ءيا, تۇركىستان وبلىسىنىڭ اكىمى ءو.شوكەەۆتىڭ باستاماسىمەن ىسكە اسىرىلعان, كومەككە مۇقتاج جاندارعا دەمەۋ بولعان «قامقورلىق» باعدارلاماسىنىڭ شاراپاتى تيگەندەردىڭ ءوز ايتارى بار جانە ول ورىندى دا. باعدارلاما اياسىندا كۇنكورىسى تومەن كوپبالالى وتباسىلاردى جانە ءجۇرىپ-تۇرۋى قيىن مۇمكىندىگى شەكتەۋلى ازاماتتاردى باسپانامەن قامتۋ شاردارا اۋدانىندا دا قولعا الىنعان بولاتىن. بۇل ورايدا بيىل 9 باسپانا بەرۋ جوسپارلانعان ەكەن. ول جوسپار ارتىعىمەن ورىندالىپ, 12 باسپانا بەرىلىپ وتىر. جىل سوڭىنا دەيىن تاعى دا 3 تۇرعىن ءۇيدى تاپسىرۋعا مۇمكىندىك بار. سونىمەن قاتار شاردارا اۋدانىندا مەملەكەت تاراپىنان 4 قاباتتى, 40 پاتەرلى 2 تۇرعىن ءۇي كەشەنىنىڭ قۇرىلىسى اياقتالۋدا. ياعني جىل سوڭىنا دەيىن ءۇي كەزەگىندە تۇرعان 80 وتباسى باسپانالى بولادى. بۇگىنگى تاڭدا شاردارا اۋدانىندا اتاۋلى الەۋمەتتىك كومەك الاتىن از قامتاماسىز ەتىلگەن 1713 وتباسى بولسا, ونىڭ ىشىندە باسپاناسى جوق تۇرعىن ۇيگە مۇقتاج 12 تۇرمىسى تومەن كوپبالالى جانە مۇمكىندىگى شەكتەۋلى وتباسىلار باسپانامەن قامتاماسىز ەتىلىپ وتىر.
«اۋداندا «قامقورلىق» باعدارلاماسى اياسىندا ومىرلىك قيىن جاعدايعا تاپ بولعان, قالا, اۋىلدىق وكرۋگتەردەن انىقتالعان 58 وتباسىعا دەمەۋشىلەر ەسەبىنەن 2 599,2 مىڭ تەڭگەنىڭ الەۋمەتتىك كومەگى كورسەتىلدى. سونداي-اق 58 وتباسىنىڭ ەڭبەككە جارامدى 24 مۇشەسى جۇمىسپەن قامتىلعان. ودان بولەك جالپى سوماسى 25,7 ملن تەڭگەگە دەمەۋشىلەر ەسەبىنەن 6, ياعني شاردارا قالاسىنان – 4, قوسسەيىت جانە ق.تۇرىسبەكوۆ اۋىلدىق وكرۋگتەرىنەن ءبىر-بىردەن تۇرعىن ءۇي بەرىلدى. اۋدان بويىنشا 722 «التىن القا» يەگەرى, 2027 «كۇمىس القا» يەگەرى, 136 – «باتىر انا», 124 I جانە II دارەجەلى «انا داڭقى» وردەنىمەن ماراپاتتالعان كوپبالالى انالار بار. ولارعا جانە جاعدايى تومەن وتباسىلارعا جەرگىلىكتى اكىمدىك تاراپىنان ۇنەمى كومەك كورسەتىلىپ كەلەدى. بالا – بولاشاعىمىز دەسەك, انالار – سول بولاشاقتىڭ نەگىزىن قالاۋشىلار. الەمنىڭ جارىعىن سىيلاعان اسىل جاندارعا جاردەماقى بولسىن, وزگەسى بولسىن, قانداي قۇرمەت, قولداۋ كورسەتسەك تە جاراسادى», دەيدى اۋدان اكىمى قايرات جولدىباي.
ال اۋداندىق جۇمىسپەن قامتۋ جانە الەۋمەتتىك باعدارلامالار ءبولىمىنىڭ باسشىسى ج.تۇرلىبەكوۆتىڭ حابارلاۋىنشا, توتەنشە جاعداي كەزىندە كىرىسسىز قالۋعا بايلانىستى 34936 ادامنان ءوتىنىش كەلىپ تۇسكەن.
