پىكىر • 24 شىلدە، 2020

جاماندىقتان جاۋاپكەرشىلىك قۇتقارادى

191 رەت كورسەتىلدى

كوزگە كورىنبەيتىن، قولعا ۇستاپ كورۋگە بولمايتىن ۆيرۋس الەمدى ابىگەرگە سالىپ، قازاق حالقىنىڭ باسىنا دا قارا بۇلتتاي ءۇيىرىلىپ، اينالاسى از ۋاقىتتىڭ ىشىندە تالاي-تالاي تۇلعالارىمىزدى ارامىزدان الىپ كەتكەنى قابىرعامىزدى قايىستىرادى. قارالى حابارلاردى ەستىگەن سايىن، جانارىمىزعا جاس ءۇيىرىلىپ، جۇرەگىمىز قارس ايىرىلارداي كۇيدە وتىرعانىمىز انىق.

ەل پرەزيدەنتى حالقىمىزدىڭ تاعدىرى تاريح تارازىسىندا تۇر دەپ بەكەردەن-بەكەر اتاپ وتكەن جوق. قازاق حالقى سان عاسىرلار بويى وركەنيەت الەمىندە پارا­سات­­تىلىقتىڭ ۇلگىسىندەي بولىپ كەلسە، ءدال بۇگىندە ەلىمىز وتكە­نىنە، اتا-بابا جولىنا ءبىر قارايلاي وتىرىپ، كەلەر ۇرپا­عىنىڭ ساۋلىعى جولىندا اتى جامان ىندەتتى جەڭۋدەگى ارە­كەت-قيمىلدارىن توقتاتپاۋى قاجەت. ءار مينۋت، ءار ساعات سايىن اللا­دان ەلدىڭ اماندىعىن تىلەپ وتىر­عان كەزەڭدە جاستارىمىز سانيتارلىق تالاپتاردى ساقتاپ، كارانتين رەجىمىن بۇزباۋدى تۇسىنسە ەكەن دەيمىز. مەنىڭ التى جاس­تاعى شوبەرەم «تابيعات بىزگە قاتتى رەنجىدى، جاع­دايى­مىزدىڭ ناشارلاعانى سودان» دەگە­نىندە ۇلكەن ءمان جاتىر ما دەي­مىن. دەرتكە شالدىققان قانشاما قان­داس­­تارىمىزدىڭ تاعدىرى قىل ۇس­تىندە تۇر. ادام جانىنا اراشا تۇسكەن مەدي­تسينا قىز­مەت­كەر­لەرىنىڭ جاعدايى كوز الدىمىز­دا ءوتىپ جاتىر. ولار ايلار بويى بالا-شاعاسىنان جىراقتا اپاتپەن كۇرەسىپ، ءوز ومىرلەرىن قاتەرگە تىكتى.

سوندىقتان دا ەل باسىنا كۇن تۋعان كەزەڭدە سابىر ساقتاپ، اركىم ءوز ومىرىنە، بولاشاققا اسقان جاۋاپ­­­كەرشىلىكپەن قاراسا دەيمىن. «ساقتانساڭ، ساقتايمىن» دەگەن حالىق دانالىعى تەكتەن-تەككە ايتىلماعان عوي.  كوكىرەك كوزىن وياتىپ، ءوزىمىز عانا ەمەس، باۋىرلارىمىزعا دا جاناشىرلىق تانىتۋ اركىمنىڭ مىندەتى. بۇل ىندەتتى بارشامىز جۇدىرىقتاي جۇمىلىپ، ۇيىمشىلدىق تانىتقاندا عانا جەڭە الامىز. اللا تاعالا بارشامىزعا كۇش-قۋات بەرىپ، امان-ەسەن قاۋىشار كۇندەر جىلدام جەتسە ەكەن دەپ تىلەيمىن.

 

بيبىگۇل تولەگەنوۆا،

كسرو جانە قازاقستاننىڭ حالىق ءارتىسى، كسرو جانە قازاقستان مەملەكەتتىك سىيلىقتارىنىڭ  لاۋرەاتى، سوتسياليستىك ەڭبەك ەرى

 

سوڭعى جاڭالىقتار

تاميلانىڭ تارتۋى

ونەر • بۇگىن، 23:00

قارا جولداعى قاتەر

بۇگىن، 22:56

مۋتاتسيالانعان ۆيرۋس

مەديتسينا • بۇگىن، 22:15

جىراۋلىق ونەردىڭ جاناشىرلارى

رۋحانيات • بۇگىن، 21:56

Big Tech كومپانيالارىنىڭ قارجىلىق ماسەلەسى

باعدارلامالار • بۇگىن، 21:30

ۇستازى جاقسىنىڭ ۇستامى جاقسى

رۋحانيات • بۇگىن، 18:30

بالقاشتا قار جاۋىپ جاتىر

اۋا رايى • بۇگىن، 15:48

ۇقساس جاڭالىقتار