مەديتسينا • 28 شىلدە، 2020

ىندەتپەن كۇرەسكە ۇلەس قوسىپ جاتىر

13 رەت كورسەتىلدى

قازىرگى قىسىلتاياڭ كەزەڭدە دەنساۋلىق ساقتاۋ جۇيەسىنىڭ بارلىق رەسۋرسى قاۋىپتى ىندەتكە قارسى ءىس-شارالارعا جۇمىلدىرىلدى. داۋاسىز دەرتتىڭ بەتىن قايتارۋعا باعىتتالعان بۇل اۋقىمدى جۇمىستار مەديتسينالىق ساقتاندىرۋ قورى ارقىلى قارجىلاندىرىلدى.

 

قور تاراپىنان 56،7 ملرد تەڭگە ءبولىندى

پاندەميا كەزىندە مەديتسينالىق ۇيىم­داردىڭ كوبى ىندەت جۇقتىرعانداردى ەم­دەيتىن بولىپ قايتا بەيىمدەلدى. بۇل رەتتە كۇنى-ءتۇنى قىزمەت ەتكەن دارىگەرلەرگە دە ۇدايى قولداۋ كورسەتىلدى. ىندەتكە قار­سى ءىس-شارالاردىڭ جان-جاقتى ۇيىم­داس­تىرىلۋىنا مىندەتتى الەۋمەتتىك ساق­تان­دىرۋ جۇيەسى ءبىراز ۇلەسىن قوسىپ جاتىر. وسى جونىندە ورتالىق كوممۋنيكاتسيالىق قىز­­مەتى الاڭىندا الەۋمەتتىك مەدي­تسي­نا­لىق ساقتاندىرۋ قورىنىڭ باسقارما تور­اعا­سى بولات توكەجانوۆ كەڭىنەن ايتىپ بەردى.

ونىڭ ايتۋىنشا، كوروناۆيرۋسقا قارسى كۇرەس شارالارىنا جالپى 56،7 ملرد تەڭگە ءبولىندى. حالىققا كومەك كورسەتۋ ءۇشىن 630 مەكەمەمەن شارت جاسالدى. مەديتسينالىق كومەك پەن ستاتسيونارلارداعى ەم ءۇشىن – 13،4 ملرد تەڭگە، قاۋىپتى ايماقتاردا جۇمىس ىس­تەگەن مەديتسينالىق قىزمەتكەرلەرگە ۇس­تەمە­اقى تولەۋگە – 38،1 ملرد تەڭگە، پتر دياگ­نوس­تيكاعا 5،2 ملرد تەڭگە قا­راس­تىرىلعان.

ءبىرىنشى كەزەكتە تۇرعان ماڭىزدى مىن­دەتتەردى جەدەل ورىنداۋ ءۇشىن رەس­پۋب­ليكالىق كوميسسيا سانيتارلىق-ەپيدەميالىق سالاماتتىق سالاسىنداعى ۋاكىلەتتى ورگانمەن كەلىسە وتىرىپ، وڭىر­لەردەگى دەنساۋلىق ساقتاۋ باسقارما­لارىنىڭ تىزبەسى بويىنشا مەديتسينالىق قىزمەت كورسەتەتىن مەكەمەلەرمەن تىكەلەي شارت جاساۋ تۋرالى شەشىم قابىلداندى. قور ماۋسىم ايىنىڭ سوڭىندا جەتكىزۋشى مەكەمەلەلەرگە كورسەتىلگەن قىزمەتتەر مەن قاۋىپتى ايماقتا جۇمىس ىستەگەن مەديتسينا قىزمەتكەرلەرىنە 44 ملرد تەڭگە تولەدى. بۇل قارجى بولىنگەن جالپى سومانىڭ 75 پايىزىن قۇرايدى.

