ميليتسيا مايورىنىڭ ءوزى بۇزاقىنى اۋىزدىقتاۋعا جالعىز بارادى. بىراق ادامدىق كەيىپتەن شىعىپ، حايۋاندىق كۇيگە تۇسكەن ماسكۇنەم ەشكىمنىڭ قويدىرعانىنا قاراماي، قولىنداعى لىپىپ تۇرعان ۇستارانى جان-جاعىنا سەرمەپ، ايەلى مەن كورشىلەرىن ءبىر بۇرىشقا تىعىپ قويعان ەكەن. ول كەزدەگى ميليتسيادا قارۋ دا بولمايتىن، سوندىقتان ا.ششەرباكوۆ بۇزاقىعا قارسى جالاڭ قولىمەن ايقاسقا شىعىپ، ونى ساباسىنا تۇسىرەدى. الايدا اناۋ دا قولىنداعى ۇستارامەن مايورعا جەتى جاراقات سالىپ ۇلگەرگەن ەكەن. مايور ەت قىزۋىمەن وزىنە  اۋىر دەنە جاراقاتى سالىنعانىن دا سەزبەي قالادى. دارىگەرلەر ا.ششەرباكوۆتى امان الىپ قالۋ ءۇشىن قولدان كەلگەندەرىن جاساپ باعادى، بىراق جاندى جەردەن تيگەن پىشاق جاراقاتىنان ونىڭ ءومىرىن قۇتقارا المايدى.

سودان بەرى كەشە تۋرا 30 جىل ءوتىپتى. مايوردىڭ قىزمەتتىك مىندەتىن اتقارۋ ۇستىندە قانعا بويالعان كويلەگى مەن سول كۇنى جانىندا بولعان جەكە زاتتارى قازىر مۋزەي ەكسپوناتتارىنىڭ قاتارىنان ورىن العان.  ال ەسىمى  ەرلىكپەن قازا تاپقان پوليتسيا قىزمەتكەرلەرىنە ارنالعان مەموريالدىق تاقتاعا قاشالعان. سونىمەن بىرگە تۋىپ-وسكەن اققايىڭ اۋدانىنىڭ سميرنوۆو كەنتىندەگى كوشەلەردىڭ ءبىرى جەرلەستەرىنىڭ ەسىمىمەن اتالىپ، وقىعان مەكتەبىنىڭ قابىرعاسىنا دا مەموريالدىق تاقتا ورناتىلعان.

قازىر پوليتسيا قىزمەتكەرلەرىنە قارسى قول كوتەرۋ قىلمىسكەرلەر اراسىندا ۇيرەنشىكتى ادەتكە اينالعان. وسىنىڭ ءوزى زاڭنىڭ سولقىلداقتىعىنىڭ ءبىر كورىنىسى. ءبىر كەزدە "بيلىككە قارسى قول كوتەرۋ" دەگەن ارنايى باپتىڭ جازاسى وتە قاتال بولاتىن. سوندىقتان قىلمىسكەرلەر فورمالى ادامعا قول كوتەرۋدى ويلامايتىن. وتكەن ناۋرىز ايىندا عانا پەتروپاۆلدا تاعى ءبىر بۇزاقى پوليتسيا كاپيتانى جانات مۇحامەدجانوۆقا پىشاقپەن جاراقات سالدى. ارينە، قازىر پوليتسيا قىزمەتكەرلەرىنە اتۋ قارۋى بەرىلگەن، بىراق ونى دا وڭدى-سولدى قولدانا بەرمەيسىڭ عوي. ابزالى جازانىڭ قاتاڭىراق بولعانى كەرەك.

 

پەتروپاۆل

سوڭعى جاڭالىقتار

ۇقساس جاڭالىقتار