«ازاماتتارعا ارنالعان ۇكىمەت» مەملەكەتتىك كورپوراتسياسى شاردارا اۋداندىق بولىمشەسىنە 34788 ءوتىنىش, شاردارا اۋداندىق جۇمىسپەن قامتۋ جانە الەۋمەتتىك باعدارلامالار بولىمىنە 148 ءوتىنىش قابىلدانعان. «بولىمگە تۇسكەن وتىنىشتەر حالىقتى جۇمىسپەن قامتۋ ماسەلەسى جونىندەگى شتابتا قارالىپ, 134 ادامنىڭ ءوتىنىشى كولدانىستاعى زاڭعا سايكەس كەرى قايتارىلدى, ءبىر جەكە تۇلعا جانە 13 زاڭدى تۇلعا وتىنىشتەرىنە وڭ قورىتىندى بەرىلىپ مەملەكەتتىك كورپوراتسياعا جولداندى. بۇگىنگى تاڭدا مەملەكەتتىك كورپوراتسيانىڭ اۋداندىق بولىمشەسىنە 1 كەزەڭگە 20288 وتىنىشكە بانكتەر ارقىلى جاردەماقى تولەنسە, 94 وتىنىشتەن باس تارتىلعان. توتەنشە جاعداي رەجىمىنىڭ ۇزارتىلۋىنا بايلانىستى 2 كەزەڭگە 17201 ادامعا 42500 تەڭگە الەۋمەتتىك تولەم قايتا تولەندى», دەيدى ج.تۇرلىبەكوۆ.
بيىلعا مەملەكەتتىك اتاۋلى الەۋمەتتىك كومەككە بيۋدجەتتەن 1 173,1 ملن تەڭگە بولىنگەن. ونىڭ 1 065,6 ملن تەڭگەسى رەسپۋبليكالىق, 107,5 ملن تەڭگەسى جەرگىلىكتى بيۋدجەتتەن. مەملەكەتتىك اتاۋلى الەۋمەتتىك كومەك الۋعا 1713 وتباسىن قاتىستىرۋ (9873 ادام) جوسپارلانۋدا. ونىڭ ىشىندە 223,4 ملن تەڭگە 1-6 جاسقا دەيىنگى بالالارعا كەپىلدەندىرىلگەن الەۋمەتتىك پاكەتتەر ءۇشىن قاراستىرىلعان. بيىل 6 ايدا 636 وتباسىدان قۇجات قابىلدانىپ, ونىڭ 533-ىنە 107,6 ملن تەڭگە تاعايىندالىپ, تولىعىمەن تولەندى. 100 وتباسىنىڭ قۇجاتىنان كوميسسيانىڭ شەشىمى بويىنشا باس تارتىلىپ, قالعان 3 وتباسىنىڭ قۇجاتتارى كوميسسيا قاراۋىنا ۇسىنىلعان.
«ەڭبەك جانە حالىقتى الەۋمەتتىك قولداۋ ءمينيسترىنىڭ «توتەنشە جاعداي كەزەڭىندە الەۋمەتتىك-ەڭبەك سالاسىندا مەملەكەتتىك قىزمەتتەر كورسەتۋدىڭ جانە حالىقتىڭ جەكەلەگەن ساناتتارىن ازىق-ت ۇلىك جانە تۇرمىستىق جيىنتىعىمەن قامتاماسىز ەتۋدىڭ كەيبىر ماسەلەلەرى تۋرالى» بۇيرىعىنا سايكەس, مەملەكەتتىك اتاۋلى الەۋمەتتىك كومەك الۋعا I توقسانعا قابىلدانعان 485 وتباسىنىڭ الەۋمەتتىك تولەمدەرى II توقسانعا ۇزارتىلدى. ولارعا تاعايىندالعان قارجى 106,7 ملن تەڭگە, بۇگىنگى تاڭعا تاعايىندالعان قارجىنىڭ رەسپۋبليكالىق بيۋدجەتتەن 86,7 ملن تەڭگەسى ءساۋىر, مامىر ايلارىنا تولەندى», دەيدى ءبولىم باسشىسى.
جالپى اۋداندا 2020 جىلعا كۇنكورىس دەڭگەيىنەن تومەن حالىقتىڭ ۇلەسىن 27,1 پايىزعا دەيىن تومەندەتۋ جوسپارلانىپ وتىر.
تۇركىستان وبلىسى
