قازاق بەينەلەۋ ونەرىنىڭ جارقىن قۇبىلىسى بولعان قاستەەۆتى بالا جاسىنان قاستەرلەپ وسكەن ول تۋعان ەلى مەن وسكەن جەرىن پەرزەنتتىك ماحابباتپەن جىرلايدى. ەلىمىزدىڭ تاريحي دامۋ جولىنداعى سان-سالالى وزگەرىستەرگە سۋرەتكەر زەردەسىمەن كوز سالىپ, وتكەن مەن بۇگىندى بەدەرلەگەن كوركەم شەجىرە ىسپەتتى تالاي تۋىندىنى ومىرگە اكەلدى. قۇرمانعازى اقاشەۆتىڭ كەيىنگى جازىلعان جۇمىستارىنىڭ قاتارىنداعى شوقتىعى بيىك تۋىندىسىنىڭ ءبىرى «ول جاساعان تاريح» كارتيناسى. مۇندا ەل استاناسىن الماتىدان اقمولاعا كوشىرۋ تۋرالى باتىل دا بىرەگەي شەشىمنىڭ ەل بىرلىگى مەن دامۋىنىڭ سيمۆولىنا اينالعانىن كورسەتەتىن تاريحي ءسات كورىنىس تاپقان. تۇڭعىش پرەزيدەنت نۇرسۇلتان نازارباەۆ پەن استانانىڭ العاشقى باس جوسپارىن جاساعان ساۋلەتشى كيسە كۋروكاۆا ەۋرازيانىڭ جۇرەگىنە اينالار ارمان قالانىڭ كەلەشەك كەلبەتىن باعامداپ, سارى جازىق اتىراپتى قيال كوكجيەگىندە ۇشتاستىرا اڭگىمەلەسىپ كەلەدى. ءيا, سۋرەتشى وسىناۋ تاعدىرلى دا تاعىلىمدى ءساتتى جەتكىزۋ جايىن كوپ ويلاندى. ۇلكەن كەنەپتەگى سوڭعى شەشىمگە توقتاماستان بۇرىن, ونداعان ۇلگىنى سىزىپ, تاستاي بەردى. بەلگىلى ونەرتانۋشى گالينا پوۆالياشكو قۇرمانعازى اقاشەۆتىڭ تاريحي كەڭ اۋقىمدى تۋىندىلارىمەن تانىلىپ, تاقىرىپ سىرىن تەرەڭ مەڭگەرگەن ونەر يەسى ەكەنىن ايتادى.
– سۋرەتشى ءۇشىن تاريحي وقيعالاردى ءتۇسىرۋ, ءتۇرلى بەينەلەر مەن ءداۋىر رۋحىن جەتكىزۋ وتە ماڭىزدى. قۇرمانعازى اقاشەۆ ءوزىنىڭ كاسىبي شەبەرلىگىمەن جانە سيۋجەتتىك بەينەسىنىڭ تەرەڭدىگىمەن تانىمال. وتە قاراپايىم كورىنەتىن كومپوزيتسيادا وي, جىگەر, ارمانداۋ, جەڭىسكە جەتۋ رۋحى ەرەكشە كوركەم جەتكىزىلگەن. كوركەم كونتسەپتسياعا سايكەس كەلەتىن كولوريستيكالىق شەشىم بار. كوپتەگەن نازىك ءتۇستى نيۋانستارعا قانىق تۇستەر تابيعي ۇيلەسە كەتكەن. بۇگىندە قالا بارلىق قازاقستاندىقتىڭ ماقتانىشىنا اينالدى, تاۋەلسىزدىك پەن بولاشاقتىڭ نىشانى ىسپەتتى. ال قۇرمانعازى اقاشەۆتىڭ كەرەمەت ەڭبەگى وسى ءبىر جۇزەگە اسقان ارماننىڭ كوركەم دالەلى ەمەس پە؟! سۋرەتشى ءتۇرلى جانرداعى كارتينالار جازدى, ولار وتىز جىل بويى كورەرمەندەردىڭ, ونەرتانۋشىلاردىڭ جانە ارىپتەستەرىنىڭ نازارىن اۋدارىپ كەلدى, – دەيدى گالينا پوۆالياشكو.
زەڭگىر اسپان, كۇزدىڭ قوڭىرقاي تارتقان جاۋىندى جىلى كۇنى توڭىرەككە تىنىشتىق سىيلاپ, ماڭايدان جاڭبىردىڭ, سىزدىڭ ءيىسى اڭقيتىنداي. ال ەندى باستالعان قۇرىلىستىڭ الىستان تالىپ جەتكەن دىبىسى بىرتە-بىرتە كۇشەيە كەلىپ, سان الۋان بوياۋمەن تۇتاستىق تاپقان. حالىق تاريحىنا بايىپتى, زەرتتەي قاراعان سۋرەتشى شىعارماشىلىعىنا قاشاندا كەڭدىك پەن تەرەڭدىك ءتان. «اڭگىمە», «جايلاۋدا», «كەرۋەن», «كوش», «سارجايلاۋ» كارتينالارى سونى دالەلدەيدى.
– تاقىرىپتىق جۇمىسپەن وقۋدى بىتىرگەن سوڭ اينالىسا باستادىم. ەڭ العاشقى جۇمىسىم «اڭگىمە» دەپ اتالادى. ابستراكتسيا, يا بولماسا سيۋررەاليستىك جۇمىس بولسىن, ونىڭ وزەگىندە يدەيا جاتۋ كەرەك. ناتۋرامەن جۇمىس ىستەگەننەن كەيىن ادام جاتتىعادى. قازىر كەز كەلگەن تاقىرىپتى بىردەن باستاپ, بىردەن اياقتايمىن, – دەيدى سۋرەتشى باسپاسوزگە بەرگەن سۇحباتىندا. حالقىمىزدىڭ سەنىمى مەن تاعدىر-تالايىنىڭ نىشانىنا اينالعان استانا تاريحى جونىنەن سىر شەرتەر تۋىندىلار از جازىلعان جوق. «ول جاساعان تاريح» كارتيناسى كوز الدىمىزدا وزگەرىپ, بوي كوتەرگەن, كوركەيگەن استانانىڭ قۋانىشىنا سۇيىنگەن, سۇيسىنگەن حالىق تولقىنىسىن بەرە بىلۋىمەن قۇندى.
قۇرمانعازى اقاشەۆ – سۋرەتشىلەر وداعىنىڭ مۇشەسى. 1964 جىلى الماتى وبلىسى قاپال اۋدانىندا دۇنيەگە كەلگەن. اباي اتىنداعى قازاق مەملەكەتتىك پەداگوگيكالىق ۋنيۆەرسيتەتىن تامامداعان. 1992 جىلدان باستاپ كوپتەگەن حالىقارالىق بايقاۋلار مەن سيمپوزيۋمدارعا قاتىسىپ كەلەدى. 2007 جىلى تۇركيانىڭ ىستانبۇل قالاسىندا, 2009 جىلى ءا.قاستەەۆ اتىنداعى مەملەكەتتىك مۋزەيدە, 2010 جىلى استانا قالاسىندا جەكە كورمەلەرى ۇيىمداستىرىلدى. قازىرگى تاڭدا اباي اتىنداعى قازاق ۇلتتىق پەداگوگيكالىق ۋنيۆەرسيتەتى كوركەمسۋرەت فاكۋلتەتىنىڭ وقىتۋشىسى بولىپ قىزمەت ەتەدى.
