ءبىزدىڭ كەيىپكەرىمىز الماس كوكشەتاۋ قالاسىندا 1985 جىلى دۇنيەگە كەلىپتى. 2003 جىلى ورتا مەكتەپتى بىتىرگەننەن كەيىن دارىگەر بولسام دەگەن ارمانى جەتەلەپ, ۇلتتىق بىرىڭعاي تەست تاپسىرعان ەكەن. الايدا تەست قورىتىندىسى بويىنشا جيناعان ۇپايى استانا مەديتسينا ۋنيۆەرسيتەتىنە گرانتقا تۇسۋگە جەتپەي قالادى. مۇنداي ساتسىزدىككە مويىماعان ول قۇجاتتارىن كوكشەتاۋداعى مەديتسينالىق كوللەدجگە تاپسىرىپ, گرانتقا ىلىگەدى. وسىلايشا, ەلوردادا وقىسام دەگەن ارمانى ورىندالماستاي كورىنگەن-ءدى. بىراق العان بەتىنەن قايتپايتىن الماس كەلەر جىلى تاعى دا ۇلتتىق بىرىڭعاي تەست تاپسىرادى.
– مەديتسينالىق كوللەدجدە ءبىرىنشى كۋرستى وتە جاقسى اياقتادىم. سودان كەيىن جازعى دەمالىستا دايىندالىپ, قايتادان ۇبت تاپسىردىم. بۇل جولى جولىم بولىپ, «پەدياتريا» ماماندىعى بويىنشا استانا مەديتسينا ۋنيۆەرسيتەتىنە گرانتقا 2004 جىلى ءتۇسىپ, 2011 جىلى ءساتتى ءبىتىردىم. ەكىنشى جوعارى ءبىلىمدى ش.ءۋاليحانوۆ اتىنداعى كوكشەتاۋ مەملەكەتتىك ۋنيۆەرسيتەتىندە مەنەدجمەنت سالاسى بويىنشا الدىم, – دەيدى ول.
الماس كەيىننەن ءبىلىمىن جالعاستىرۋ ماقساتىندا 2016 جىلى ۇلىبريتانيانىڭ ەسسەكس ۋنيۆەرسيتەتىنە وقۋعا ءتۇسىپ, وندا جوبالاردى باسقارۋ سالاسى بويىنشا ماگيستر دارەجەسىن يەلەندى. ءبىزدىڭ كەيىپكەرىمىز پرەزيدەنتتىك جاستار كادرلىق رەزەرۆىن ءتيىمدى جوبا دەپ ەسەپتەيدى. ويتكەنى وعان تاپسىرىپ, وزا شاپقاندار كىل «سەن تۇر, مەن اتايىن» دەيتىن جاستار. ياعني ولار جالىنداپ تۇرعان شاعىندا ەلدىڭ دامۋىنا كۇش سالۋعا دايىن.
– پرەزيدەنتتىك جاستار كادرلىق رەزەرۆىنە وتكەن جىگىتتەر مەن قىزداردىڭ ورتاشا جاسى 32 مەن 33 اراسى. بۇل نەنى بىلدىرەدى؟ ياعني ولار كەمىندە 8-9 جىل جۇمىس تاجىريبەسى بار ماماندار. ارينە كەيبىرەۋلەرىندە جۇمىس ءوتىلى از شىعار. قازاقتا «وتىزىندا وردا بۇزباعان, قىرقىندا قامال الامايدى», دەگەن ماقال بار عوي. ەندەشە, 30 جاس – تولىسقان اقىلدىڭ ناعىز ناتيجە بەرەتىن كەزەڭى. ال پرەزيدەنتتىك جاستار كادرلىق رەزەرۆكە وتكەن جىگىتتەر مەن قىزدار ەگەمەندى مەملەكەتىمىزدىڭ وركەندەۋىنە, حالىقتىڭ ءال-اۋقاتى مەن ءومىر ساپاسىن ارتتىرۋ ءۇشىن لاپىلداپ دايىن تۇر. پرەزيدەنتتىك جاستار كادرلىق رەزەرۆى قانشالىقتى ءتيىمدى جوبا ەكەنىن ۋاقىت كورسەتەدى. تاياۋدا وسى جوباعا وتكەندەردىڭ 150-ءى جاڭا قىزمەت يەلەنىپتى. نەگىزى ولار ۇزدىك جاستار بولعاندىقتان, بىلايعى ۋاقىتتا دا سول لاۋازىمعا تاعايىندالۋى ابدەن ىقتيمال ەدى. دەگەنمەن پرەزيدەنتتىك جاستار كادرلىق رەزەرۆى ولارعا جاڭا مۇمكىندىك بەرىپ وتىر. قازىرگى تاڭدا ۇزدىك شىققان 300-ءدىڭ اراسىنان شامامەن ونشاقتى جاس «ا» ساناتتاعى مەملەكەتتىك لاۋازىمدارعا جۇمىسقا ورنالاسقان. بۇل – سول جاستاردىڭ 3,3 پايىزى. مۇنى مەن نە ءۇشىن ايتىپ وتىرمىن؟ ءبارىمىزدى «باستىق» قىلۋ قاجەت ەمەس. مەملەكەتىمىزگە جاڭا باعدار بەرۋ ءۇشىن, ونى ءارى قاراي تسيفرلاندىرۋ جانە ەكونوميكانى جاقسارتۋ ءۇشىن لاۋازىمدى ورىنداردا جاڭا فورماتتى ادامداردىڭ كوپ بولۋى قاجەت, – دەيدى الماس.
