تۋريزم • 24 شىلدە، 2020

ءۇمىت وتىن ۇرلەيدى

28 رەت كورسەتىلدى

جامان تۇماۋ جالپاق الەمدى جابىرقاتىپ تۇرعانىمەن، اقمولا وبلىسىنىڭ تۋريزم سالاسى ىشكى تۋريزمنەن ءۇمىتتى. ات ءىزىن سالعان ادامعا ايناكول ءتىل جەتپەيتىن تىلەك ايتىپ، بۋراباي باۋىرىنداعى بار قادىرلىسىن سايلاۋدا.

قازىرگى تاڭدا وڭىردەگى بار­لىق تۋريستىك نىساندار بەكى­تىل­گەن تالاپتارعا ساي قىزمەت ات­قا­­رۋعا دايىن. وڭىرلىك تۋريزم باس­قارماسىنىڭ باسشىسى ءۋالي­حان عابدۋلليننىڭ ايتۋىنا قا­را­عاندا، دەمالىس نىساندارى جازعى ماۋسىمعا تاس-ءتۇيىن دا­­­ي­ىن­دىقپەن كەلدى. كەيبىر ساراپشىلار تۋريزمنەن تۇسەتىن تابىس بيىل ەداۋىر ازايادى دەگەنمەن، باسقارمانىڭ ماماندارى وتكەن جىلدان كەم بولمايدى دەگەن ءۇمىتتى بولجام اي­تۋدا. ال وتكەن جىلى بۇل كور­سەتكىش 1 ميلليون 300 مىڭنان اسقان بولاتىن.

– بارلىق نىسانداردىڭ ازىر­لىگى ساراپتالىپ، ءتيىستى اكتىلەر تول­تىرىلدى. شەكارا جابىق بول­عانىمەن، ءۇمىتىمىز ىشكى تۋريزمدە، – دەيدى باسقارما باسشىسى ءۋاليحان عابدۋللين.

بيزنەس وكىلدەرى وتكەن ەكى ايدا­عى شىعىن­دارىن ەسەپتەپ، ەندى سو­نى وتەۋ جولدا­رىن ىزدەستىرۋدە. ال تۋريس­تەر بولسا عالامتور جەلىسىن شار­لاپ ءجۇر. ولارعا ءتيىمدىسى كە­رەك. بۇل ورايدا وبلىستىق دەم­الىس جانە تۋريزم يندۋستريا­سى قاۋىمداستىعىنىڭ توراعا­سى شىناربەك باتىرحانوۆ­تىڭ ايتۋى­نا قاراعاندا، ەل ءىشى اقپا­راتتىق سايتتارعا مەيلىنشە كوپ نازار اۋدارىپ وتىرعان. دەمەك، وتان­دىق دەمالىس ورىندارىن ىش­كى تۋريستىك اعىنمەن مەلتەكتەي تولتىرۋعا مۇمكىندىك مول. سوڭ­عى ۋاقىتتا تۋريستىك بيز­نەس سان­دىق ماركەتينگتىڭ مول مۇم­كىن­دىگىن جاڭاشا باعالاي باستا­عان. قاۋىمداستىق ەكى اي بويى ىشكى مۇمكىندىك پەن دەمالىس ورىن­­دارىنىڭ بار جاقسىسىن جان-جاقتى جارنامالاعان ەكەن. نا­تي­جەسى الداعى ۋاقىتتا بەلگىلى بو­لادى.

ءبىر قۋانىشتىسى، ماۋسىم باس­تالماي جاتىپ، ەل ادامدارى دەمالىس ورىندارىنا الدىن الا تاپسىرىس بەرە باستاعان. جوعارىدا ءبىز ايتقان ىشكى تۋريزمدەگى ءۇمىتتىڭ وتىن جاعىپ تۇرعان دا وسى جايت. ال باعا تۋرالى ءبىر اۋىز ءسوز ايتاتىن بولساق، ساراپشىلار بيزنەس قۇرىلىمداردىڭ شىعىندارى مەن نارىقتاعى اۋمالى-توكپەلى وزگەرىستەردى ەسكەرە كەلىپ، بيىلعى جىلعى جولداما 15 پايىز شاماسىندا قىمباتتاۋى ابدەن مۇمكىن دەگەن بولجام ايتىپ وتىر.

قالاي بولعان كۇندە دە وب­لىس­تاعى تۋريزم كلاستەرى جادىراعان جاز ايلارىندا تىنىعىپ، دەم الا­مىن دەگەن كەلۋشىنىڭ بار جاع­دا­يىن جاساۋعا ءازىر. تۋريزم سالا­سىن­دا 700-گە جۋىق كاسىپورىن جۇ­مىس ىستەيدى. وبلىستىڭ ءتۋ­ريزم­دى دامىتۋ قۋاتى تەك جاز­دا عانا ەمەس، قاقاعان قىستا دا قو­لايلى جاعداي تۋعىزۋعا ءازىر. ءسوز اراسىندا تاۋ شاڭعىسى بازا­­سىن، بىرنەشە قىزىقتى دا ماز­مۇن­دى تۋريزم باعىتتارىن ايتا كەتۋگە بولادى. ونىڭ ۇس­تى­نە سوڭعى جىلدارى ەمدەۋ-ساۋىق­­تىرۋ، مادەني-تانىمدىق، ەكو­لو­گيا­لىق، بۇقارالىق سپورت­تىق جانە ىسكەر­­لىك تۋريزم سالالا­رى­نا باسىمدىق بەرىلىپ وتىر. 2019 جىلى «بۋراباي» كۋرورتى – تاۋەلسىز مەملەكەتتەر دوس­تاستىعى شەڭبەرىندە رەسەيدىڭ بە­­دەلدى «تۋر­ستات» باسىلىمى­نىڭ زەرت­تەۋىنە قاراعاندا، كوش باستاپ تۇر­عان­دىعى بەلگىلى بولعان.

