رۋحانيات • 31 شىلدە، 2020

باس ءمۇفتي قۇربان ايتپەن قۇتتىقتادى

31 رەت كورسەتىلدى

قازاقستان مۇسىلماندارى ءدىني باسقارماسىنىڭ توراعاسى، باس ءمۇفتي ناۋرىزباي قاجى تاعان ۇلى بارشا مۇسىلمان قاۋىمدى قۇربان ايت مەرەكەسىمەن قۇتتىقتادى، دەپ حابارلايدى Egemen.kz

اسا قامقور، ەرەكشە مەيىرىمدى اللانىڭ اتىمەن باستايمىن!

 

قادىرلى قاۋىم!

بارشاڭىزدى كۇللى ءيسى مۇسىلمان بالاسى اسىعا كۇتەتىن ۇلىق مەيرام – قۇربان ايتپەن شىن جۇرەكتەن قۇتتىقتايمىن! ايتتارىڭىز قابىل بولسىن! سىزدەرگە اللادان اماندىق، مىقتى ساۋلىق، مول ىرىس پەن باق-بەرەكە تىلەيمىن!

قۇربان ايت – اسىل ءدىنىمىز يسلامداعى ەكى ۇلىق مەرەكەنىڭ ءبىرى. ايتۋلى كۇندە مۇسىلمان قاۋىمى قۇداي جولىندا قۇربان شالىپ، قاناعات پەن قايىرىمدىلىقتىڭ، مەيىرىمدىلىك پەن ىزگىلىكتىڭ رياسىز ۇلگىسىن كورسەتىپ، كومەككە مۇقتاج جانداردىڭ باتا-تىلەگىن الىپ، العىسىنا بولەنەدى.

باعزى زاماننان بەرى يسلام ءدىنىن رۋحاني تىرەگىنە اينالدىرعان حالقىمىز قۇربان ايتتى ايرىقشا دايىندىقپەن قارسى الادى. ۇلىق مەيرامدا ەرەكشە ىجداھات ءھام ىقىلاسپەن ورىندالاتىن قۇلشىلىقتار مەن ىزگى ءىس-شارالار ۇرپاقتان-ۇرپاققا جالعاسىپ، يگى داستۇرگە اينالدى.

"قۇربان" ءسوزى "جاقىن بولۋ"، "جاقىنداۋ" دەگەن ۇعىمدى بىلدىرەدى. بۇل – شىنايى نيەت پەن اللاعا دەگەن سۇيىسپەنشىلىكتى پاش ەتەتىن مەيرام. ۇلىق مەرەكەنىڭ تاربيەلىك ءمانى مەن ماعىناسى وسىندا جاتىر. قاسيەتتى قۇراندا: "ۇمىتپاڭدار، ولاردىڭ ەتى دە، قانى دا ەشقاشان اللاعا جەتپەيدى. وعان جەتەتىن نارسە – جۇرەكتەرىڭىزگە ۇيالاعان تاقۋالىقتارىڭ (شىنايى نيەتتەرىڭ)" ("حاج" سۇرەسى، 37-ايات)، – دەلىنگەن. اياتتا ايتىلعانداي، قۇداي جولىندا جاقسىلىق جاساۋعا نيەتتەنگەن پەندە بۇل امالدى رياسىز ويمەن ورىندايدى.

ماتەريالدىق مۇمكىندىگى بار، ءəرى جولاۋشى ەمەس مۇسىلمانعا قۇرباندىق شالۋ – ءۋəجىپ، مۇسىلماندىق مىندەت. ال شاماسى كەلمەگەن ادامعا اللا تاعالا مۇنداي مىندەت جۇكتەمەگەن. ايت كۇندەرى از دا بولسا ساداقا بەرىپ، قاراۋسىز قالعان قارتتارعا، جەتىمدەر مەن كوپبالالى وتباسىلارعا كوڭىل ءبولۋ – ساۋاپتى ءىس.

 

قۇرمەتتى وتانداستار!

وكىنىشكە قاراي، الەمدەگى جانە ەلدەگى جاعدايعا بايلانىستى قۇربان ايتتى ءوز دارەجەسىندە اتاپ ءوتىپ، جاماعاتپەن قۇلشىلىق جاساي المايمىز. اللانىڭ اماناتى بولعان ءومىرىمىز بەن دەنساۋلىعىمىزدى ساقتاۋ – مۇسىلماندىق مىندەتىمىز. الايدا ساۋاپ ىزدەگەن ادام ءۇشىن جاقسىلىقتىڭ ەسىكتەرى قاشان دا اشىق. ءبىز وسى رەتتە قۇربان شالۋ شارالارىن قاشىقتىقتان جۇزەگە اسىرۋدى قولعا الدىق.

قۇربان ايتتىڭ تاريحىنا تەرەڭ بويلاساق، اللا تاعالا يبراھيم پايعامبارعا (وعان اللانىڭ سالەمى بولسىن) سىناق جىبەرگەننەن كەيىن ونى ءسۇيىنشى حابارمەن قۋانتقان. بۇل تۋرالى قۇراندا باياندالعان: "...بۇل ناعىز اشىق سىناق ەدى. ءبىز ونىڭ ورنىنا ۇلكەن قۇرباندىق (ۇجىماق قوشقارىن) اۋىستىردىق. ءبىز وعان سوڭعىلار ىشىندە "يبراحيمگە سالەم!" دەگەن العىس قالدىردىق. ءبىز جاقسىلاردى وسىلاي سىيلايمىز. ويتكەنى، ول يماندى پەندەلەرىمىزدەن ەدى" ("ساففات" سۇرەسى، 106-111-اياتتار).

اسا مەيىرىمدى، ەرەكشە كەڭشىلىك يەسى راببىمىز وسى سىناقتى تەزىرەك جاقسىلىققا الماستىرعاي. شالعان قۇرباندىق، بەرگەن ساداقا، جاساعان ءاربىر يگى امالدىڭ ساۋابى ەسەلەنىپ جازىلعاي.

اللا تاعالا جەر بەتىن جۇقپالى دەرتتەن تازارتىپ، جاقسىلىعى مەن بەرەكەتىن جاۋدىرعاي. قاۋىپتى ىندەتتەن قايتىس بولعانداردى مەيىرىمىنە بولەپ، ناۋقاس جاندارعا شيپاسىن بەرگەي. ەلىمىز امان، جۇرتىمىز تىنىش بولعاي.

مەشىتتەرىمىز اشىلىپ، جاماعاتپەن قۇلشىلىق جاسايتىن كۇندى جاقىن ەتىپ، قالىپتى ءومىر تىرشىلىگىنە قايتا ورالۋدى جازعاي! ءامين!

سوڭعى جاڭالىقتار

قحل: ۆيزا بەرمەي جاتىر

حوككەي • بۇگىن، 15:18

COVID-19 ادامنان يتكە جۇققان

كوروناۆيرۋس • بۇگىن، 14:15

قيىن كەزەڭ ارتتا قالدى - مينيستر

قازاقستان • بۇگىن، 11:14

جىراقتا وتكەن جيىرما جىل

وقيعا • بۇگىن، 08:16

وليمپيادا رەيتينگى جاڭاردى

سپورت • بۇگىن، 07:52

3ZHAŃAÁDET چەللەندجى

قوعام • بۇگىن، 07:42

ءومىردىڭ جالىنان ۇستاعان...

رۋحانيات • بۇگىن، 07:39

احاڭدى الاڭداتقان حلۋدوۆ

تانىم • بۇگىن، 07:35

ۇقساس جاڭالىقتار