كەشە الماتىدا ءوتىپ جاتقان بوكستان XVII الەم چەمپيوناتىنىڭ بەسىنشى كۇنى اياقتالدى. وسى كۇنى بوكسشىلار ەكىنشى اينالىمدى باستاپ كەتتى. ول 52, 64 جانە 91 كيلوعا دەيىنگى سالماقتاعىلار اراسىندا ءوتتى.
جانكۇيەر قاۋىم 2011 جىلعى الەم چەمپيوناتىنىڭ كۇمىس جۇلدەگەرى, ەۋروپانىڭ 2013 جىلعى چەمپيونى ۋەلستىك ەندريۋ سەلبي مەن قۇراما شتاتتار وكىلى ماليك دجەكسون جۇدىرىق سىلتەسكەن شايقاستى ءبىرىنشى بولىپ تاماشالادى. بۇل ءبىر اسا تارتىستى وتكەن ۇرىس بولدى. سوندىقتان اقىرعى ساتىنە دەيىن كىمنىڭ باعى جاناتىنى بەلگىسىز بولىپ تۇردى. ال تورەشىلەردىڭ باعامى بويىنشا, بريتانيالىق جىگىتتىڭ ۇرعان سوققىلارى دالىرەك تيگەن بولىپ شىقتى. بۇدان كەيىن وسىنداي كەسكىلەسكەن ۇرىستا كۋبالىق گەرالدو تەجەريا جاپون سادايوري اوكيدى تىزە بۇكتىردى. ەندى ءۇشىنشى اينالىمدا وسى جۇپتاردىڭ جەڭىمپازدارى جۇزدەسەدى.
كەشە الماتىدا ءوتىپ جاتقان بوكستان XVII الەم چەمپيوناتىنىڭ بەسىنشى كۇنى اياقتالدى. وسى كۇنى بوكسشىلار ەكىنشى اينالىمدى باستاپ كەتتى. ول 52, 64 جانە 91 كيلوعا دەيىنگى سالماقتاعىلار اراسىندا ءوتتى.
جانكۇيەر قاۋىم 2011 جىلعى الەم چەمپيوناتىنىڭ كۇمىس جۇلدەگەرى, ەۋروپانىڭ 2013 جىلعى چەمپيونى ۋەلستىك ەندريۋ سەلبي مەن قۇراما شتاتتار وكىلى ماليك دجەكسون جۇدىرىق سىلتەسكەن شايقاستى ءبىرىنشى بولىپ تاماشالادى. بۇل ءبىر اسا تارتىستى وتكەن ۇرىس بولدى. سوندىقتان اقىرعى ساتىنە دەيىن كىمنىڭ باعى جاناتىنى بەلگىسىز بولىپ تۇردى. ال تورەشىلەردىڭ باعامى بويىنشا, بريتانيالىق جىگىتتىڭ ۇرعان سوققىلارى دالىرەك تيگەن بولىپ شىقتى. بۇدان كەيىن وسىنداي كەسكىلەسكەن ۇرىستا كۋبالىق گەرالدو تەجەريا جاپون سادايوري اوكيدى تىزە بۇكتىردى. ەندى ءۇشىنشى اينالىمدا وسى جۇپتاردىڭ جەڭىمپازدارى جۇزدەسەدى.
