ول «قازاتومونەركاسىپ» ۇاق-نىڭ «اپپاق» جشس-نىڭ «باتىس مىڭقۇدىق» كەنىشىنىڭ باستىعى قىزمەتىن اتقارىپ جۇرگەندە, 2018 جىلدىڭ 18 قازانى كۇنى «اپپاق» جشس باس ديرەكتورى ا.اۆدەەۆ جۇمىستان شىعارادى. ديرەكتور ونى جۇمىستان شىعارۋ سەبەبىن, «ماعان سەنىمدى ادام كەرەك» دەپ تۇسىندىرگەن. ق.جارتىبەكوۆ: «ديرەكتور قازىر ءوز ەركىڭمەن ارىز جازىپ جۇمىستان شىقپاساڭ, ەرتەڭ ەش جەر جۇمىسقا المايتىنداي ەتىپ ءباربىر شىعارىپ جىبەرەم» دەپ قورقىتتى دەيدى. ءسويتىپ ول ء«وز ەركىممەن جۇمىستان شىعامىن» دەپ ارىز جازعان, بىراق ول ارىزعا ءوزى قول قويماعان. ال ق.جارتىبەكوۆ «جۇمىستان ءوز ەركىمەن» شىعۋ جونىندە ارىز جازىسىمەن, ىلە-شالا قولى قويىلماعان الگى ارىز نەگىزىندە ءدال سول كۇنى «جۇمىستان شىعارىلدى» دەگەن «اپپاق» جشس-نىڭ 18.10.2018 جىلعى №579 بۇيرىعى دا پايدا بولعان.
ق.جارتىبەكوۆ «قازاتومونەركاسىپ» ۇاك» اق-نىڭ ۋران ءوندىرۋشى ەنشىلەس كاسىپورىندارىندا 15 جىل ەڭبەك ەتكەن ەكەن. ول «تاۋ كەن كومپانياسى» باس ديرەكتورىنىڭ (نيەتباەۆ م.ا.) 2009 جىلدىڭ قورىتىندىسى بويىنشا قىزمەتىن مۇلتىكسىز اتقارعانى ءۇشىن العىس حاتپەن, «قازاتومونەركاسىپ» ۇاك» اق باسقارما توراعاسىنىڭ جانە سوزاق اۋدانى اكىمىنىڭ العىس حاتتارىمەن ماراپاتتالىپتى. 2018 جىلى ۋران ءوندىرىسى سالاسىندا جەرگىلىكتى جەردەن شىققان ۋران كەنىشىنىڭ باسشىسى رەتىندە ونىڭ ەسىمى سوزاق اۋدانىنىڭ ەنتسيكلوپەدياسىنا دا ەنگىزىلگەن. 2017 جىلى ول «اپپاق» جشس-نا جۇمىسقا شاقىرىلىپ, «باتىس مىڭقۇدىق» كەنىشىنە باسشىلىق لاۋازىمعا تاعايىندالادى. ودان كەيىن «اپپاق» جشس-نىڭ سول كەزدەگى باسشىلارى ق.جارتىبەكوۆتىڭ بىلىكتىلىگى مەن باسشىلىق قابىلەتىن وڭ باعالاپ, ونى سەرىكتەستىكتىڭ باس ديرەكتورىنىڭ ورىنباسارى لاۋازىمىنا تاعايىنداۋ جونىندە ۇسىنىس بەرگەن. سويتكەن ق.جارتىبەكوۆتىڭ بۇل قىزمەتىنەن ء«وز ەركىمەن» شىعامىن دەگەن وي ءۇش ۇيىقتاسا دا تۇسىنە ەنىپ كورمەگەن.
