كۇنى كەشە عانا سايلانعان پرەزي­دەن­تى­مىز­دىڭ قانداي ازامات ەكەنىن جۇرت جاقسى بىلەدى.

ول كىسىنىڭ ەل باسقارۋ كەزەڭى­مەن اسا كۇردەلى وقيعالار تۇسپا-تۇس كەلدى. اينا­لا­سى ءبىر جىلدىڭ ىشىندە ەلىمىزدە نەلەر بولمادى؟!

الدىمەن ارىس قالاسىندا قويما جا­رىلدى، ۇشاق اپاتقا ۇشىرادى، ماقتا­ارال­دى تاسقىن سۋ باستى، ال ارتى الەمدى السى­رەت­­كەن كوروناۆيرۋس ىندەتىنە الىپ كەلدى. ەگەمەندى ەلىمىزدىڭ تاري­­حىندا بولماعان توتەنشە جاع­دايعا تاپ بولدىق.

وسىنىڭ ءبارى پرەزيدەنتىمىزگە وڭاي ءتيىپ جاتقان جوق. ول دا ەت پەن سۇيەكتەن جارال­عان ادام. ونى ءتۇسىنۋىمىز كەرەك. تاع­دىر سىناعى شىعار. «جاراتۋشى سى­ناق­تى كوتەرە الاتىن ادامىنا عانا بەرەدى»،  دەيدى. ەلىمىز ءۇشىن جانىمەن شىرىلداپ، بار مۇمكىندىكتەردى جاساۋدا.

ونى بارلىعىمىز كورىپ-ءبىلىپ وتىرمىز.

زاماناۋي ءبىلىمى كەمەل، الىس­تى بولجاي الاتىن حالىق­ارا­لىق دەڭگەيدەگى باسشى. ەڭ الدى­مەن، تازا ادام. مۇنى باسا ايتۋ قا­جەت.

ال تازالىق – قانداي قوعامدى بولماسىن تىعىرىقتان الىپ شىعار شۋاقتى جول.

مىنە، وسىنداي كۇردەلى جاع­دايدا ەلدى قيىن­دىقتان الىپ شى­عاتىن مىقتى اتقا­رۋ­­شىلار، قازىرگى تىلمەن ايتقاندا پرەزي­دەنت­­تىڭ كومانداسى بولۋى كەرەك. ولار ەلگە شىن بەرىلگەن، جاناشىر جاندار بولۋى ءتيىس.

بىراق اتقارۋشى بيلىك وسال­دىق تانىتىپ وتىر. كۇردەلى كەزدە كۇرە جول تابا الماي ابدىراپ قالدى. ۇكىمەتتىڭ ۇيىتقى بولا الماۋىنان قاتەلىكتەر كەتتى. بۇل ەسكى جۇيەنىڭ دارمەنسىزدىگىن دالەلدەپ بەردى.

پرەزيدەنتتىڭ ءوز سوزىمەن ايت­قان­­دا: «بىزگە مەملەكەتتىك باس­­قا­رۋدى قايتا جا­ساق­­تاۋ قا­جەت. جاڭاشا باعىتتا ويلاي الا­­­­تىن جاڭا ورىنداۋشىلارعا مۇمكىن­دىك بە­رى­لەدى. ولار – ءبىلىم­دى، بەلسەندى، ىسكەر جانە ادال ازاماتتار».

قازىر كوپشىلىك ۇكىمەت پەن بي­لىك­تىڭ بارلىق قۇرى­لىم­دا­رىندا تەز ارادا وزگە­رىستەر ەنگىزۋدى تالاپ ەتۋدە. دۇرىس! بىراق مۇنى تەز جاساي سالۋ وڭاي شارۋا ەمەس. مەملەكەتتىك قىز­مەتتە ۇزاق جىلدار جۇمىس ىس­تەگەن ادام رەتىندە ايتاتىن­ىم، بىزدە تەك تەوريالىق قانا ەمەس، سونىمەن بىرگە، پراك­تي­كال­ىق تاجىريبەسى بار دايىن كادر­لاردىڭ سانى وتە از. ەگەر ادام ادەمى سوي­لەسە، ول ونىڭ كەز كەلگەن سالانى باسقا­رىپ كەتە الاتىندىعىن بىلدىر­مەي­دى. ءتىپتى باس­شىلىق لاۋازىمداردى ايتپاعاننىڭ وزىندە، مينيس­ترلىك­تە قاراپايىم قىزمەت­كە ءتيىس­تى مامان تابۋ كەيدە وتە قيىن.

دەگەنمەن قالاي بولعان جاع­داي­دا دا مەم­لەكەتتىك باس­قا­رۋ جۇيەسىن قايتا قۇرۋ قاجەت جانە سولاي بولادى. ول جۇيە ءادىل جانە اشىق بولۋى كەرەك. بۇل جۇمىستى پرە­زيدەنتىمىز قازىردىڭ وزىندە باستاپ كەتتى.

