ەلوردا • 27 شىلدە، 2020

پۋلمونولوگ دارىگەر: ادام ءومىرىن ساقتاۋ ءۇشىن دارىگەرلەر تاۋلىك بويى جۇمىس ىستەۋدە

52 رەت كورسەتىلدى

كارانتين شارالارى ەنگىزىلگەن ساتتەن باستاپ دارىگەرلەر 24/7 رەجىمىندە جۇمىس ىستەۋدە، دەيدى استانا مەديتسينا ۋنيۆەرسيتەتىنىڭ №3 ىشكى اۋرۋلار كافەدراسىنىڭ اسسيستەنتى، پۋلمونولوگ اسيا توكسارينا. بۇل تۋرالى ەلوردا اكىمدىگىنىڭ رەسمي سايتى حابارلايدى، دەپ جازادى Egemen.kz

اق حالاتتى ابزال جاندار جۇمىسىنا قاسيەتتى پارىز دەپ قارايدى. "مۇقتاجدارعا كومەكتەسۋ – مىندەتىمىز، ءوزىمىز تاڭداعان وسى جولدان اينىمايمىز. شىنىندا، ەلىمىزدە پۋلمونولوگتار كوپ ەمەس. ايتالىق، ەلدە 3-4 مىڭنان استام كارديولوگ پەن نەۆرولوگ بولسا، بار بولعانى 80 پۋلمونولوگ بار. كوپتەگەن وبلىس، ايماق پەن اۋدان كولەمىندە بۇل سالادا مامان جوق. جەتىسپەۋشىلىك بۇرىننان بار. پۋلمونولوگتەردىڭ كوبى ينفەكتسيونيست، رەانيماتولوگ جانە باسقا دا دارىگەرلەرمەن بىرگە كوۆيد اۋرۋحانالارىندا جۇمىس ىستەۋدە. بىزگە رەزيدەنت-پۋلمونولوگتەر ۇلكەن كومەك كورسەتۋدە. ولاردىڭ پاندەميا باستالعالى بەرى دارىگەرلەرمەن قاتار جۇمىس ىستەۋىنىڭ ارقاسىندا جاعدايدى رەتتەي الدىق"، دەيدى ا.توكسارينا.

ول كۆي ناۋقاستارى تۋرالى ءوز پىكىرىمەن ءبولىستى.

"كوروناۆيرۋس ينفەكتسياسى سيمپتومسىز، ادام جاي عانا تاسىمالداۋشى بولۋى مۇمكىن. سوڭعى مالىمەتتەر بويىنشا، كوروناۆيرۋس ينفەكتسياسىنىڭ تاسىمالداۋشىلارى كوبىنە 10-14 جاس ارالىعىنداعى بالالار. ەگەر ءبىز سيمپتومدار تۋرالى ايتاتىن بولساق، بۇل اۋىر ينتوكسيكاتسيا، ءيىس سەزبەۋ، قاتتى السىزدىك، اسقازان-ىشەك جولدارىنىڭ بەلگىلەرى – جۇرەك اينۋ، قۇسۋ. بۇل بەلگىلەر 14-20 كۇنگە نەمەسە ودان دا كوپ ۋاقىتقا سوزىلۋى مۇمكىن. اۋىر جاعدايدا بۇعان ەنتىگۋ قوسىلادى"، دەپ ءتۇسىندىردى ا.توكسارينا.

مامان پىكىرىنشە، دەنساۋلىق جاعدايىنىڭ اۋىرلىعىنىڭ نەگىزگى كورسەتكىشى – ادام اعزاسىنداعى ساتۋراتسيا دەڭگەيىنىڭ وزگەرۋى.

"قازىرگى جاعدايدا، توموگرافيانىڭ دەرەكتەرى بويىنشا وكپە ءتىنىنىڭ زاقىمدانۋ كورسەتكىشى سيمپتومسىز دەنساۋلىق جاعدايىنىڭ اۋىرلىعىن انىقتاي المايدى. ناۋقاس جاعدايىنىڭ اۋىرلىعىن باعالاۋ جانە اۋرۋحاناعا جاتقىزۋ كورسەتكىشتەرىن انىقتاۋ ءۇشىن ماڭىزدى كورسەتكىش – قانداعى وتتەگى دەڭگەيىنىڭ وزگەرۋى. اۋرۋدىڭ نەگىزگى اسقىنۋلارىنىڭ ءبىرى – تىنىس الۋ جەتكىلىكسىزدىگى"، دەيدى دارىگەر.

دارىگەر ازاماتتاردى COVID-19-دان ءوزىن-ءوزى ەمدەۋ كەزىندە انتيبيوتيكالىق تەراپيانى قولدانباۋعا شاقىردى.

"ۇسىنىمدار جالپى ۆيرۋستىق ينفەكتسيالارداعىداي، ياعني كوپ سۇيىقتىق ءىشۋ، ينتوكسيكاتسيا كەزىندە توسەك تارتىپ جاتۋ، دەنە قىزۋىن تۇسىرەتىن پرەپاراتتاردى قابىلداپ، دەنە بەلسەندىلىگىن ارتتىرۋ كەرەك. ەگەر ناۋقاس كۇندىز ءوزىن جاقسى سەزىنسە، تىنىس الۋ جاتتىعۋلارىن، بۇلشىقەت قيمىلدارىن جاساۋ قاجەت"، دەپ كەڭەس بەرەدى پۋلمونولوگ.

دارىگەردىڭ پىكىرىنشە، شەكتەۋ شارالارى ەنگىزىلگەلى كوروناۆيرۋس ينفەكتسياسىنىڭ بەلگىلەرى بار ناۋقاستار اعىمى ايتارلىقتاي تومەندەگەن.

"كارانتين جانە شەكتەۋ شارالارى وكپەنىڭ زاقىمدانۋىمەن كوروناۆيرۋس ينفەكتسياسى بار ناۋقاستاردىڭ سانىن ازايتتى. ناۋقاستاردىڭ نەگىزگى اعىنى ماۋسىمنىڭ ورتاسىندا، كارانتين رەجيمى جەڭىلدەگەن كەزدە بولدى. ول كەزدە اۋرۋحانالار اۋىر ناۋقاستارعا تولى بولاتىن. تاعى ءبىر ەرەكشەلىگى، قازىر ناۋقاستاردىڭ اۋىرلىق جاعدايى مامىر ايىنداعى ناۋقاستارعا قاراعاندا الدەقايدا ناشار. ءبىز، ارينە، وسى جاعدايدى تالدايمىز. تاعى ءبىر ماسەلە – ناۋقاستاردىڭ ءتۇرلى پىكىرلەر مەن اقپاراتتارعا سۇيەنىپ باكتەرياعا قارسى جانە باسقا دا پرەپاراتتاردى شامادان تىس قولدانۋى. بۇل دا ناۋقاستاردىڭ جاعدايىن ناشارلاتۋعا ەداۋىر ىقپال ەتۋدە"، دەپ اتاپ ءوتتى پۋلمونولوگ.

سوڭعى جاڭالىقتار

ۇقساس جاڭالىقتار