2020 جىلدىڭ ءبىرىنشى جارتىجىلدىعىنىڭ قورىتىندىسى بويىنشا قازاقستاننىڭ شوعىرلاندىرىلعان بيۋدجەتىنىڭ (شب) كىرىستەرى 7 538 ملرد تەڭگەنى قۇرادى, بۇل وتكەن جىلدىڭ سايكەس كەزەڭىمەن سالىستىرعاندا 19,3% - عا جوعارى. شب شىعىستارى 23,7% - عا 7 399 ملرد تەڭگەگە دەيىن ۇلعايدى. بۇل رەتتە شب اعىمداعى جىلدىڭ ءبىرىنشى جارتىجىلدىعىندا بيۋدجەتتىك كرەديت بەرۋدى (-214,5 ملرد تەڭگە) جانە قارجى اكتيۆتەرىمەن جاسالاتىن وپەراتسيالاردى (-264,9 ملرد تەڭگە) ەسكەرە وتىرىپ, 343,3 ملرد تەڭگە تاپشىلىعىمەن قالىپتاسقان.
سونىمەن قاتار, وسى جىلى شب كىرىسىنىڭ ارتۋى نەگىزىنەن ۇلتتىق قوردى باسقارۋدان تۇسەتىن تابىستىڭ وسۋىنە بايلانىستى, ول 2020 جىلدىڭ ءبىرىنشى توقسانىندا 2019 جىلدىڭ العاشقى ءۇش ايىندا 405,6 ملرد تەڭگە كىرىسكە قاراعاندا 2 559 ملرد تەڭگەنى قۇرادى. ايتا كەتۋ كەرەك, بۇل ساندار تىركەلگەن كىرىس ەمەس, تەك ءبىر ساتتە تەڭگەدەگى ينۆەستيتسيالار قۇنىنىڭ وزگەرۋىن كورسەتەدى. سونداي-اق, 2020 جىلدىڭ ءبىرىنشى توقسانىندا وسىنداي ەلەۋلى ينۆەستيتسيالىق تابىس تەڭگە قۇنىنىڭ كۇرت تومەندەۋىمەن بايلانىستى بولعانىن اتاپ وتەمىز. ەستەرىڭىزگە سالا كەتەيىك, USDKZT باعامى اعىمداعى جىلدىڭ قاڭتار-ناۋرىز ايلارىندا 17% - عا, ءبىر دوللار ءۇشىن 382,6 تەڭگەدەن 447,7 تەڭگەگە دەيىن ءوستى, - دەلىنگەن حابارلامادا.
