تولەم قابىلەتى تومەندەدى
كونسالتينگتىك ۇيىم ەكى ستسەناريدى ۇسىندى. بازالىق نۇسقاسىندا قايتارىلمايتىن نەسيەنىڭ كولەمى 400 ملرد ەۋروعا دەيىن ۇلعاياتىنى ايتىلعان. بۇل الدىڭعى ءۇش جىلمەن سالىستىرعاندا 2,5 ەسەگە كوپ. پەسسيميستىك ستسەناريگە سايكەس, قايتارىلمايتىن كرەديتتىڭ ۇلەسى 10%-عا دەيىن ءوسىپ, بازالىق نۇسقامەن سالىستىرعاندا قارىزداردىڭ كولەمى ەكى ەسەگە ارتادى.
ەۋروپالىق بانكتەردىڭ نەسيەلىك شىعىندارىن ەسكەرسەك, بيىل ولاردىڭ كىرىسى 180 ملرد ەۋرودان 385 ملرد ەۋروعا دەيىن قىسقارۋى عاجاپ ەمەس. سوندىقتان 2022 جىلى بۇل كورسەتكىش 2019 جىلدىڭ دەڭگەيىنە ورالماۋى بەك مۇمكىن.
ساراپشىلاردىڭ ايتۋىنشا, 2021 جىلى تازا پايىزدىق كىرىس بىلتىرعى جىلمەن سالىستىرعاندا 8%-عا تومەندەپ, كاپيتالدىڭ وسى جىلداعى ورتاشا رەنتابەلدىلىگى نولدىك مەجەگە جەتەدى. تەك 2022 جىلى ونىڭ مولشەرى 5,3%-عا دەيىن كوتەرىلەدى دەپ بولجانۋدا.
ۇلىبريتانيا مەن ەۋروپانىڭ ورتالىق بانكتەرى 2008 جىلعى داعدارىستان كەيىن ون جىلدان ارتىق ۋاقىتتان بەرى باسەكەلەستىك جاعدايىندا كىرىس كولەمىن قالپىنا كەلتىرۋگە تىرىستى.
الايدا امەريكالىق بانكتەرمەن سالىستىرعاندا ولاردىڭ تابىسى ءالى كۇنگە دەيىن ەكى ەسە تومەن. تاياۋ بولاشاقتا قايتارىلمايتىن كرەديتتەردىڭ وسۋىنە بايلانىستى, سول سەكىلدى كىرىس دەڭگەيىنىڭ تومەندەۋى ناتيجەسىندە «كارى قۇرلىقتاعى» بانكتەردىڭ قارجىلىق تۇراقتىلىعىنىڭ بازالىق كورسەتكىشتەرى 15%-دان 3,8%-گە دەيىن تومەندەيدى.
سول سەبەپتى Oliver Wyman بانكتەرگە شىعىنداردى مۇمكىندىگىنشە قىسقارتىپ, پروبلەمالىق نەسيەلەرگە قاتىستى ساياساتتى وزگەرتۋدى ۇسىندى. كومپانيا ساراپشىلارى مۇنى مەملەكەتتىڭ قولداۋىنسىز جۇزەگە اسىرۋ قيىنعا سوعاتىنىن جوققا شىعارمادى.
وسىعان دەيىن Janus Henderson ( ۇلىبريتانيادا ورنالاسقان حالىقارالىق قارجىلىق توپ) كوروناۆيرۋستىق پاندەميانىڭ سالدارىنان بيىل الەمدىك كومپانيالاردىڭ قارىزىنىڭ جالپى جيىنتىعى 9,3 ترلن دوللارعا دەيىن جەتەدى دەپ بولجاعان-دى.
جوعارىداعى تاۋەكەلدەردى ەسكەرە كەلە, ەۋروپالىق ورتالىق بانك (ەوب) ايماقتاعى قارجى ينستيتۋتتارىنا 2021 جىلعا دەيىن ديۆيدەندتەردى تولەمەي, «بەلدى بەكەم بۋىپ وتىرۋعا» كەڭەس بەردى. نەگە دەسەڭىز, ەوب 86 بانك بويىنشا زەرتتەۋ جۇرگىزگەن. سوعان سايكەس, قارجى ۇيىمدارى ەكى باعىتتاعى سترەسس-تەستتەن ءوتىپ, ءبىرىنشى سىناقتىڭ ناتيجەسىندە بانكتەردىڭ تولەم قابىلەتتىلىگى 1,9%-دىق تارماققا تومەندەگەنى بايقالدى. ەكىنشى تەستتىڭ قورىتىندىسى 5,7%-دى كورسەتتى.
