كۇدىكتى رەتىندە ۇستالعان ازەربايجان ازاماتى ورحان زەينالوۆ قازاننىڭ 10-ى كۇنى ماسكەۋدىڭ باتىس بيريۋلەۆو اۋدانىندا ەگور ششەرباكوۆ ولتىرىلگەن كەزدە ءوزىنىڭ مۇلدەم باسقا جاقتا جۇرگەنىن ايتىپ, ونىڭ قازاسىنا قاتىسى جوق ەكەنىن ءبىلدىردى. بۇل تۋرالى «ترۋد» گازەتى جازدى.
«ول وزىنە تاعىلعان ايىپتان ءۇزىلدى-كەسىلدى باس تارتىپ وتىر», - دەلىنگەن اقپاردا.
«ەگەر بۇرىن زەينالوۆ تەرگەۋ كەزىندە قازاننىڭ 9-ىنان 10-نا قاراعان ءتۇنى ششەرباكوۆتى پىشاقپەن ۇرعانىن, بىراق ونى ءولتىرۋ نيەتىندە بولماعانىن ايتىپ كەلسە, قازىر ەندى ەشكىمدى دە ولتىرمەدىم, مەن ول جەردە بولعان جوقپىن دەپ وتىر», - دەدى تەرگەۋ كوميتەتىنىڭ وكىلى ۆلاديمير ماركين.
ايتا كەتەيىك, تەرگەۋدىڭ مالىمەتى بويىنشا, زەينالوۆ ششەرباكوۆتى ءجۇرىپ جۇرگەن قىزىنىڭ كوزىنشە پىشاقپەن ۇرعان. ال كۋاگەر قىزدىڭ ونى تانىدى ما, جوق پا, ول جاعى ايتىلمايدى.
ساكەن مايلىباي.