كەلەسى كەزەكتە بوكسسۇيەر قاۋىم بيىل عانا يوردانيادا ازيا چەمپيونى بولعان قىرعىز ازات ۇسەناليەۆ پەن مولدوۆان الەكساندر رىشكاننىڭ جەكپە-جەگىن ءجىتى قاداعالادى. سەبەبى, بۇل جۇپتا يىعى وزعان وعلان الداعى ايقاستا ءبىزدىڭ ءىلياس سۇلەيمەنوۆتىڭ قارسىلاسى بولىپ قالۋى ىقتيمال ەدى. ونى اقىرىن الاتوو باۋرايىنان كەلگەن باعلان ءوز پايداسىنا شەشە ءبىلدى. بۇدان كەيىن كەزەك ىلياسقا كەلدى. ال وعان ءوزىنىڭ ەكىنشى ەلەككە وتۋگە لايىقتى ەكەنىن دالەلدەۋ ءۇشىن كوپ تەر توگۋگە تۋرا كەلدى. اۆستراليالىق ەندريۋ مەلوني ۇرىس باستالعاننان ولىسپەي بەرىسپەيتىنىن بايقاتتى. بۇعان ءىلياس ادەمى قورعانىس پەن دەر كەزىندە جاسالعان قاۋىرت شابۋىلمەن جاۋاپ قايتارىپ وتىردى. ول وزىنەن تۋرا 20 كۇن كىشى ارىپتەسىن ەكىنشى راۋندتان ىرقىندا ۇستاي باستادى. ناتيجەسىندە قازاقستان جاساعى تۋرنيردەگى ءبىرىنشى جەڭىسىنە قول جەتكىزدى. ەلىمىز قۇراماسىنىڭ باس جاتتىقتىرۋشىسى مىرزاعالي ايتجانوۆ وسىعان وراي: «ءبىزدىڭ العاشقى شايقاستارىمىز ءىلياس پەن مەرەيگە ۇلكەن جاۋاپكەرشىلىك جۇكتەدى. ولار قازاقستان بوكس مەكتەبىنىڭ دەڭگەيىن كورسەتۋگە ءتيىس بولدى. ازىرگە سول دەڭگەيدەن تابىلعان ءىلياستى 22 قازان كۇنى قۇرلىقتىڭ بيىلعى چەمپيونى ازات ۇسەناليەۆ سىندى وتە كۇشتى قارسىلاس كۇتىپ تۇر», – دەدى.
يرلانديا قۇراماسىنىڭ ارداگەرى پەددي بارنس پەن سەرب ميلوش ءبالتيچتىڭ اراسىنداعى جەكپە-جەككە دە توقتالا كەتۋگە بولادى. مۇندا جاسى دا ۇلكەن, اتاعى دا كوپ بريتانيالىق بوكسشى الىمدى كورىندى. وسىنىڭ سوڭىن الا انگليالىق چارلي ەدۆاردس كەنيالىق سيمون نزيوكيدەن تەحنيكالىق نوكاۋتپەن جەڭىلىپ قالدى. بۇعان ونىڭ ءبىرىنشى راۋندتا قاباعىن جارىپ العانى دا اسەر ەتكەن سياقتى. بۇدان ءارى ارميان نارەك ابگارگيان ماكەدونيانىڭ جارىستاعى جالعىز وكىلى مۋمين ۆەليدى ىعىستىرىپ, ىلگەرىگە قادام جازدى. وزبەكستاندىق ۇيعىر جىگىتى جاسۋربەك لاتيپوۆ گەرمانيالىق اراب حامزا توۋبانى تومپەشتەپ تاستادى.
كورەرمەن كوپشىلىك 64 كيلوعا دەيىنگىلەر ۇرىستارىن دا اسىعا كۇتتى. سول ىنتا مەن ىقىلاسقا ساي وسى سالماقتاعى مەرەي اقشالوۆ ءوزىنىڭ جەكپە-جەگىن وتە جاقسى وتكىزدى. گونگ سوعىلعان بويدا اتويلاپ العا ۇمتىلعان ءبىزدىڭ جىگىت رينگتىڭ شىن مانىندەگى يەسى سەكىلدى ەركىن قيمىلدادى. دەگەنمەن, قارسىلاسى دا قاراپ قالمادى. ادەتتە قورعانىسقا مىعىم مەرەيدىڭ شابۋىلعا شىققان كەزىندە اشىلىپ قالعان ساتتەرىن ۇتىمدى پايدالانعان ول ارا-تۇرا ءدال سوققىلار بەرىپ تۇردى. سوعان قاراماستان, ءبىزدىڭ ساڭلاقتىڭ ارتىق ەكەنىنە ەشكىم كۇمان كەلتىرگەن جوق. ال قۇراما باس جاتتىقتىرۋشىسى بۇل ۇرىسقا: «مەرەي ءبىزدىڭ بەرگەن نۇسقاۋىمىزدى ءدال ورىنداپ, وتە جاقسى شايقاستى. ەندى ءىلياس پەن مەرەيدىڭ جەڭىستەرى كومانداداعى باسقا جىگىتتەردىڭ ەڭسەلەرىن كوتەرىپ, جىگەرلەرىن جانيتىن شىعار دەگەن ويدامىن», – دەگەن باعا بەردى. ال مەرەيگە كەلەسى اينالىمدا دومينيكاندىق كارلوس ادامس باسەكەلەس بولادى. ول وسى جولى اقش بوكسشىسى حوسە الدەيدى ادەمى ەتىپ ۇتىپ بەردى. بۇلار ەندى 21 قازان كۇنى ءبىر-بىرىمەن بەتپە-بەت كەلەدى.