الماسقا «تۇماندى البيونداعى» وقۋىن تامامداعان سوڭ, سول جاقتا قالىپ جۇمىس ىستەۋگە مۇمكىندىك تۋعان. الايدا الماس ءوز ەلىندە ەڭبەك ەتۋدى ءجون كورەدى.
– مەملەكەت بەرگەن مۇمكىندىكتى پايدالانىپ, قولىمنان كەلگەنشە ەلگە پايدامىز ءتيىپ قالار دەگەن ويمەن وسى جوباعا قۇجاتىمدى تاپسىردىم. ارينە ەڭ باسىندا وسى جوباعا حالىق اراسىندا سەنىمسىزدىكپەن قاراعاندار تابىلدى. قازىرگى تاڭدا ىرىكتەۋ پروتسەسى 100 پايىز اشىق ءوتتى دەپ ايتا الامىن. وعان ءاربىر ىرىكتەۋ كەزەڭدەرىندە ۆيدەو مەن اۋديو جازبالارى دالەل, – دەيدى الماس.
بۇگىندە كادرلىق رەزەرۆكە وتكەن جاستار اراسىندا ءوزارا بايلانىس ورناتىلعان. ولار باسى قوسىلعان كەزدە مەملەكەتتىك ماسەلەلەردى تالقىلاپ وتىرادى. ءار سالا بويىنشا توپتار قۇرىپ, ۇسىنىستارى مەن تىلەكتەرىن ازىرلەيدى. ۋاقىتى كەلگەندە مۇنى ءتيىستى مەكەمەلەرگە ۇسىنباق. الماستىڭ ايتۋىنشا, جوبالاردىڭ باسىم كوپشىلىگى ازىرگە باستاپقى كەزەڭدە.
الماس ءوز وتباسىنداعى ەكىنشى ۇل. ونىڭ ولجاس دەگەن اعاسى جانە ەكى ءىنىسى بار. ولجاس قازاق مەكتەبىنىڭ تۇلەگى. ول ش.ءۋاليحانوۆ اتىنداعى كوكشەتاۋ مەملەكەتتىك ۋنيۆەرسيتەتىن تاريح, ەكونوميكا جانە قۇقىق ءپانىنىڭ مۇعالىمى ماماندىعى بويىنشا تامامداعان. ەكى جىلداي ۇستازدىق ەتىپ, كەيىننەن ماركەتينگ, ادام كاپيتالىن دامىتۋ, مەملەكەت-جەكەمەنشىك ارىپتeستىگى جوبالارى بويىنشا جۇمىس ىستەگەن. 2018 جىلى اقش-تا حالىقارالىق ءبىلىم بەرۋدى دامىتۋ ماماندىعىنىڭ ماگيسترى اتاندى.
ءبىر قىزىعى, ولجاس تا پرەزيدەنتتىك جاستار كادرلىق رەزەرۆىنە ەندى. جىل باسىندا مەملەكەت باسشىسى قاسىم-جومارت توقاەۆپەن جوباعا وتكەن 300 جاستىڭ كەزدەسۋىندە ولجاس ساكەنوۆ ءسوز سويلەپ, ءوزىنىڭ ويىمەن بولىسكەن-ءدى.
– ءبىز قاراپايىم وتباسىنان شىققانبىز. اكەمىزدىڭ باقيعا اتتانعانىنا 19 جىل تولدى. ءوز كۇشىمىزبەن شەتەلدەردە ءبىلىم الىپ, ەلىمىزگە قىزمەت جاساپ ءجۇرمىز. اعام اقش-تاعى پەنسيلۆانيا ۋنيۆەرسيتەتىندە ءبىلىم سالاسى بويىنشا ماگيستر اتاعىن العان. قازىرگى تاڭدا BTC Education كومپانياسىندا جۇمىس ىستەپ ءجۇر. اعامنىڭ ءبىلىمى مەن جۇمىس تاجىريبەسى مول, – دەيدى الماس.
ەڭبەك جولىن ستۋدەنتتىك كەزىنەن باستاعان كەيىپكەرىمىز ءوز سالاسىنىڭ كوپتەگەن ساتىسىنان وتكەن.
– اۋەلگى كەزدە №1 قالالىق اۋرۋحانانىڭ نەۆرولوگيا مەن ارتەريالىق گيپەرتەنزيا بولىمىندە سانيتار بولىپ جۇمىس ىستەدىم. ودان كەيىن 2011 جىلى جوعارى ءبىلىمدى العان سوڭ, دەنساۋلىق ساقتاۋ سالاسىنا كەلدىم. دەنساۋلىق ساقتاۋ مينيسترلىگىنە قاراستى بىرقاتار ۇيىمدا ەڭبەك ەتتىم. سونداي-اق «الەۋمەتتىك مەديتسينالىق ساقتاندىرۋ» جوباسىنىڭ ەكونوميكا, دەنساۋلىق ساقتاۋ جانە مەملەكەت-جەكەمەنشىك ارىپتەستىگىن دامىتۋ مامانى رەتىندە جۇمىس ىستەدىم, – دەيدى ول.
