ايماقتار • 29 شىلدە، 2020

دەرەكتەر نەگىزىندە جەدەل شەشىمدەر قابىلداۋ: الماتى تاجىريبەسى

6 رەت كورسەتىلدى

بۇل جونىندە وڭىرلىك كوممۋنيكاتسيالار قىزمەتىنىڭ الاڭىندا وتكەن ونلاين بريفينگ بارىسىندا تسيفرلاندىرۋ باسقارماسىنىڭ باسشىسى بايان قوڭىرباەۆ ايتىپ بەردى، - دەپ حابارلايدى Egemen.kz.

2020 جىلدىڭ مامىر ايىنان باستاپ الماتى قالاسىنىڭ تسيفرلاندىرۋ باسقارماسى Tele2/Altel، Beeline، كازاقتەلەكوم ءموبيلدى وپەراتورلارىمەن بىرلەسىپ پاندەميا كەزىندە قالانى تالداۋ جۇيەسىنىڭ جوباسىن ىسكە قوسقان بولاتىن. جۇيە كومەگىمەن قالا بويىنشا ادامدار جينالاتىن ورىندار مەن ۋاقىت باقىلانىپ وتىردى. كارتا كورونوۆيرۋستىق ينفەكتسيانىڭ (كۆي) تارالۋىنا قارسى ءىس-قيمىل بويىنشا جەدەل شەشىمدەر قابىلداۋعا كومەكتەسە وتىرىپ، الماتى قالاسىنىڭ ۆەدومستۆوارالىق كوميسسياسىنىڭ شتابىندا جۇمىس ىستەيدى.

 بۇل جۇيەدەگى مالىمەتتەر 'near real time' رەجيمى ارقىلى ءار ساعاتتا 500ح500 مەتر گەوالاڭداردا جاڭارتىلىپ وتىرادى. بۇل ادامداردىڭ ءۇي ايماعىنداعى قوزعالىسىن تىركەۋگە جانە ەڭ كوپ جينالۋ ورىندارىن انىقتاۋعا مۇمكىندىك بەرمەك.

ءۇي ايماعىنان تىس نەمەسە شىعىپ كەتەتىن ابونەنتتەردىڭ سانىن انىقتاۋ ءۇشىن، ءۇي ايماعىنان 1 كيلومەتردەن استام قاشىقتىققا الىپ تاستاۋ كريتەريى قولدانىلادى. بۇل رەتتە اگرەگاتتا قانداي دا ءبىر دەربەس دەرەكتەر جوق. دەرەكتەردى ۇيالى بايلانىس وپەراتورلارى يەسىن انىقتاماعان كۇيدە، دەربەس دەرەكتەرسىز سەكتورلار بويىنشا ستاتيستيكا فورماتىندا ۇسىنادى.

 "قالا بويىنشا بوستاندىق، المالى جانە مەدەۋ اۋداندارىندا ادامداردىڭ ەڭ كوپ شوعىرلانۋى، ورىن اۋىستىرۋى بايقالعان. ال كۇندىزگى ۋاقىتتا ناۋرىزباي اۋدانى ەڭ تومەن بەلسەندىلىكتى كورسەتكەن. ەڭ كوپ بەلسەندىلىك كۇندىزگى ۋاقىتتا جۇمىس كۇندەرى 12:00-دەن 15:00-گە دەيىن، جەكەلەي العاندا، اربات جانە "كوك بازار"، "باراحولكا" بازارلارىنا ىرگەلەس اۋماقتار مەن روزىباكيەۆ-رايىمبەك، سونىمەن بىرگە، قالالىق اۋرۋحانالار اۋماقتارىندا بايقالادى. وسى مالىمەتتەر نەگىزىندە، ۆەدومستۆوارالىق كوميسسيا نەعۇرلىم بەلسەندى اۋدانداردا دەزينفەكتسيانى كۇشەيتتى. كۆي تارالۋىنا قارسى باسقا شارالار قابىلدانۋدا"، دەيدى قوڭىرباەۆ.

جۇيە، سونداي-اق، 103، 1308، 1406 نومىرلەرىنە شالىنعان قوڭىراۋ جيىلىگىن تالداۋمەن اينالىسادى. قوڭىراۋلاردىڭ ەڭ كوپ سانى - كۇنىنە ەكى مىڭنان التى مىڭعا دەيىن 103 جەدەل جاردەم نومىرىنە تۇسەدى. سونىمەن قاتار، 103 قىزمەتىنە قوڭىراۋدىڭ جيىلىگى جانە 4-8 كۇننەن كەيىن كۆي اۋرۋى بويىنشا تىركەلگەن جاعدايلاردىڭ ءوسۋى بايقالادى. بۇل كۆي-مەن اۋىراتىن ناۋقاستار ءۇشىن توسەكتەردىڭ ءبولىنۋى مەن تاراتىلۋىن تياناقتى جوسپارلاۋعا مۇمكىندىك بەرەدى.

شىلدە ايىنىڭ ورتاسىنان باستاپ سوڭعى تالداۋلارعا كۆي جۇقتىرۋدىڭ بەلسەندى وشاقتارى، بەينەباقىلاۋ كامەرالارى ارقىلى كولىكتىڭ كىرۋ-شىعۋ، قالا ماڭىنداعى باعىتتارداعى جولاۋشىلار اعىنى بويىنشا "الماتى قالاسىنىڭ كولىك حولدينگىنىڭ" دەرەكتەرى قوسىلدى. جيناقتالعان دەرەكتەر وتكەن اپتامەن سالىستىرعاندا گەوايماقتاعى بەلسەندىلىكتىڭ وسۋ/تومەندەۋ پايىزىن انىقتاۋعا; زاڭدىلىقتاردى كورۋ جانە قابىلدانعان كارانتيندىك رەتتەۋ شارالارىن تالداۋعا مۇمكىندىك بەرەدى.

جوبا ءالى دە دامۋ ۇستىندە. تامىز ايىندا الماتى وبلىسى تۇرعىندارىنىڭ قالاعا كوشۋ، كەلۋ سانىن انىقتاۋ، ياعني قايدان، قانداي كولەمدە، قالا بويىنشا قوزعالىس باعىتتارى جانە شوعىرلانۋ ورىندارى بويىنشا ۇيالى بايلانىس وپەراتورلارىنىڭ دەرەكتەرىنە قوسىمشا تالداۋ جۇرگىزۋ جۇزەگە اسىرىلادى. ۋاقىت وتە كەلە باسقا دا مالىمەتتەر ينتەگراتسيالانادى، ال جيناقتالعان ساراپتاۋ قالانىڭ ءتارتىبىن جاقسىراق تۇسىنۋگە مۇمكىندىك بەرىپ، پاندەميانى رەتتەۋدە قابىلدانعان شارالاردان ساباق الىپ، مالىمەتتەر نەگىزىندە جاڭا جۇيەلىك شەشىمدەر قابىلداۋعا مۇمكىندىك بەرەدى.

سوڭعى جاڭالىقتار

شىعىسقا قار ءتۇستى

ايماقتار • كەشە

ۇقساس جاڭالىقتار