حالىقتىڭ دۇمەپ كەلەتىن كەزى سۋعا شومىلۋ مۇمكىندىگى بار جانعا جايلى جازعى ماۋسىم. ادەتتە ماۋسىمنان قىركۇيەككە دەيىن جەرگىلىكتى ساۋىقتىرۋ ورىندارى 500 مىڭنان استام تۋريستەردى قابىلداپ، قىزمەت كورسەتەدى. ال ساۋىقتىرۋ ورىندارىنىڭ تار­ماقتالعان جەلىسى تاۋلىگىنە 9 مىڭ­نان استام ءتۋريستى قابىل­داۋ­عا مۇمكىندىگى بار. سوڭعى جىل­­دارى ءتۋريزمدى دامىتۋعا ايتار­­لىقتاي كوڭىل بولىنۋدە. بۇل جاي­عا 2019 جىلعى 31 مامىر­دا قا­زاق­ستان رەسپۋبليكاسى ۇكى­مە­تىنىڭ قاۋلىسى مەن تۋريستىك سا­لانى دامىتۋدىڭ 2019-2025 جىل­دارعا ارنالعان مەملەكەتتىك باعدارلاماسىنىڭ شاراپاتى ءتيىپ تۇر. وسى باعدارلاما اياسىن­دا 30 شارا جۇزەگە اسىرىلۋدا. وبلىستىڭ ششۋچە–بۋراباي كۋرورت­تى ايماعىن دامىتۋدىڭ ءۇشىن­شى كەزەڭى شەڭبەرىندە 27 شارانى جۇزەگە اسىرۋ بەلگىلەنىپ، بەكى­تىلگەن بولاتىن.

جاڭاشا سەرپىن العان تۋريزم سالاسىنداعى نىسانداردىڭ سا­نى جىل ساناپ، اي ساناپ ءوسىپ كە­لەدى. جوعارىدا اتالعان جوبا شەڭ­بەرىندە جالپى قۇنى 100 ميلليارد تەڭگەنى قۇرايتىن اۋماعى 232 گەكتار الاڭ بولاتىن ۇلكەن شاباقتى مەن تەكەكول كولدەرىنىڭ اراسىندا «AQBURA Resort» كۋرورتتى ايماعىنىڭ قۇرىلىسى جۇرگىزىلۋدە. بۇل نەگىزىنەن وتباسىمەن دەمالۋشىلارعا ارنالعان كۋرورتتى ايماق. وقىرماننىڭ كوز الدىنا ەلەستەتۋ ءۇشىن ءسال عانا تاراتىپ ايتاتىن بولساق، 800 كىرپياز كوڭىلدىڭ تالعامىنان شىعاتىن بولمەلەرى بار قوناقۇيلەر. وعان قوسا، بۋراباي كەنتىندە قۇنى 6 ميلليارد تەڭگە بولاتىن 14 گەك­تار الاڭدا ءبىر نەگىزگى جوبا جۇ­زەگە اسىرىلۋدا. بۇل كەشەن جاڭا زاماننىڭ ۇلگىسى بويىنشا جار­قىراي بوي كوتەرۋدە. 

كۋرورتتى ايماقتى بارىنشا اباتتاندىرىپ، ايناداي جار­قى­راتىپ قويۋ ءۇشىن «شالە» بىرىڭعاي ءستيلى قۇرىلدى. تاريحى تاسىندا تۇنىپ تۇرعان تۋريستىك باعىتتار تازارتىلىپ، مۇنتازداي جارقىراپ تۇر. اينالما جولدىڭ ايرىعىن، الاڭداردى راسىمدەۋ، ورتالىق اللەيالاردى بەزەندىرۋ، «LED» ەكراندارىن ورناتۋ جۇمىستارى جۇرگىزىلۋدە. ۇيدەگى وي تولايىم جۇ­زەگە اس­سا، اۋاسى دەرتكە داۋا، جان­عا شي­پا بۋراباي باۋرايى جاز بويى ەلى­مىزدىڭ تۇكپىر-تۇكپىرىنەن كەلگەن مەيماندارمەن تولىپ بۋىر­قانىپ تۇرماق.

 

اقمولا وبلىسى

 

سوڭعى جاڭالىقتار

URKER ۇسىنعان ۇزدىكتەر

ونەر • بۇگىن، 07:57

كوروناۆيرۋس باسەڭدەر ەمەس

الەم • بۇگىن، 07:56

كەشىرىم ايى كەلدى

رۋحانيات • بۇگىن، 07:50

بيزنەستە ايەلدەردىڭ ۇلەسى قانداي؟

ەكونوميكا • بۇگىن، 07:38

ءۇشىنشى بەسجىلدىق: مەجە مەن مىندەت

ەكونوميكا • بۇگىن، 07:35

بايراعى بيىك باعزى ونەر

رۋحانيات • بۇگىن، 07:33

ورازانىڭ ءار ءساتى ساۋاپ

رۋحانيات • كەشە

ءسوزدىڭ جەتى بوياۋى

تانىم • كەشە

ۇقساس جاڭالىقتار