"ۇيلەستىرۋ جۇمىستارىنا بەكىتىلگەن قمدب قىزمەتكەرلەرى كۇشەيتىلگەن رەجيمدە جۇمىس ىستەپ, ءوز مىندەتتەرىن ءتيىستى دەڭگەيدە ورىندادى. جۇمىس بارىسىندا سانيتارلىق تالاپتاردىڭ ساقتالۋى قاتاڭ قاداعالاندى.
مۇسىلمان قاۋىمىنىڭ ۇلىق مەيرامىندا قايىرىمدىلىق شاراسىن جانداندىرا ءتۇسۋ ماقساتىندا قۇرىلعان ارنايى جۇمىس توبى رەسپۋبليكا بويىنشا 58 456 مۇقتاج وتباسىعا قۇرباندىق ەتىن جەتكىزدى.
ەلىمىز بويىنشا www.qurban2020.kz سايتىنا قاشىقتان قۇربان شالۋعا تاپسىرىس بەرگەن ازاماتتاردىڭ ۋاكىلدىك قۇرباندىعى تولىعىمەن ورىندالدى. وسى ۋاكىلدىك قۇرباندىعىنىڭ ەسەبىن قاجەت ەتكەن جاندارعا اتقارىلعان ءىس-شارالاردىڭ فوتو, ۆيدەو مالىمەتى تولىق جىبەرىلدى. ۋاكىلدىك قۇرباندىققا قاتىستى تۋىنداعان سۇراقتار بويىنشا ازاماتتەرمەن جەكە جۇمىس جاسالىپ, ماماندارىمىز ءتيىستى جاۋاپتارىن بەردى. سۇراقتار تولىعىمەن قاناعاتتاندىرىلدى.
ايتا كەتسەك, ايتتىڭ ءبىرىنشى كۇنى (31.07.2020) قمدب-نىڭ ايماقتاعى وكىلدىكتەرى كومەككە زارۋ 30 715 وتباسىعا قۇرباندىق ەتىن جەتكىزىپ, مەرەكەلىك قۋانىشقا بولەگەن بولاتىن. ال ايتتىڭ ەكىنشى كۇنىندە (01.08.2020) 27 741 وتباسىعا ەت ۇلەستىرىلدى. جالپى العاندا, ياعني, بارلىق وبلىستى قامتىعاندا قۇربان ايتتىڭ ەكى كۇنىندە 58 456 جانۇياعا ەت جەتكىزىلدى.
سونىمەن قاتار, قۇرباندىق ەتى قارتتار, جەتىمدەر, بالالار ۇيلەرى مەن اۋرۋحانالارعا تەگىن تاراتىلدى. مەرەكەلىك قۋانىشقا بولەنگەن جاندار العىستارىن ايتىپ, ريزاشىلىق سەزىمدەرىن بىلدىرۋدە. سونداي-اق, قاشىقتان قۇربان شالۋعا تاپسىرىس بەرگەن ازاماتتار تاراپىنان دا تەلەفون, الەۋمەتتىك جەلى, ۋاتساپ ارقىلى جىلى لەبىزدەر مەن يگى تىلەكتەر كەلىپ تۇسۋدە.
وسى رەتتە قازاقستان مۇسىلماندارى ءدىني باسقارماسىنىڭ قايىرىمدىلىق شاراسىنا بەلسەندى تۇردە اتسالىسىپ, مۇقتاجدىڭ مۇڭىن ءبولىسىپ, ساۋاپقا ۇلەس قوسقان بارشا ازاماتتارعا, سونداي-اق جەكەلەگەن كاسىپورىندار مەن ۇيىمداردىڭ باسشىلارىنا ايرىقشا العىس ايتامىز", دەلىنگەن حابارلامادا.