وسىلايشا, مۇمكىن ادىلدىكتى قالپىنا كەلتىرەر دەگەن ۇمىتپەن, سوتقا ارىز جازادى. ارىز بەرگەن تۇركىستان وبلىسىنىڭ سوزاق اۋداندىق سوتى, وندا وسى ىسكە توراعالىق ەتۋشى سۋديا ب.ساعىنتاەۆ مۇنىڭ قويعان تالاپ ارىزى بويىنشا بار ءمان-جايدىڭ اق-قاراسىن اشىپ, وڭ شەشىم شىعارعاندا, زاڭنىڭ عانا سالتانات قۇراتىندىعىنا تولىق كوز جەتكىزەدى. ول تۋرالى ق.جارتىبەكوۆ العىس بىلدىرگەن حاتىندا بىلاي دەيدى: «اۋداندىق سوت مەنىڭ ءىسىمنىڭ اق-قاراسىن ايىرىپ, وڭ شەشىم شىعاردى. «اپپاق» جشس باس ديرەكتورى ا.اۆدەەۆ تاراپىنان قۋدالاۋعا ۇشىراپ, 15 جىل بويى ناپاقا تاۋىپ جۇرگەن جۇمىس كوزىنەن ايىرىلىپ قالسام دا, سوزاق اۋداندىق سوتىنىڭ جانە تۇركىستان وبلىستىق اپەللياتسيالىق سوتىنىڭ مەنىڭ تالاپ ارىزىمدى وبەكتيۆتى, ادال قاراعانىنىڭ ارقاسىندا ادىلەتتىلىك ورناپ, سوت شەشىمىمەن جۇمىسقا قايتا ورنالاستىم. لاجسىزدان بوس جۇرگەن ۋاقىتىما ەڭبەك كودەكسىنە سايكەس 6 ايلىق وتەماقىمدى سوت شەشىمىمەن الدىم. وسى سوت شەشىمىندە: «مۇنداي جاعدايدا, سوت قازاقستان رەسپۋبليكاسىنىڭ ەڭبەك كودەكسىنىڭ 49-بابىنىڭ 1) تارماقشاسىنا سايكەس, جۇمىس بەرۋشى «اپپاق» جشس مەن جۇمىسكەر ق.ج.جارتىبەكوۆ اراسىندا ەڭبەك شارتى بۇزىلعانى نەگىزسىز دەپ سانايدى» – دەگەن تۇجىرىم جاسالىنىپ, ءوز دالەلىن تاپتى. وسىعان وراي, ءىستى قاراعان سوزاق اۋداندىق سوتىنىڭ سۋدياسىنا, تۇركىستان وبلىستىق سوتىنىڭ ازاماتتىق ىستەر جونىندەگى القاسىنا ۇلكەن ريزاشىلىعىمدى سىزدەردىڭ گازەت ارقىلى بىلدىرگىم كەلەدى.
ويتكەنى مەن جوعارعى سوت توراعاسى جاقىپ اسانوۆتىڭ جاڭا رەفورماسىنىڭ ىزگى ناتيجەسىندە بۇگىندە اۋداندىق, وبلىستىق سوتتار ءمان-جايى ابدەن انىق بولعان ءىستى ساعىزداي سوزا بەرمەي, ادىلدىكتى ناقتى انىقتاپ, ونىڭ جوعارى ساتىلاردا بۇرمالانبايتىن زاڭدى شەشىم شىعارىپ بەرەتىندىگىنە كوز جەتكىزدىم. بۇل ءبىزدىڭ ەلدىڭ تۇڭعىش پرەزيدەنتى – ەلباسىنىڭ دا, مەملەكەت باسشىسى قاسىم-جومارت توقاەۆتىڭ دا العاشقى ساتىداعى سوتقا جۇگىنگەن ازاماتتاردىڭ قۇقى تۇپكىلىكتى تۇردە زاڭدى قورعالۋى كەرەكتىگى تۋرالى تاپسىرمالارىنىڭ ءىس جۇزىنە اسىپ جاتقاندىعىنىڭ ناقتى دالەلى. سونى سىزدەردىڭ گازەتتەرىڭىزگە العىس رەتىندە جاريالاسام دەگەن وي كەلىپ, اق نيەتىمدى جولداپ وتىرمىن». ەندەشە ءبىز دە جەرگىلىكتى سوتتاردىڭ شىعارعان وڭ شەشىمدەرى تۇپكىلىكتى ناتيجە بەرىپ, داۋعا ناقتى نۇكتە قويىلىپ جانە سونىڭ ارقاسىندا سوت شەشىمدەرىنىڭ ءارى تارت تا, بەرى تارت كۇيگە ۇشىراماي, اينا-قاتەسىز مۇلتىكسىز ورىندالۋى – زاڭنىڭ سالتانات قۇرۋى ەكەنى ايداي انىق دەمەكپىز.
ابدۋلماحمۇت پوشاتاەۆ,
«Egemen Qazaqstan»
