قوعام • 03 تامىز، 2020

الەۋمەتتىك وسال توپتاعىلار ءموبيلدى قوسىمشا ارقىلى تەگىن زاڭگەرلىك كەڭەس الادى

32 رەت كورسەتىلدى

حالىقتىڭ الەۋمەتتىك وسال توبىنداعى جاندار Lawcenter ارنايى قوسىمشاسى ارقىلى بىلىكتى زاڭگەرلەردەن تەگىن كەڭەس الا الادى.

ول ءۇشىن قوسىمشا ارقىلى تىركەلىپ، مارتەبەڭىزدى راستاپ، نولدىك مولشەرلەمەمەن تاپسىرىس بەرۋ قاجەت. كەيىن Pro bono زاڭگەرلەرى كليەنتپەن بايلانىسادى.

– ءبىز "قازاقستان زاڭگەرلەر وداعى" رقب جانە "ۇلان-عايىر دالا ەلى" قب سەرىكتەستەرىمىزبەن بىرگە قازىر ءتورت ايماقتا (اقمولا، قاراعاندى، جامبىل، قىزىلوردا وبلىستارى) كومەك كورسەتىپ جاتىرمىز. قازىرگە دەيىن 500-گە جۋىق ادام كومەك الدى. وتىنىمدەر ءارتۇرلى ساۋالدارمەن –جاردەماقى، اليمەنت، نەسيە بويىنشا تۇسەدى. سونىمەن قاتار ولار وتىنىشتەردى جىبەرۋ، تۇتىنۋشىلار قۇقىعىن قورعاۋ بويىنشا انىقتامالىق سۇراقتار جولدايدى، – دەيدى "جاس زاڭگەرلەر پالاتاسى" قب توراعاسى ساعيدوللا بايمۇرات.

بىرلەستىك توراعاسىنىڭ ايتۋىنشا، قىزمەت الۋشىلاردىڭ زاڭگەرلەر جۇمىسىن باعالاۋ مۇمكىندىگى دە قاراستىرىلعان.

"جاس زاڭگەرلەر پالاتاسى" قب-نىڭ نەگىزىن قالاۋشى 2015-2017 جىلعى "بولاشاق" باعدارلاماسى بويىنشا لوندون ەكونوميكا جانە ساياسي عىلىمدار مەكتەبىنىڭ تۇلەگى. ونىڭ ايتۋىنشا، قىزمەتتىڭ جاڭا ءتۇرى مەن قوسىمشاسى – زاڭ قىزمەتتەرى نارىعىن، ساپالى كادرلار مەن باسەكەگە قابىلەتتىلىكتى دامىتۋ ءۇشىن جاسالعان قادامداردىڭ ءبىرى.

"وتكەن جىلى ءبىز "جاس زاڭگەرلەر پالاتاسى» قوعامدىق بىرلەستىگىن قۇردىق. نەگىزگى ماقسات ستۋدەنت-زاڭگەرلەرگە، تاعىلىمدامادان ءوتۋشى جاستارعا تاجىريبەلىك ءبىلىم بەرۋدى، تاجىريبەلى زاڭگەرلەرمەن نارىقتا بىرگە دامۋدى كوزدەيدى. ادامدارعا تەگىن كەڭەس بەرىلەدى. بولاشاقتا بۇكىل قازاقستان بويىنشا قامتۋ جوسپارلانۋدا. بىراق ءبىز حالىقتىڭ الەۋمەتتىك وسال توپتارىنان باستادىق. ءبىز الەۋمەتتىك وسال ازاماتتارعا كومەك كورسەتۋ يدەياسىن Lawcenter قوسىمشاسىندا قولداندىق، بۇل الەۋمەتتىك جوبالار شەڭبەرىندەگى بارلىق پروتسەستەردى تسيفرلاندىرۋعا مۇمكىندىك بەردى"، دەيدى ساعيدوللا.

بۇعان دەيىن بارلىق قىزمەتتەر تەلەفون، مەسسەندجەرلەر مەن تەگىن زاڭگەرلىك كومەك كابينەتتەرى ارقىلى كورسەتىلدى، الايدا پاندەمياعا بايلانىستى بەلسەندىلىك تومەندەگەنى بايقالادى.

سوڭعى جاڭالىقتار

الىستان جەتكەن العىس

ايماقتار • بۇگىن، 14:10

ۇقساس جاڭالىقتار