«ناۋرىز ايىنان ماۋسىم ايىنا دەيىن قازاقستاندا 150 مىڭ ناۋقاس كوروناۆيرۋس پەن پنەۆمونيادان ەمدەلدى. وسى ماقساتتا امسق اۋرۋحانالارعا 9 ملرد تەڭگەدەن استام قارجى تولەدى. ناۋرىز ايى­نا قاراعاندا ماۋسىمدا ءبىر كۇندىك توسەكتىك-ورىندارمەن ناۋقاستاردىڭ قامتىلۋى – 8 ەسەگە، جۇقپالى اۋرۋلار اۋرۋحاناسىنداعى توسەك-ورىننىڭ قامتىلۋى 23 ەسەگە وسكەن. سونداي-اق پروۆيزورلىق ستاتسيونارلاردا ءبىر كۇندىك توسەكتىك-ورىن سانى ناۋرىز ايىندا 21 مىڭ بولسا، قازىر 100 مىڭنان استى. مەديتسينالىق كومەك ساپاسىن جاقسارتۋ ءۇشىن شىلدە ايىندا مەديتسينالىق ۇيىمدار ءۇشىن تاريفتەر ارتتى. ەندى پروۆيزورلىق ستاتسيوناردا ءاربىر توسەكتىك-ورىن كۇنىنە – 22 مىڭ تەڭگە، تاۋلىك بويى ستاتسيونارلاردا بولعانى ءۇشىن 32 مىڭ تەڭگە، ناۋقاستى انەستەزيولوگيا، رەانيماتسيا جانە قارقىندى تەراپيا بولىمشەسىندە ەمدەۋدەگى توسەك-ورىن كۇنى ءۇشىن 70 مىڭ تەڭگەدەن اسا قاراجات قور تاراپىنان وتەلەدى. بۇل قىزمەتتەرگە ءتاريفتى كوتەرۋ قور جەتكىزۋشىلەرىنىڭ سانىن كوبەيتۋگە، جەكە اۋرۋحانالاردى بەلسەندى تارتۋعا جانە كوروناۆيرۋستىق پنەۆمونياسى بار ناۋقاستاردى ەمدەۋگە مۇمكىندىك بەرەدى. بۇعان قوسا مەديتسينالىق ساقتاندىرۋ قورى ستاتسيونارلار مەن ەمحانا دارىگەرلەرىنىڭ جولدامالارى بويىنشا 300 مىڭعا جۋىق پتر زەرتتەۋلەرىنە 3،5 ملرد تەڭگەدەن اسا سوماعا تولەم جاسادى»، دەدى بولات توكەجانوۆ.

 

ەم-دوم شارالارى ءۇشىن جاڭا تاريفتەر ازىرلەندى

سونىمەن قاتار ءباسپاسوز جيىنىندا ءدارى-دارمەكپەن قامتاماسىز ەتۋدەگى كەدەرگىلەردىڭ الدىن الۋ ءۇشىن الەۋمەتتىك مەديتسينالىق ساقتاندىرۋ قورى «سق-فارماتسيا» كومپانياسىمەن بىرلەسىپ جاسالعان كەلىسىمشارت سوماسىن 100% الدىن الا تولەگەنى ءمالىم بولدى. بۇل بىرىڭعاي ديستريبيۋتورعا جىل سوڭىنا دەيىن جەتكىزىلەتىن پرەپاراتتار ءۇشىن جەتكىزۋشىلەر مەن ءوندىرۋشى زاۋىتتارعا الدىن الا تولەم جاساۋعا مۇمكىندىك بەردى. ءدارى-دارمەكپەن قامتاماسىز ەتۋدى جاقسارتۋ ءۇشىن قاجەتتى شارالار قولعا الىنىپ جاتىر. دەنساۋلىق ساقتاۋ مينيسترلىگى قوسىمشا بەس ءدارى-دارمەك ءتۇرىن ەنگىزۋ ماسەلەسىن قاراستىرۋدا. بۇل دارىلەر دە الدىڭعى قاتاردا جۇرگەن دارىگەرلەردىڭ تاعايىنداۋىمەن قولجەتىمدى بولماق. مينيسترلىك بۇيرىققا وزگەرىستەر ەنگىز­گەننەن كەيىن اتالعان قور وڭىرلىك دەنساۋ­لىق ساقتاۋ باسقارمالارىنىڭ وتىنىمدەرى نەگىزىندە ونى ۇزدىكسىز ساتىپ الۋ ءۇشىن قارجىلاندىرۋدى قامتاماسىز ەتەدى.

«قازىر قوسىمشا 110 ملرد تەڭگە ءبولۋ ما­سە­لەسى قاراستىرىلىپ جاتىر. ال مىن­دەتتى الەۋمەتتىك مەديتسينالىق ساقتاندىرۋ جۇيەسى اياسىندا ەلىمىزدە قوسىمشا 140 ملرد تەڭگە بولىنەدى. بۇل ەسەپ ءالى ناقتىلانادى. ويتكەنى بۇل كوروناۆيرۋس پەن پنەۆمونيا بويىنشا ەپيدەميالىق جاعدايدىڭ قالاي وربيتىنىنە تىكەلەي بايلانىستى. قور كۆي دياگنوستيكاسىنا، ەمدەۋگە جانە اسقىنۋلارعا بايلانىستى بارلىق شىعىندى مەديتسينالىق ۇيىمدارعا وتەۋ ءۇشىن ەمدەۋدىڭ اۋىرلىعىن ەسكەرە وتىرىپ، جاڭا تاريفتەر ازىرلەدى. وسىلايشا كوروناۆيرۋس ينفەكتسياسىنىڭ جەڭىل دەڭگەيىندەگى ءبىر ناۋقاستى – 292 600 تەڭگەگە، ورتاشا دەڭگەيدەگى ناۋقاستى – 446 100 تەڭگەگە، جاعدايى مۇشكىل ناۋقاستى 1،5 ملن تەڭگەگە ەمدەيدى. وتە اۋىر حالدەگى ناۋقاستى ەمدەۋ ءۇشىن قور ءبىر ناۋقاسقا 1،7 ملن تەڭگە تولەيدى. جەدەل جاردەم كورسەتۋ ءتاريفىنىڭ قۇرىلىمىندا جەكە قورعانۋ قۇرالدارىنا جۇمسالاتىن شىعىندار ورتا ەسەپپەن 40%-عا ارتتى. قوردىڭ قوسىمشا جوسپارلانعان قارجىلاندىرۋ كولەمىنەن ءموبيلدى بريگادالاردىڭ جۇمىسىنا شامامەن 7،7 ملرد تەڭگە جىبەرىلەدى. ءتىپتى قازىر ەمحانالار مەن وتباسىلىق امبۋلاتو­ريا­لار جانىنان ءدال وسىنداي 3 مىڭنان اسا بريگادا قۇرىلدى»، دەدى الەۋمەتتىك مەدي­تسينالىق ساقتاندىرۋ قورىنىڭ باسشىسى.

