"بۇگىنگىدەي قىسىلتاياڭ شاقتا كوپتەگەن يگى ءىس-شارالاردىڭ كۋاسى بولىپ ءجۇرمىز. سونىڭ ءبىرى - وسى ايتىس اقىندارىنىڭ باستاماسىمەن جاسالىپ جاتقان اكتسيا. بۇل شاراعا جەكە كاسىپكەر رەتىندە دەمەۋشىلىك كورسەتتىم. جاعدايى تومەن ون شاڭىراققا قارجىلاي قولداۋ بىلدىردىك", دەگەن قايىرىمدىلىق اكتسياسىنىڭ باس دەمەۋشىسى تولقىن اقان ۇلى بۇل ىندەتتىڭ قازاق وتباسىلارىنا وڭاي ءتيىپ جاتپاعانىن دا ايتىپ ءوتتى.
قور وكىلدەرىنىڭ سوزىنشە, اكتسيا اياسىندا ازىرگە تەك ەلوردالىق تۇرعىندارعا كومەك كورسەتىلدى. الداعى ۋاقىتتا ءوڭىر-ءوڭىردى ارالاۋ جوسپاردا بار ەكەن. ايتىسكەر اقىن اسەم ەرەجەقىزى يگى باستاما تۋرالى:
- قۇربان ايت مەرەكەسى قارساڭىندا بولعاندىقتان اۋەلى 10 وتباسىنا 10 قوي اپارماق بولعانبىز. كەيىن اقىلداسا كەلە 42 500 تەڭگەنى قولاي كوردىك. ال قوردىڭ اتاۋىن اباي اتامىزدىڭ 175 جىلدىعىنىڭ قۇرمەتىنە وسىلاي اتادىق.
قور - كاسىپكەر, جومارت ازاماتتاردىڭ قولداۋىمەن جۇمىس ىستەيدى. تەك نۇر-سۇلتان قالاسىمەن عانا شەكتەلىپ قالماي, الداعى ۋاقىتتا ايماقتارعا دا شىعامىز دەپ جوبالاپ وتىرمىز. اباي بار قازاققا ورتاق بولعاندىقتان, ابايدىڭ شاپاعاتى دا بارشا جۇرتقا ءتيۋى ءتيىس.
سودان كەيىن, اباي ەسىمىنىڭ توڭىرەگىنە ەلدى شوعىرلاندىرىپ, ابايدى جان-جاقتى اشىپ, تاپسىرلەپ, ناسيحاتتاۋعا باعىتتالعان جوبالاردى قارجىلاندىرساق. اباي ارقىلى جالپى قازاقتىڭ ۇلتتىق ۇستانىمىن دا ناسيحاتتاۋعا بولادى عوي. ارنايى اباي پورتالى (ەنتسيكلوپەديالىق سايت دەسەك تە بولار), قىسقا روليكتەر, قىسقامەتراجدى فيلمدەر, قارا سوزدەردىڭ جەلىسى بويىنشا بەينەفيلمدەر, - دەدى.
ايتا كەتەيىك, اتالعان قايىرىمدىلىق اكتسياسى ايتىسكەر اقىنداردىڭ مۇرىندىق بولۋىمەن اشىلىپ وتىر. داۋلەتكەرەي كاپ ۇلى, اسەم ەرەجەقىزى, سەرىكزات دۇيسەنعازى, ايبەك قالي, ەركەبۇلان قاينازار سىندى قوعام قايراتكەرلەرى جەتەكشىلىك ەتەتىن بۇل قور الەمدى جايلاعان ىندەتتىڭ سالدارىنان كۇيزەلىسكە ۇشىراپ جاتقان سان مىڭداعان الەۋمەتتىك جاعدايى تومەن وتباسىلارعا جاردەم بەرۋ ماقساتىندا قۇرىلعان.
