جەدەل-ىزدەستىرۋ ءىس-شارالارى بارىسىندا تۇركىستان وبلىسى پد ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرى تۇلكىباس اپب-ءنىڭ پوليتسيا قىزمەتكەرلەرىمەن بىرلەسىپ, كەزەكتى قاراسورا ەگىستىگىن جويدى. ماسەلەن, پوليتسەيلەر تۇلكىباس اۋدانى تۇرعىنىنىڭ ءۇيىنىڭ باقشاسىنان قۇرامىندا ەسىرتكى زاتى بار التى ءتۇپ وسىمدىك تاپقان. وعان قوسا ءتىنتۋ كەزىندە جەدەل ۋاكىلدەر, كۇدىكتىدەن وسىمدىك تەكتەس ەرەكشە ءيىسى بار ءۇش وراما زاتتى تاركىلەدى.
ايعاقتى زات رەتىندە الىنعان ەسىرتكى تۇپتەرى مەن ورامالار ساراپتاماعا جىبەرىلدى. قورىتىندىعا سايكەس, قۇرامىندا ەسىرتكىسى بار وسىمدىكتىڭ تۇپتەرى "قاراسورا" بولىپ شىقتى, ال ورامالاردا "كەپتىرىلگەن ماريحۋانا" ساقتالعان. تاركىلەنگەن ەسىرتكى زاتتارىنىڭ جالپى سالماعى 70 گر استى.
اتالعان جايت سدتتبت-عاعا قر قك-ءنىڭ ەكى بابى بويىنشا تىركەلدى: 300-باپ "قۇرامىندا ەسىرتكى زاتتارى بار وسىرۋگە تىيىم سالىنعان وسىمدىكتەردى زاڭسىز ءوسىرۋ" جانە 296-باپ "وتكىزۋ ماقساتىنسىز ەسىرتكى قۇرالدارىمەن, پسيحوتروپتىق زاتتارمەن, ولاردىڭ انالوگتارىمەن زاڭسىز جۇمىس ىستەۋ". پوليتسيا قىزمەتكەرلەرى ەر ادامنىڭ ۇيىندە ەسىرتكى زاتى بار وسىمدىكتەردى قانداي ماقساتتا وسىرگەنىن جانە قانداي ماقساتتا ساقتاعانىن انىقتاۋدا.
ال, ماقتاارال اۋدانىندا ءتارتىپ ساقشىلارى جەرگىلىكتى تۇرعىنعا ەسىرتكى ساتقان كۇدىكتىنى ۇستادى. جەدەل-ىزدەستىرۋ ءىس-شارالارىنىڭ ناتيجەسىندە ماقتاارال اپب-ءنىڭ پوليتسەيلەرى اۋىل تۇرعىندارىنىڭ بىرىنە بەس مىڭ تەڭگەگە ىشىندە ەسىرتكىسى بار سىرىڭكە قوراپشاسىن ساتقان ەر ادامدى قۇرىقتادى. ايعاقتى زات رەتىندە جەدەل ۋاكىلدەر سىرىڭكە قورابىن الىپ, ساراپتاماعا جىبەردى. ساراپتاماعا سايكەس, تاركىلەنگەن ەسىرتكى زاتىنىڭ سالماعى ءۇش گرامم ماريحۋانانى قۇرادى.
قازىرگى ۋاقىتتا كۇدىكتىگە قاتىستى قر قك-ءنىڭ 297-بابى "ەسىرتكى, پسيحوتروپتىق زاتتاردى, سول تەكتەستەردى وتكىزۋ ماقساتىندا زاڭسىز دايىنداۋ, وڭدەۋ, ساتىپ الۋ, ساقتاۋ, تاسىمالداۋ, جونەلتۋ نەمەسە ساتۋ" بويىنشا سوتقا دەيىنگى تەرگەۋ امالدارى جۇرگىزىلۋدە.