ءبىزدىڭ ەلدىڭ ەكونوميكاسى كوبىنەسە ۇلكەن بيزنەسمەندەر مەن الپاۋىت وليگارح­تار­عا نەگىزدەلگەن. ولاردىڭ كوپشى­لى­گى وزدەرىنىڭ مۇددەلەرىن قور­عاي­تىنى بەلگىلى. ەگەر وزگە دامىعان ەلدەردەگىدەي ەل ەكونوميكاسى شاعىن جانە ورتا بيزنەستىڭ ۇلە­سىندە بولعاندا، جاعداي مۇلدە باسقاشا بولار ەدى. ال ەندى الگى الپاۋىتتاردان قان­داي دا ءبىر كۇردەلى وزگەرىستەردى تالاپ ەتەر بولساق، وندا ولار ۇشاقتارىنا ءمىنىپ، شەتەل اسىپ كەتپەيتىنىنە كىم كەپىل؟

اشىعىن ايتۋ كەرەك، قازىرگى نارىقتىق زا­ماندا ونداي ءىرى ينۆەستورلارعا بارلىق مەم­لەكەتتەر تالاسۋعا بار. ال وسىدان كەيىن ەل ەكونوميكاسى ءبىر كۇننىڭ ىشىندە قۇل­دىراپ شىعا كەلمەي مە؟ سوندىقتان دا، اراعا التىن كوپىر سالا وتىرىپ، ءبىر جاق­تى جاعداي مەن ەلگە ۇتىمدى شەشىم جاساۋ ەل پرەزيدەنتىنىڭ باستى مىندەتى ەكە­نىن ءتۇسىنۋىمىز قاجەت.

بۇل جۇمىستا پرەزي­دەن­تى­مىزگە كۇش پەن قۋات، جالىندى جىگەر بەرەتىن حالىقتىڭ وزى­نە دەگەن رياسىز سەنىمى مەن ەلبا­سى­نىڭ قولداۋى. سوندىقتان ءبىز ءبارىمىز ءبىر جاعادان باس، ءبىر جەڭنەن قول شىعارا وتى­رىپ، جاقسى نيەتپەن باسشىمىزدى ەل بولىپ قولداپ، جىگەرلەندىرىپ دەمەۋ بەر­گە­نىمىز ابزال.

كەيبىرەۋىمىز ءوز وتباسىمىزدى باسقارا الماي وتىرىپ، مەملەكەت باسشىسىنا قيسىنسىز سوزدەر ايتامىز.

پرەزيدەنت – ءبىر عانا قازاقتى ەمەس، ميلليونداردان تۇراتىن قازاق ەلىن باسقارىپ وتىرعان تۇلعا. وسىنى ەستەن شىعارماساق ەكەن.

ارينە قوعامىمىزدا وزگە­رىس­تەر بولۋ كەرەك. بولادى دا. قازاقستان دامىعان دەموك­راتيا­لىق مەملەكەتكە اينالۋى حاق. بىراق ءبىز وعان رەۆوليۋتسيالىق جولمەن ەمەس، ەۆوليۋتسيالىق جول­مەن كەلۋىمىز كەرەك.

ەگەردە ايتىپ وتىرعان بىتەۋ جارانىڭ بەتى اشىلىپ كەتسە، بۇدان دا قيىن، بۇدان دا كۇر­دە­لى كەزەڭگە تاپ بولارىمىز انىق. ساراپشىلاردىڭ باعام­داۋىن­شا، ەگەر دە قازاقستاندا جاعداي ۋشىعىپ كەتەر بولسا، ەلىمىز كەم دەگەندە 25 جىلعا كەيىن شەگى­نە­دى. دەمەك، جاقسى ءومىر دە، ءبىز ارمان­داعان ادەمى زامان دا جوق بولادى. ال بيلىك دارمەنسىزدىككە ۇرىنسا، ءبىزدى جان-جاقتان قورشاپ وتىرعان الپاۋىت كورشى­لە­رىمىز ش­ەت وبلىستارىمىزدى ءبولىپ اكەتپەۋىنە كىم كەپىل؟ بۇل – اششى شىندىق. بىزگە، ءبىز­دىڭ بالالارىمىزعا بۇل قاجەت پە؟ ارينە جوق. سون­دىق­تان حالىقتىڭ بىرلى­گىن بەكەم ۇستاپ، مەملەكەتتىلىگىمىزدى قالاي دا نى­عاي­تۋىمىز قاجەت.

«مىنا زامان توي تويلاتىن ەمەس، وي ويلايتىن زامان»، دەپ پرەزيدەنتىمىز قاسىم-جومارت كەمەل ۇلى اتاپ وتكەن بولا­تىن. تۇ­سىنگەن ادامعا راسىندا دا وي سالار ءسوز. ارقاشان قازاق ەلىندە جاستارعا اقىل بەرەتىن، ەلدى بىرىكتىرەتىن زيالى قا­ۋىم وكىل­دە­رى بولاتىن.

ەل باسىنا كۇن تۋعان ۋاقىت­تا، ءتان اۋىرۋىمەن بىرگە جانى كۇيزەلگەن ەلدى سابىرعا شاقى­رىپ، ساليقالى ءسوز ايتاتىن زيالى قاۋىم، عالىمدار، ونەر قاي­رات­كەر­لە­رى ەمەس پە ەدى. جار استىن­دا جاۋ بارىن الىستان بولجاپ، ەلگە اقىل ايتاتىن سول زيالى­لارىمىز وسىندايدا ەل شەتىنە شىعىپ، ەل باسقارۋ جولىندا ساليقالى ءسوز ايتسا دەيمىن. مەملەكەت باسشىسىنىڭ جۇرگىزىپ وتىرعان زاماناۋي كەشەندى باس­قا­رۋ جولىن حالىققا تۇسىندىرۋگە اتسالىساتىن ەل اعالارى كوبەيسە يگى.

قيىن-قىستاۋ زاماننان ەلىمىز امان شى­عىپ دامۋدىڭ داڭعىل جولىندا بولايىق، اعايىن! دەنىمىز ساۋ، باسىمىز امان، جۇرە­گى­مىز تازا بولسىن!

اقىلبەك كۇرىشباەۆ،

ۇعا اكادەميگى،

س.سەيفۋللين اتىنداعى قازاق اگروتەحنيكالىق ۋنيۆەرسيتەتىنىڭ رەكتورى