الماتى رينگىنە وتكەن جولعى جاھاندىق جارىستا توپ جارعانداردىڭ بەسەۋى بىردەي كەلىپ وتىر. ادەتتە مىقتىلاردىڭ شوعىرى ءدال مۇنداي دەڭگەيدە قايتا جينالا بەرمەيدى. ال وسىنىڭ الدىندا عانا كاسىپقوي بوكسقا اۋىسىپ, ناپاقالارىن سول جاقتان تابۋعا بەكىنگەن قىتاي زوۋ شيمين, ۋكرايندار ۆاسيلي لوماچەنكو, تاراس شەلەستيۋك, الەكساندر ۋسيك كەلە قالعاندا, چەمپيوندار تۇگەلدەنىپ قالعانداي ەكەن. تەك باكۋدە جۇلدىزى جانعان ۋكراين ەۆگەني حيتروۆ قانا ءوز ەلىنىڭ قۇراماسى ساپىنا ىلىنبەي قالىپتى. وسىلاي بىرنەشە مىقتىسىنان ايىرىلىپ قالعانىنان دا شىعار, ازەربايجان استاناسىندا كوماندالىق ەسەپتە ءبىرىنشى ورىن العان ۋكراينا قۇراماسى بۇل بىرىنشىلىكتە ايرىقشا كوزگە تۇسە الماي تۇر. سول سياقتى اقش قۇراماسى دا قازىردىڭ وزىندە 7 بوكسشىسىنان ايىرىلىپ قالدى.
ەندى بىرىنشىلىككە جۇگىنىپ جەتكەن 2011-ءدىڭ چەمپيوندارىنا ويىسساق, ءتىلدىڭ ۇشىنا بۇل لەكتە كۋبالىقتار لازارو الۆەرەس پەن حۋليو دە لا كرۋس, رەسەيلىك ميشا الويان, ازەربايجاندىق ماگومەدراسۋل مەدجيدوۆ جانە برازيليالىق ەۆەرتون لوپەس بار ەكەنى كەلەر ەدى. مىنە, وسىلاردىڭ سوڭعىسى كەشە چەمپيوندار اراسىنان ءبىرىنشى بولىپ ۇرىسقا ارالاسىپ, ماۆريكيلىك ليۋس كوليندى ەركىن ۇتىپ شىقتى. تۇبىندە ءبىزدىڭ مەرەيدىڭ باسەكەلەسى بولىپ قالۋلارى ىقتيمالدار قاتارىنداعى قىرعىز ەرمەك ساكەنوۆ يرلانديالىق تالانتتى بوكسشى رايموند مويلەتتەن باسىم ءتۇستى. سول سياقتى الماتى جانكۇيەرلەرىنىڭ كوڭىلىنەن شىعا باستاعان تاجىك شاۆكاتدجون راحيموۆ ءتاجىريبەلى سەرب برانيمير ستانكوۆيچتى كەسكىلەسكەن ۇرىس ۇستىندە ۇتتى.
91 كيلوعا دەيىنگى سالماقتاعىلار اراسىندا بىزگە حورۆات ماركو گاليچتىڭ قىتاي كسۋانكسۋان ۆانگتى, ازەربايجان تەيمۋر مامەدوۆتىڭ نيگەريالىق ەتەبور ءاپوچيدى ۇتقاندارى ۇنادى. وسى توپتاعى ەڭ اتاعى زورلاردىڭ ءبىرى – يتاليان كلەمەنتە رۋسسو گرۋزين لەۆان گۋلەدانيدەن ايقىن باسىم بولدى. اتاعىنان ات ۇركەتىن تاعى ءبىر تارلان, كۋبالىق ەريسلاندي ساۆون كورەي جين-حو حەونى ءبىرىنشى راۋندتا-اق نوكاۋتقا جىبەرىپ, ءوزىنىڭ ءالى بابىندا ەكەنىن تانىتتى.
