Emirates Nuclear Energy Corporation-ءنىڭ حابارلاۋىنشا, نىساندى ىسكە قوسۋ جۇمىستارى الدەقاشان باستالىپ كەتكەن كورىنەدى. «باراكا» دەپ اتالاتىن اتوم ەلەكتر ستانساسى ءابۋ-دابي قالاسىنىڭ باتىس جاعالاۋىندا ورنالاسقان. كەشەن 2017 جىلى اشىلۋى ءتيىس-تۇعىن. الايدا ءتۇرلى جاعدايعا بايلانىستى كەيىنگە شەگەرىلىپ كەلگەن.
دۋبايدىڭ ءامىرشىسى شەيح مۇحاممەد بين راشيد ءال-ماكتۋم ءسۇيىنشى حاباردى تۋيتتەردەگى پاراقشاسىندا جازىپ, العاشقى يادرولىق وتىن ءساتتى تولتىرىلعانىن جاريالادى. ونىڭ ايتۋىنشا, «باراكا» اراب الەمىندەگى بەيبىت ماقساتتا قولدانىلاتىن العاشقى اتوم ەنەرگياسى.
ء«بىز نەگىزگى ماقساتىمىزعا – حالقىمىزدىڭ ەنەرگەتيكالىق قاجەتتىلىكتەرىن وتەپ, الداعى دامۋىمىزدى قاۋىپسىز, سەنىمدى ءارى زيانسىز ەلەكتر ەنەرگياسىمەن قامتاماسىز ەتۋگە تاعى ءبىر قادام جاسادىق», دەدى ENEC كومپانياسىنىڭ توراعاسى مۇحامەد يبراھيم ءال-حاممادي.