 

توموگرافيا قىزمەتىنەن كومەك كوپ

بۇعان قوسا ب.توكەجانوۆ جۋرنا­ليس­تەر­دىڭ ساۋالىنا قاراي ەلدە كوپتەگەن ازا­مات وكپەنىڭ زاقىمدالۋىن انىقتاۋ ءۇشىن كومپيۋتەرلىك توموگرافيادان وتكە­نىن، سوندىقتان ماۋسىمنان باستاپ كت-عا جۇگىنۋدىڭ كۇرت ءوسۋى بايقالعانىن، بىراق دياگ­نوستيكانىڭ بۇل ءتۇرى بەلگىلى ءبىر كلي­نيكالىق سيمپتومدارى بار پاتسيەنتتەرگە كورسەتىلگەنىن مالىمدەدى.

ەنتىگۋ، تىنىس الۋدىڭ قيىنداۋى، كەۋدە قۋى­سىنىڭ اۋىرۋى، قانداعى وتتەگى دەڭ­گەيىنىڭ تومەندەۋى سياقتى بەلگىلەر بولعان جاعدايدا دەرەۋ دارىگەرمەن بايلانىسۋ نەمەسە جەدەل جاردەمگە قوڭىراۋ شالۋ قاجەت. كومپيۋتەرلىك توموگرافيا كا­بي­نەتتەرىنىڭ وتكىزۋ قابىلەتىن دە ەسكەرۋ كەرەك. ءار پا­تسيەنتتەن كەيىن سانيتارلىق وڭ­دەۋ جۇرگىزىلەتىندىكتەن، بۇل كەزەك كۇتۋ ۋاقىتىن ارت­تى­رادى. وسىعان بايلانىستى ەلوردادا كت جۇمىسىن تاۋلىك بويى رەجىمىنە اۋىستىردى.

قازىر ەلىمىزدە 135 توموگراف جۇمىس ىستەيدى. جارتى جىلدا 1،6 ملرد تەڭگەگە 135 778 كت قىزمەتى كورسەتىلگەن. قور ءۇشىن ءبىر سۋرەتتىڭ قۇنى 7 215 تەڭگە، ال كونتراستاۋ بويىنشا 27،5 مىڭ تەڭگە تۇرادى.

تىنىس الۋ جولدارىنىڭ اۋرۋلارىن دياگنوستيكالاۋ ءۇشىن حاتتاماعا جو­عا­رى رۇقساتى بار تسيفرلى رەنتگەنوگرافيا اپپا­راتتارى ەنگىزىلگەن. ەلىمىز­دە 3 مىڭ­نان اسا رەنتگەن-اپپاراتى جۇ­مىس ىستەيدى. ونىڭ 1118-ءى جىلجىمالى، ولار اۋىلدا دياگ­نوستيكالىق قىزمەت كور­سەتۋ ءۇشىن قول­دا­نىلادى. اۋداندىق اۋرۋحانالار ءۇشىن تاعى 53 رەنتگەن اپپاراتى ساتىپ الىنىپ جاتىر.

 

سوڭعى جاڭالىقتار

ەلگە كەرەك ەكى كىتاپ

رۋحانيات • بۇگىن، 08:52

«عارىشقا اپارار جول»

رۋحانيات • بۇگىن، 08:50

العاشقى عارىش ايلاعى

وقيعا • بۇگىن، 08:48

تاريحي جەرلەردىڭ تاعىلىمى بولەك

رۋحانيات • بۇگىن، 08:30

شيرەك فينالدا ءسۇرىندى

تەننيس • بۇگىن، 08:11

ەل-كلاسيكودا جەڭىسكە جەتتى

فۋتبول • بۇگىن، 08:06

رۋحى بيىك ەل ەشقاشان جەڭىلمەيدى

رۋحانيات • بۇگىن، 08:05

يزرايلدەن باسىم ءتۇستى

سپورت • بۇگىن، 08:04

عىلىمنىڭ جاڭا بەلەسى

عىلىم • بۇگىن، 08:01

ۇلتتىق ۇردىستەر ۇزىلمەيدى

قازاقستان • كەشە

ۇقساس جاڭالىقتار