ەۋروايماق بانكتەرى كوبىنەسە گەوگرافيالىق ورنالاسۋى نەگىزىندە باعالانادى. ءوڭىردىڭ وڭتۇستىگىندەگى نەسيە بەرۋشىلەردىڭ تاۋەكەلدىلىگى جوعارى بولىپ كەلەتىندىكتەن ەوب اكتسيونەرلەرگە سىياقى تولەۋدە شەكتەن شىقپاۋدى تالاپ ەتتى. جىل باسىنان بەرى ەۋروپاداعى بانك سەكتورى شامامەن 33%-عا قۇلدىراعان.
شىلدەنىڭ 21-ىندە ەۋروپالىق وداقتىڭ باسشىلارى ۇزاق كەلىسسوزدەردەن كەيىن قۇنى 750 ملرد ەۋرو بولاتىن ايماق ەكونوميكاسىن قۇتقارۋ بويىنشا جوسپاردى ماقۇلدادى. وسى ايداعى جاعدايعا سايكەس, اتالعان وڭىردەگى ىسكەرلىك بەلسەندىلىك سوڭعى ەكى جىلدا ەڭ جوعارى قارقىنمەن قالپىنا كەلدى.
اقش ۆاليۋتاسىن التىن ىعىستىرۋى مۇمكىن
Goldman Sachs Group ينۆەستيتسيالىق بانكى اقش دوللارىنىڭ الەمدىك رەزەرۆتىك ۆاليۋتا رەتىندەگى مارتەبەسىنە قاۋىپ ءتونىپ تۇر دەپ ەسەپتەيدى. وعان جۋىرداعى التىن باعاسىنىڭ ءوسۋى دالەل. Goldman Sachs ساراپشىلارىنىڭ ايتۋىنشا, دوللار بىرنەشە قاۋىپ-قاتەرگە تاپ بولۋى مۇمكىن. ونىڭ ىشىندە اقش فەدەرالدى رەزەرۆىنىڭ باعامى «ينفلياتسيالىق بەيىمدىلىككە» قاراي وزگەرۋى تاۋەكەلدىلىگى, ساياسي بەلگىسىزدىكتىڭ جالعاسۋى, سونداي-اق ەلدەگى كوروناۆيرۋستىق ينفەكتسيالاردىڭ ەكىنشى مارتە ءورشۋ قاۋپى بار. ماماندار پاندەميانىڭ سالدارىنان قارىزدىڭ كولەمى ارتىپ, بۇل حالىقتىڭ اراسىنداعى قورقىنىشتىڭ كۇشەيۋىنە الىپ كەلۋى مۇمكىن ەكەنىن جاسىرمايدى.
«اقش دوللارىنىڭ رەزەرۆتىك ۆاليۋتا رەتىندە ۇزاق ءومىر سۇرەتىنىنە كۇمان پايدا بولدى. التىن – بۇل تىعىرىققا تىرەلگەندە قولداناتىن سوڭعى قاراجات قۇرالى. اسىرەسە ۇكىمەتتەر وزدەرىنىڭ ءداستۇرلى ۆاليۋتالارىن قۇنسىزداندىرىپ, ناقتى پايىزدىق مولشەرلەمەنى رەكوردتىق دەڭگەيگە دەيىن تومەندەتكەندە ونى پايدالانۋدىڭ ءساتى تۋادى», دەپ جازدى Goldman Sachs Group ستراتەگتەرىنىڭ ءبىرى دەنيەل شارپ.
امەريكالىق جاسىل اقشانىڭ قۇلدىراۋىنا ەۋروپالىق وداق ەلدەرىنىڭ ەكونوميكانى كوروناۆيرۋستان قۇتقارۋ جونىندەگى پاكەتتى قابىلداۋعا بايلانىستى تاريحي كەلىسىمى تۇرتكى بولدى. سەبەبى بۇل كەلىسىمنەن كەيىن كوپ ۇزاماي دوللار قۇنسىزدانىپ, ەۋرونىڭ ىقپالى كۇشەيە باستادى. بۇل تاريحتاعى العاشقى بىرلەسكەن قارىزدى شىعارۋعا اكەلەدى.
Goldman Sachs 2021 جىلى التىن باعاسى 18%-عا وسەدى دەپ بولجاپ وتىر. ونىڭ 9%-ى بەس جىلدىق ناقتى مولشەرلەمەنىڭ تومەندەۋىنە بايلانىستى بولىپ, بۇل مينۋس 2%-عا دەيىن تۇسپەك. قالعان 9%-ى – «اقش دوللارىنا شاققانداعى ءىجو-ءنىڭ 15%-عا وسۋىنە» تىكەلەي قاتىستى.
