شارا 24 ماۋسىمدا باستالعان – تۇرعىن ءۇي كەشەندەرىنىڭ ءبىرىنىڭ تۇرعىندارى پاندەميا كەزىندە مەديتسينا قىزمەتكەرلەرىنە تۇسكەن جۇكتەمە تۋرالى ەستىپ, اقشا جيناپ, ەكى ەمحاناعا تۇسكى اس جەتكىزىپ تۇرۋعا شەشىم قابىلدادى.
"مۇنداي ەرىكتى قوزعالىس اياق استىنان, الدەكىم ەلوردا اۋرۋحانالارىنىڭ بىرىندە جاعداي اۋىر بولعاندىقتان جانە ىستىق تۇسكى اس ساتىپ الۋ مۇمكىندىگىنىڭ جوقتىعىنان دارىگەرلەردىڭ تەز دايىندالاتىن كەسپە جەيتىنى جايلى بولىسكەن كەزدە پايدا بولدى. سول ساتتە اقشا جيناپ, №1 جانە 2 قالالىق اۋرۋحانالارعا ىستىق تاماق, سونىمەن قاتار شايعا ارنالعان كىشكەنە دەسەرتكە تاپسىرىس بەرۋ يدەياسى پايدا بولدى", – دەيدى اكتسيا قاتىسۋشىسى ساندۋعاش قۇرماناليەۆا.
تۇرعىن ءۇي كەشەنىنىڭ تۇرعىندارى دارىگەرلەرگە كومەكتەسۋ اكتسياسى تۇراقتى سيپات الادى دەپ ويلاماعان.
"باستامامىز تۋرالى بىلگەن ادامدار حابارلاسىپ, قالاي كومەكتەسۋگە بولاتىنىن سۇراي باستادى. بەي-جاي قارامايتىن قالا تۇرعىندارى مۇمكىندىگىنشە اقشا اۋداردى: بىرەۋ مىڭ, ال كەيبىرەۋلەر 50-100 مىڭ تەڭگە. تاماقتاندىرۋ ورىندارىنىڭ اكتسياسىنا قوسىلدىق. وسىدان كەيىن تاعى بىرنەشە اۋرۋحانانى ىستىق تاماقپەن قامتۋ تۋرالى ۇسىنىستار تۇسە باستادى. وسىلايشا اكتسيا كەڭ ەتەك الدى", – دەپ جالعاستىردى س.قۇرماناليەۆا.
بلوگەرلەر اكتسيا تۋرالى بىلگەننەن كەيىن, قازاقستاننىڭ تۇكپىر-تۇكپىرىنەن, ءتىپتى شەتەلدەن كەلگەن تۇرعىندار قاراجات جيناۋعا قوسىلدى. ازاماتتاردىڭ ۇيىمشىلدىعى ارقاسىندا ەرىكتىلەر ەلوردا ەمحانالارىنىڭ دارىگەرلەرىنە كۇنىنە 250-300 ىستىق تاماق جەتكىزەدى.
"قازىرگى ۋاقىتتا ءبىز التى اۋرۋحاناعا تاماق جەتكىزەمىز: №1, 2, №2 وبلىستىق اۋرۋحانا, قىرىقىنشى ستانتسياداعى كوپسالالى ورتالىق, ءبىرىنشى اۋرۋحاناداعى اكۋشەرلىك بلوك جانە تەمىرجول اۋرۋحاناسى. مەيرامحانالاردا ىستىق تاماق پەن دەسەرتتەرگە تاپسىرىس بەرەمىز. بۇرىن تاكسي ارقىلى جەتكىزەتىنبىز, بۇل قوسىمشا شىعىن. بىراق قازىر جەتكىزىلىمگە ەرىكتىلەر كومەكتەسەدى. مۇنداي اكتسيالار بۇكىل قازاقستان بويىنشا جالعاسىن تابادى دەپ سەنەمىز", – دەدى ساندۋعاش قۇرماناليەۆا. №1 قالالىق اۋرۋحانانىڭ قابىلداۋ ءبولىمىنىڭ دارىگەرى سامال ەلۋباەۆا ارىپتەستەرىنىڭ اتىنان الاڭداۋشىلىق تانىتقان ازاماتتارعا كورسەتكەن كومەگى ءۇشىن العىس ءبىلدىردى.
"كۇن سايىن ءبىز كوپتەگەن ناۋقاستاردى قابىلدايمىز. ءۇي جۇمىسىمەن اينالىسۋعا, بالالارمەن سويلەسۋگە ۋاقىت جوق. سوندىقتان مۇنداي كومەك ءبىز ءۇشىن وتە ماڭىزدى", – دەيدى ول.
بۇعان دەيىن اكتسيانىڭ باستاماشىلارى دارىگەرلەرگە تاماقتى تاكسي ارقىلى جەتكىزگەن. بۇل قوسىمشا شىعىن بولاتىن. قازىر ولارعا ەرىكتىلەر كومەكتەسۋدە.
"ەلوردانىڭ ءبىر توپ تۇرعىندارى دارىگەرلەرگە تاماق ساتىپ الادى. ءبىز, ەرىكتىلەر ەمحانالارعا جەتكىزۋگە كومەكتەسەمىز. بىرلەسىپ, جاقسى ىستەر جاساۋىمىز كەرەك", – دەيدى ەرىكتى كومەكشى سۇلتان اللابەرگەنوۆ.
