ەكولوگيا • 31 شىلدە، 2020

تەمىرتاۋدا زياندى شىعارىندىلاردىڭ ازايۋىنا قاتىستى مونيتورينگ جالعاسۋدا

16 رەت كورسەتىلدى

ەكولوگيا، گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ تەمىرتاۋدا تابيعاتتى قورعاۋ شارالارىن جۇزەگە اسىرۋ بويىنشا قوعامدىق باقىلاۋدى كۇشەيتۋگە ۋادە بەردى. بۇل تۋرالى ەكولوگيا مينيسترلىگىنە سىلتەمە جاساي وتىرىپ Egemen.kz حابارلايدى.

قاراعاندى وبلىسىنا جۇمىس ساپارى بارىسىندا ۆەدومستۆو باسشىسى مەتاللۋرگتەر قالاسىنىڭ ەكوبەلسەندىلەرىمەن كەزدەستى. ونىڭ نازارىنا مەتاللۋرگيا جانە حيميا وندىرىستەرىندەگى ەكولوگيالىق جوبالار ۇسىنىلدى.

ەستەرىڭىزگە سالا كەتەيىك، تەمىرتاۋدا 2019 جىلى ەكولوگيالىق جاعدايدى جاقسارتۋ بويىنشا اۋقىمدى جوسپار ازىرلەندى. لاستاۋشى كاسىپورىندار ءوندىرىستى جاڭعىرتۋ جانە زاماناۋي تەحنولوگيالارعا كوشۋ بويىنشا مىندەتتەمەلەردى ءوز موينىنا الدى. "ارسەلورميتتال تەمىرتاۋ" اق قر ەكولوگيا، گەولوگيا جانە تابيعي رەسۋرستار مينيسترلىگىمەن مەموراندۋم جاساستى. قۇجات اتموسفەراعا زياندى زاتتاردىڭ شىعارىلۋىن 2024 جىلعا دەيىن 30%-عا قىسقارتۋدى قاراستىرادى.

– بۇگىن قاراعاندى وبلىسىنىڭ اكىمىمەن "ارسەلورميتتال تەمىرتاۋ" جانە "تەمىرتاۋ ەلەكترومەتاللۋرگيالىق كومبيناتى" كاسىپورىندارىنا باردىق. تەمىرتاۋدا اۋاداعى زياندى زاتتار كونتسەنتراتسياسىنىڭ ارتقانى بارشاعا بەلگىلى. بۇل رەتتە "ارسەلورميتتال تەمىرتاۋ" عانا جىلىنا شامامەن 250 مىڭ توننا شىعارىندىلار كولەمىن جاسايدى. وتكەن جىلى ءبىز كومپانيانىڭ جاڭا باسشىلىعىمەن شىعارىندىلار كولەمىن مىندەتتى تۇردە ازايتۋدى قامتيتىن مەموراندۋمعا قول قويدىق. كومپانيا شىعارىندىلار دەڭگەيىن تومەندەتۋ، ءوندىرىستى قايتا جابدىقتاۋ، گازعا كوشۋ، ونىڭ ىشىندە جەو جانە باسقا دا قۋاتتار بويىنشا باعدارلاماعا ينۆەستيتسيا سالۋعا دايىن، – دەدى ماعزۇم مىرزاعاليەۆ.

مەموراندۋمدا كومپانيا شىعارىندىلاردى 50 مىڭ تونناعا ازايتۋعا مىندەتتەندى، دەپ اتاپ ءوتتى ول. سونداي-اق، قاراعاندى مەن تەمىرتاۋ اراسىندا 500 مىڭ اعاش وتىرعىزىپ، قالا اينالاسىندا "جاسىل" بەلدەۋ جاسايدى دەگەن ۋاعدالاستىققا قول جەتكىزىلدى.

"ارسەلورميتتال تەمىرتاۋ" اق باس ديرەكتورى بيدجۋ ءنايردىڭ ايتۋىنشا، كوروناۆيرۋس پاندەمياسى ەكولوگيالىق باعدارلامانىڭ ورىندالۋىنا ايتارلىقتاي اسەر ەتكەن.

"قازىر قازاقستانعا شەتەلدىك تەحنيكالىق ساراپشىلاردى اكەلۋ قيىن. بىراق ءبىز بۇل ماسەلەنى جۇمىستى قاشىقتان باقىلاۋ ءۇشىن ەڭ زاماناۋي الەمدىك تەحنولوگيالاردى قولدانۋ ارقىلى شەشەمىز. ءبىز ەكولوگيالىق جوبالاردى جۇزەگە اسىرۋدى جالعاستىرۋ ءۇشىن قولدان كەلگەننىڭ ءبارىن جاسايمىز"، دەپ سەندىردى ول.

بۇگىنگى تاڭدا اگلووندىرىستەگى ەڭ ۇلكەن سۇزگىنى سالۋ جۇمىستارى قارقىندى ءجۇرىپ جاتقانىنا كوز جەتكىزۋگە بولادى. جوبالاردىڭ 75%-ى جالعاسۋدا. ءبىز تابيعي گازدى كوبىرەك پايدالانعىمىز كەلەدى، بۇل شىعارىندىلاردى ازايتادى.

ءمينيستردىڭ قالا ەكوبەلسەندىلەرىمەن كەزدەسۋىندە قوعامدىق باقىلاۋدى كۇشەيتۋ ماسەلەلەرى تالقىلاندى. ماعزۇم مىرزاعاليەۆ كاسىپورىنداردىڭ تابيعات قورعاۋ ءىس-شارالارىن ىسكە اسىرۋى بويىنشا قوعامدىق تىڭداۋلار وتكىزىلەتىنىن حابارلادى.

جالپى، ءمينيستردىڭ ايتۋىنشا، وڭىردەگى جاعدايدى جاقسارتۋ بويىنشا جۇمىس جۇيەلى تۇردە مينيسترلىكتى، ءوڭىر بيلىگىن جانە نەگىزگى لاستاۋشى كاسىپورىنداردى عانا ەمەس، سونىمەن قاتار جۇرتشىلىقتى، ەكوبەلسەندىلەردى دە تارتا وتىرىپ جۇرگىزىلۋى ءتيىس.

– ءبىز تاياۋ ۋاقىتتا قابىلدانۋى قاجەت نەگىزگى شارالاردى كورسەتە وتىرىپ، ەكولوگيالىق جاعدايدى جاقسارتۋ ءۇشىن بۇكىل قازاقستان بويىنشا جول كارتالارىن ازىرلەۋدەمىز. ەكولوگيالىق كۇردەلى پروبلەمالارى بار قازاقستاننىڭ ءاربىر ءىرى قالاسىندا بارلىق قوعامشىلداردى جول كارتالارىن تالقىلاۋعا تارتامىز. وسىنداي جول كارتاسىن قاراعاندى وبلىسى بويىنشا دا، سونىڭ ىشىندە تەمىرتاۋ بويىنشا دا دايىنداۋدى جوسپارلاپ وتىرمىز. قالانىڭ بارلىق جاناشىرلارىن ازاماتتارى مەن قوعام قايراتكەرلەرىن كاسىپورىنداردىڭ ءوڭىردىڭ قورشاعان ورتاسىن قورعاۋ جونىندەگى ءوز مىندەتتەمەلەرىن ورىنداۋىن باقىلاۋعا قاتىسۋعا شاقىرامىز، – دەپ اتاپ ءوتتى ماعزۇم مىرزاعاليەۆ.

سوڭعى جاڭالىقتار

ۇقساس جاڭالىقتار