بايقاۋدىڭ وڭىرلىك كەزەڭىندەگى سىنىنا قاتىسۋعا بارلىعى 12 مەملەكەتتىك قىزمەتشى قۇجات تاپسىرعان بولاتىن. ۇمىتكەرلەر اراسىندا "مەن نەگە "ۇزدىك اۋىل اكىمى" اتاعىنا لايىقپىن" تاقىرىبىنداعى ەسسەسى, اۋىلدى دامىتۋ بويىنشا ۇسىنعان جوبالىق جۇمىسى جانە اڭگىمەلەسۋ بارىسىنداعى جەكە باس قاسيەتتەرى ۇزدىك دەپ تانىلعان سامات مەيىرمانوۆ بايقاۋدىڭ وڭىرلىك دەڭگەيىندە جەڭىسكە جەتىپ, رەسپۋبليكالىق كەزەڭگە جولداما الدى.
"مەملەكەتتىك قىزمەتتە مەن 2014 جىلدان بەرى جۇمىس ىستەپ كەلەمىن. ال مۇنداي بايقاۋعا العاش رەت قاتىسىپ وتىرمىن. اۋدانداعى اۋىلداردىڭ كوبىندە باسسەين جوق, ال بىزدە ول بۇرىن بولعان. مەن ۇسىنعان جوبا – باسسەيندى قالپىنا كەلتىرۋ بولدى. سونداي-اق, جەرگىلىكتى مادەنيەت ءۇيى عيماراتىنىڭ بوس تۇرعان ەكىنشى جارتىسىن دەنە شىنىقتىرۋ-ساۋىقتىرۋ كەشەنى ەتىپ جابدىقتاۋ ويدا بار. قازىر مەن رەسپۋبليكالىق كەزەڭگە دايىندالىپ ءجۇرمىن. 15 تامىزعا دەيىن ءبارىن جاساپ ۇلگەرۋ كەرەك. ال بايقاۋدىڭ ناتيجەلەرى 20 قىركۇيەكتە بەلگىلى بولادى", – دەيدى توپ جارعان اكىم.
ەسكە سالار بولساق, وبلىستىق جانە رەسپۋبليكالىق كەزەڭنەن تۇراتىن "ۇزدىك اۋىل اكىمى" بايقاۋى 25 مامىردا باستالعان بولاتىن. ەندى وڭىرلىك دەڭگەيدە ۇزدىك شىققان جەڭىمپازدار الداعى تامىز ايىندا وتەتىن شەشۋشى تۋردا باق سىنايتىن بولادى.
