وڭتۇستىك قازاقستان • 31 شىلدە، 2020

مۇرات ايتەنوۆ قۇربان ايتپەن قۇتتىقتادى

43 رەت كورسەتىلدى

شىمكەنت قالاسىنىڭ اكىمى مۇرات ايتەنوۆ قۇربان ايت مەرەكەسىمەن قۇتتىقتادى، دەپ حابارلايدى Egemen.kz

قۇرمەتتى شىمكەنت قالاسىننىڭ تۇرعىندارى!

بارشاڭىزدى مۇسىلمان قاۋىمى ءۇشىن ەڭ ۇلىق مەيرام -- قۇربان ايت مەرەكەسىمەن قۇتتىقتايمىن!

قۇربان ايت – ءبىر-بىرىمىزگە دەگەن مەيىرىمىمىزدى وياتاتىن، مۇقتاج جاندارعا قايىرىمدىلىق جاساۋعا جول اشاتىن ىزگى مەرەكە.

بيىل شىمكەنت قالاسى ءۇشىن ماڭىزدى وقيعالارعا تولى جىل. اتاپ ايتقاندا، بيىل  شىمكەنتتىڭ 2200 جىلدىق مەرەيتويى يۋنەسكو كولەمىندە اتاپ وتىلۋدە. وعان قوسا، بيىل سۇيىكتى قالامىز تمد ەلدەرىنىڭ مادەني استاناسى اتانعانى بەلگىلى. الايدا، الەمدى جايلاعان پاندەميا، وكىنىشكە قاراي، بارشامىزدى قالىپتى تىرشىلىگىمىزدەن اجىراتتى. مەرەيتويلار مەن ءىس-شارالاردى ونلاين رەجيمدە وتكىزۋگە ءماجبۇر بولىپ وتىرمىز.

حالقىمىزدا "وتاندى ءسۇيۋ – يماننان" دەگەن ۇلاعاتتى ءسوز بار.

بۇگىنگى كۇردەلى كەزەڭدە وسى قاعيدانى ويدان شىعارماي، تۋعان ەلدىڭ يگىلىگى ءۇشىن ايانباي ەڭبەك ەتىپ جاتقان ءاربىر ازاماتتىڭ بويىندا جاراتقانعا دەگەن سۇيىسپەنشىلىكتىڭ زور ەكەنى ءشۇباسىز.

جەر بەتىن ىندەت جايلاعان قيىن ساتتە كۇللى قازاق جۇرتشىلىعى ناۋقاستار مەن مۇقتاج جاندارعا قولداۋ كورسەتىپ، سۇيەۋ بولا ءبىلدى. قازىر مەملەكەت تاراپىنان قاجەتتى شارالار مەن الەۋمەتتىك كومەكتەر دەر كەزىندە كورسەتىلىپ جاتىر. ەل بىرلىگى مەن ىنتىماعىنىڭ  ارقاسىندا قيىن كەزەڭدەردى ارتتا قالدىرارىمىزعا سەنىمدىمىز.

مىنە، مۇنىڭ بارلىعى قايىرىمدىلىقتى بارىنەن بيىك قوياتىن مەملەكەتىمىز بەن حالقىمىزدىڭ بىرتۇتاستىعىنىڭ ارقاسىندا جۇزەگە اسۋدا. بۇل سىناقتار جاساعان جاقسىلىقتارىنىڭ وتەۋىن اللادان عانا كۇتەتىن قايىرىمدى جانداردىڭ ارامىزدا كوپ ەكەندىگىن كورسەتتى.

بەيبىتشىلىكتى، تۇراقتىلىقتى، تاتۋلىقتى تۋ ەتىپ، الەمدىك قاۋىمداستىقتىڭ وڭ باعاسىن العان قازاقستان ءۇشىن ەڭ باستى بايلىق – بىرلىك پەن تىنىشتىق. دەمەك، بىرلىكتى بەكەمدەي تۇسەتىن بۇل مەرەكەنىڭ ماڭىزى زور.

 

قۇرمەتتى شىمكەنتتىكتەر!

قۇربان ايت – اسىل ءدىنىمىز يسلامداعى ەكى ۇلىق مەرەكەنىڭ ءبىرى. ايتۋلى كۇندە مۇسىلمان قاۋىمى قۇداي جولىندا قۇربان شالىپ، قاناعات پەن قايىرىمدىلىقتىڭ، مەيىرىمدىلىك پەن ىزگىلىكتىڭ رياسىز ۇلگىسىن كورسەتىپ، كومەككە مۇقتاج جانداردىڭ باتا-تىلەگىن الىپ، العىسىنا بولەنەدى.

باعزى زاماننان بەرى يسلام ءدىنىن رۋحاني تىرەگىنە اينالدىرعان حالقىمىز قۇربان ايتتى ايرىقشا دايىندىقپەن قارسى الادى. ۇلىق مەيرامدا ەرەكشە ىجداھات ءھام ىقىلاسپەن ورىندالاتىن قۇلشىلىقتار مەن ىزگى ءىس-شارالار ۇرپاقتان-ۇرپاققا جالعاسىپ، يگى داستۇرگە اينالعان.

قاسيەتتى قۇربان ايت – جاراتقانعا جاقسى امالدارمەن جاقىنداي تۇسۋگە مۇمكىندىك تۋعىزار تاعلىمى مول مەرەكە. ەندەشە، وسى كۇنى  قاجەتى ءۇشىن قايىرىمدى ءىس اتقارۋعا اسىعايىق.

ەلدەگى ەپيدەميالىق جاعدايعا بايلانىستى قمدب-نىڭ ماقۇلداۋىمەن بيىل قۇرباندىق شالۋ ءراسىمىن ونلاين رەجيمدە ورىندايمىز. بارشاڭىزدى تۇسىنىستىك تانىتىپ، كارانتين ءتارتىبىن قاتاڭ ساقتاۋعا شاقىرامىن!

شالعان قۇرباندىقتارىڭىز بەن قۇلشىلىقتارىڭىز قابىل بولىپ،  ارماندارىڭىز ورىندالسىن. 

قازاقستانىمىز ماڭگى جاساپ، شىرايلى شىمكەنت تۇرلەنە بەرسىن!

سوڭعى جاڭالىقتار

ۇقساس جاڭالىقتار