"قازىردىڭ وزىندە بىزگە ۇلتتىق پارك جۇمىسىنا شاعىمدانىپ, ەسكەرتۋ ايتىپ جاتقاندار بار. ءاربىر قوڭىراۋ بويىنشا تەكسەرىس جۇرگىزىلىپ, كەمشىلىك تۇزەتىلەدى. ماسەلەن, ءبىر حابارلاما بويىنشا جەدەل شارا قابىلدانىپ, زاڭ بۇزۋشىلىق جويىلدى. ۇلتتىق پاركتەردەگى جاعدايدى بىرگە وزگەرتەيىك. تەك بىرىككەندە وزىق ناتيجەلەرگە قول جەتكىزە الامىز", - دەدى ەكولوگيا ءمينيسترى ماعزۇم مىرزاعاليەۆ.
قر ەگترم ورمان شارۋاشىلىعى جانە جانۋارلار دۇنيەسى كوميتەتى جەدەل جەلىسىنىڭ ءنومىرى: +7777 6785252.
جەدەل جەلى ۆاتسابىنا جولدانعان حابارلامادا شاعىم ايتۋشىنىڭ اتى-ءجونى, سونداي-اق, زاڭ بۇزۋشىلىق كورىنىسىنىڭ سۋرەتى نەمەسە بەينەتۇسىرىلىمى, ۇلتتىق پاركتىڭ اتاۋى جانە ورنالاسقان جەرى شامامەن كورسەتىلەدى.
وسىلايشا, ەلدىڭ ءاربىر تۇرعىنى ەلىمىزدىڭ تابيعاتىن قورعاۋعا جانە ونى ساقتاۋعا قاتىسىپ, تۇرعىندار اراسىندا جوعارى دەڭگەيدەگى تۋريستىك مادەنيەتتى قالىپتاستىرۋعا ىقپال ەتە الادى.
ەسكە سالساق, بۇدان بۇرىن قر پرەزيدەنتى قاسىم-جومارت توقاەۆ "ازاماتتاردىڭ تابيعي دەمالىس ورىندارىنداعى جاپپاي مادەنيەتسىزدىگى" پروبلەماسىن كوتەرگەن بولاتىن. وتكەن دەمالىستان باستاپ ەكولوگيا مينيسترلىگى قر ءىىم قىزمەتكەرلەرىمەن, قوعام بەلسەندىلەرىمەن بىرلەسىپ, ادامدار دەمالاتىن تابيعي جانە ەرەكشە قورعالاتىن اۋماقتاردا رەيد وتكىزىلە باستادى. زاڭ بۇزۋشىلىق بولعان جاعدايدا ءتۇسىندىرۋ جۇمىسى جۇرگىزىلىپ, ايىپپۇل سالىنادى. بۇل باعىتتاعى جۇيەلى جۇمىستار جالعاسۋدا.
بۇدان بۇرىن ەكولوگيا ءمينيسترى ۇلتتىق پاركتەردە "شاشلىك ءتۋريزمى" بولمايتىنىن اتاپ وتكەن. ۇلتتىق پاركتەرگە كەلۋشىلەردى مينيسترلىك ەكوتۋريزمدى دامىتۋ, ونىڭ ىشىندە اياقجولدار مەن قاجەتتى ينفراقۇرىلىم سالۋ ارقىلى تارتپاق.
مينيسترلىك قاراماعىنداعى مەملەكەتتىك ۇلتتىق تابيعي پاركتەر ءتىزىمى:
1. ىلە-الاتاۋ مۇتپ
2. "كولساي كولدەرى" مۇتپ
3. شارىن مۇتپ
4. "التىن-ەمەل" مۇتپ
5. "كوكشەتاۋ" مۇتپ
6. باياناۋىل مۇتپ
7. قاتون-قاراعاي مۇتپ
8. سايرام-وگەم مۇتپ
9. "بۇيراتاۋ" مۇتپ
10. قارقارالى مۇتپ
11. جوڭعار-الاتاۋى مۇتپ
12. "تارباعاتاي" مۇتپ
