ايماقتار • 31 شىلدە، 2020

ەكولوگيا ءمينيسترى: اتىراۋداعى ەكولوگيالىق پروبلەمالاردى شەشۋ كۇن تارتىبىندە تۇر

27 رەت كورسەتىلدى

اتىراۋ قالاسىنىڭ تۇرعىندارى قالانىڭ ەكولوگيالىق پروبلەمالارىن شەشۋ جوسپارىن جاساۋعا قاتىسادى. بۇل تۋرالى ەكولوگيا، گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ مالىمدەدى. بۇل تۋرالى ەكولوگيا مينيسترلىگىنىڭ ءباسپاسوز قىزمەتىنە سىلتەمە جاساي وتىرىپ Egemen.kz حابارلايدى.

"سوڭعى بىرنەشە جىلدا اتىراۋ اۋانىڭ لاستانۋى بويىنشا "كوشباسشىلاردىڭ" قاتارىندا. 2020 جىلى 100-گە جۋىق زياندى زاتتاردىڭ رۇقسات ەتىلگەن كونتسەنتراتسياسىنان اسىپ كەتۋ جاعدايى تىركەلدى. تۇرعىنداردىڭ الەۋمەتتىك جەلىدە ءوڭىردىڭ قىنجىنارلىق ەكولوگيالىق جاعدايىنا شاعىمدانۋى تۇسىنىكتى"، دەپ جازدى م.مىرزاعاليەۆ بەيسەنبىدە.

وتكەن كەشتە وڭىردەگى ەكو-بەلسەندىلەرمەن، اكىمدىكتەرمەن جانە قالا كاسىپورىندارىمەن ونلاين-كەزدەسۋ وتكىزىلىپ، ونىڭ بارىسىندا نەگىزگى پروبلەمالىق ماسەلەلەر مەن ولاردى شەشۋ جولدارى انىقتالدى.

"اتىراۋ ءموز باسشىلىعىنان زاۋىتتىڭ شىعارىندىلارى تۋرالى مالىمەتتەردى جاريالاۋ جۇمىسىن تەزدەتۋدى سۇرادىم. بۇل اقپارات حالىققا اشىق بولۋى كەرەك. سونداي-اق، قالا باسشىلىعىنىڭ نازارىن اۋانىڭ جاي-كۇيىن LED-ەكراندارعا شىعارۋ قاجەتتىگىنە اۋداردىم"، دەپ اتاپ ءوتتى مينيستر.

ءسوز سوڭىندا ەكولوگيا مينيسترلىگىنىڭ باسشىسى كەزدەسۋدەن كەيىن قوعام بەلسەندىلەرىمەن اتىراۋداعى ەكولوگيالىق پروبلەمالاردى شەشۋدىڭ جوسپارىن جانە جول كارتاسىن جاساۋعا كەلىسكەنىن تىلگە تيەك ەتتى. تاياۋ ۋاقىتتا كارتا قابىلدانىپ، اكىمدىك ونى جۇزەگە اسىرۋدى باستايدى. قوعاممەن بىرگە وڭىردەگى بارلىق ەكولوگيالىق پروبلەمالاردى بىرتىندەپ شەشەتىنىنە سەندىردى.

"بارلىعىڭىزعا قاتىسقاندارىڭىز جانە بەلسەندى كوزقاراستارىڭىز ءۇشىن راحمەت"، دەپ جازدى م.مىرزاعاليەۆ.

سوڭعى جاڭالىقتار

ۇقساس جاڭالىقتار