«جازمىشتان وزمىش جوق», قايىربەك اعا وتكەن جىلدىڭ شىلىڭگىر شىلدەسىندە كەلمەستىڭ كەمەسىنە ءمىنىپ كەتە باردى. ال ونىڭ ارتىندا ەرتىستىڭ پاۆلودار ولكەسىن جان-تانىمەن ءسۇيىپ انگە قوسقان ولمەس مۇراسى قالدى...
شىعىس قازاقستان ۋنيۆەرسيتەتىنىڭ مۋزىكا فاكۋلتەتىنىڭ تۇلەگى, 1994 جىلى ۇيىمداستىرىلعان وبلىستىق كومپوزيتورلار وداعىنىڭ لاۋرەاتى, 2000 جىلى «جىل كومپوزيتورى» اتانعان, ۇزاق جىلدار پاۆلودارداعى ب.احمەتوۆ اتىنداعى پەداگوگيكالىق كوللەدجدىڭ اعا وقىتۋشىسى بولعان كومپوزيتور قايىربەك ساتيەۆتىڭ ەسىمى كوپشىلىككە جاقسى تانىس ەدى.
«اق قايىڭ», «شاڭىراق», «پاۆلودارىم», «اكە تىلەگى», «ۇستازىما», «بوبەگىم», «نا يرتىشە», «ۆ ميرە ليۋبۆي», «اقمارال», «جاۋقازىن», «ستۋدەنت» سەكىلدى ونداعان ءان جازىپ, اسىرەسە سوڭعى ءۇش ءانى رەسپۋبليكالىق ءتۇرلى ونەر شارالارىندا ءجيى شىرقالعان تالانتتى كومپوزيتوردىڭ سوڭىندا تاماشا اندەرى مەن ء«انىم انگە جالعاسسىن» اتتى اندەر جيناعى, سونان سوڭ, ارينە, ءوزى ونەر الەمىنە شىڭداعان شاكىرتتەرى قالدى.
قايىربەك مۇفتان ۇلى 1948 جىلى ءنوۆوسىبىر قالاسىندا دۇنيەگە كەلدى. قازاقتىڭ باسىنا ناۋبەت بولىپ تونگەن وتكەن عاسىردىڭ وتىزىنشى جىلدارىنداعى اۋىرتپالىق قالياسقار اۋلەتىنە دە وڭاي تيمەگەن, اشارشىلىقتا رەسەيگە اۋىپ كەتكەن. كەيىن ءبىراز جىلدار ءوتىپ, ەل باۋىرىن كوتەرە باستاعان تۇستا بۇل اۋلەت ماي اۋدانىنىڭ اقشيمان اۋىلىنا كوشىپ كەلگەن ەكەن. قايىربەك مۇفتان ۇلى اۋىلدا ورتا مەكتەپ بولماۋى سەبەپتى جوعارى سىنىپتى اۋدان ورتالىعى كوكتوبەدەگى ينتەرناتتا وقىپ ءبىتىردى. وقۋشى كەزىنەن سىرنايدا ويناپ, كوركەمونەرپازدار ۇيىرمەسىنە قاتىستى. سوناۋ جىلدارداعى وبلىستىق تەلەارنادا ۇيىمداستىرىلاتىن «مايرا» اتتى ەل ىشىندەگى تالانتتاردى تانىتقان باعدارلاما ەل ەسىندە بولار. وسى باعدارلاما كوكتوبەلىك تالانتتى جاس بۋىندى تانىتتى, ولاردىڭ قاتارىندا سىرنايشى, ءانشى قايىربەك ساتيەۆ تە بار ەدى.
قايىربەك اعا كوزى تىرىسىندە وبلىستىق «سارىارقا سامالى» گازەتىنىڭ شىعارماشىلىق ۇجىمىمەن تىعىز قارىم-قاتىناستا بولدى. ەكى مىڭىنشى جىلداردىڭ باسىندا وسى باسىلىمدا ەڭبەك ەتكەن جۋرناليست قايرات ءابىلدانىڭ (قازىر رەسپۋبليكالىق «Egemen Qazaqstan» گازەتىنىڭ قىزمەتكەرى – اۆت.) سوزىنە جازعان «اق قايىڭ», «پاۆلودارىم» اتتى اندەرى كوپشىلىكتىڭ كوڭىلىنەن شىققان ەدى. ودان بەرىدە تالانتتى كومپوزيتور «سارىارقا سامالى» گازەتىنىڭ 90 جىلدىق مەرەيتويىنا ءان جازىپ, تارتۋ ەتتى.
«الەم ءان سالىپ تۇرادى, ول – تىلسىم قۇدىرەتىنىڭ سازى. ونى تىڭداپ, ۇعىنۋ ءۇشىن سانا مەن سەزىم كەرەك. دۇنيە, ءومىر, تىرشىلىك – ۇشەۋى ءبىر ۇعىم. ۇشەۋى دە اننەن قۇرالعان. اسپانعا قارا, تىڭدا, كۇمبىر كۇي جەتەدى, جەلدى تىڭدا, سىبىر-كۇبىر... مەن كەيدە جول ءجۇرىپ كەلە جاتىپ, سايىن دالانىڭ دىبىسىن تىڭداعاندى ۇناتامىن. سوندايدا قۇلاعىما الدەبىر اۋەن كەلەدى. ءومىر – اۋەن, تىلسىمنىڭ ءانى – قۇدىرەتتىڭ كۇشى وسى عوي دەپ ويلايمىن», دەگەن ەدى ءبىر سۇحباتىندا قايىربەك اعا تولعانىپ وتىرىپ. راس, سازگەر اعانىڭ ءوز ورتاسىندا دا, شاكىرتتەرى, قالىڭ كوپشىلىك اراسىندا دا بەدەلدى, سىيلى, قۇرمەتى بولەك ازامات ەدى.
ونەرگە, ءبىلىم سالاسىنا قىزمەت ەتىپ, شەن-شەكپەنگە ۇمتىلماي, ادىلدىكتى تۋ ەتىپ كوتەرگەن, ءومىر بويى جۇرەگى ءان دەپ سوققان قايرەكەڭدەي – قايىربەك ساتيەۆتەي ونەر قايراتكەرىنىڭ جارقىن بەينەسى ۇمىتىلمايدى دەپ سەنەمىز.
سايا مولدايىپ,
قازاقستان رەسپۋبليكاسى اقپارات سالاسىنىڭ ۇزدىگى
پاۆلودار