جاسىراتىنى جوق, ءوز «ءسايگۇلىكتەرىمىز» ءبىر كەزەڭنىڭ كەرمەسىنەن اعىپ وتە شىققاننان كەيىن كوڭىلدەرىمىزدى دەمدەگەن ءبىز كەشكى سەسسيانى اسىعا كۇتتىك. بۇعان سول ارالىقتا 91 كيلوداعىلار اراسىندا انتون پينچۋكتىڭ شايقاسقا قوسىلاتىنى سەبەپ بولىپ ەدى. ونىڭ ۆەنگر يمرە شەللومەن جەكپە-جەگى سەسسيانىڭ سوڭعى جاعىندا ءوتتى. ال وعان دەيىن ءبىز رەسەيلىك ەۆگەني تيششەنكونىڭ بەلورۋس سەرگەي كورنەەۆتى, برازيليالىق حۋان نوگۋەيرانىڭ امەريكالىق مايكل حيلتوندى, وزبەك رۋستام تۋلياگانوۆتىڭ مولدوۆان ۆلاديمير چەلەستى قالاي ۇتقانىن تاماشالادىق.
ءبىر كەزدە انتون پينچۋك تە شىقتى الاڭعا. ونىڭ قارسىلاسى يمرە شەللونىڭ بويى ەداۋىر بيىك ەكەن. قولى دا ۇزىن كورىندى. وسىعان قاراپ, ازداپ قوبالجىعانىمىز راس. بىراق سول كۇماندى ءبىزدىڭ باتىر باعلان كوپ ۇزاماي سەيىلتە باستادى. بىزدىڭشە, ول ءۇش راۋندتا باسىم بولدى. مۇنى تورەشىلەر دە ءادىل باعالادى. ءسويتىپ, كەشە شارشى الاڭعا شىققان ءۇش ساڭلاعىمىز دا جەڭىس تويىن تويلاپ, مىڭداعان جانكۇيەرلەرىن قۋانتتى. ال انتوننىڭ 21 قازان كۇنى جۇزدەسەتىن كەلەسى قارسىلاسى وزبەك رۋستام تۋلياگانوۆ بولعالى تۇر. وسىلاردىڭ ءبارىن سارالاپ شىققان م.ايتجانوۆ سوڭىندا: «انتونعا بۇل شايقاس وڭايعا تۇسكەن جوق. بىراق پينچۋك ءوزىنىڭ كۇشتى ەكەنىن تانىتتى. مەن ونىڭ ەندى قوسا تۇسەتىنىنە سەنەمىن», – دەگەندى ايتتى.
بۇگىن 49, 56 جانە 75 كيلوعا دەيىنگى سالماقتارداعى بوكسشىلار رينگكە شىعادى. مۇندا ءبىرجان جاقىپوۆ – رەسەيلىك بەليك گالانوۆپەن, قايرات ەراليەۆ – رۋمىن نيكولاە اندرەانامەن, جانىبەك ءالىمحان ۇلى ازەربايجاندىق سولتان ميگيتينوۆپەن قولعاپ ءتۇيىستىرەدى. ال ەرتەڭ بەرىك ءابدىراحمانوۆ – پۋەرتوريكولىق دانيەليتو دە لا روسامەن, دانيار ەلەۋسىنوۆ – باگامدىق كارل حيەلدپەن, ءادىلبەك نيازىمبەتوۆ فين ۆيللە حۋككەنەنمەن ايقاسادى. قازاننىڭ 22-سىندە يۆان دىچكو رينگكە كوتەرىلەدى. جارىستى بىردەن 1/8 فينالدان باستايتىن ونىڭ قارسىلاسى ءازىرگە بەلگىسىز.
«ەگەمەن قازاقستاننىڭ»
الەم چەمپيوناتىنداعى كوشپەلى رەداكتسياسى.
سۋرەتتەردى تۇسىرگەن بەرسىنبەك سارسەنوۆ.
سۋرەتتەردە: 1. رينگتە – ءى.سۇلەيمەنوۆ; 2. جەرلەسىمىز ا.پينچۋك شابۋىلدا;
3. م.اقشالوۆتىڭ جەڭىسى.
