قانداي ماماندىقتارعا گرانتتار ءبولىندى, كوللەدجگە ءتۇسۋ ءۇشىن قانداي قۇجاتتار قاجەت جانە جەڭىلدىكتەردى قالاي الۋعا بولادى؟ وسى جانە باسقا دا سۇراقتارعا تالاپكەرلەر ۇيدەن شىقپاي-اق جاۋاپ الا الادى. ەلوردالىق كوللەدجدەردىڭ سايتتارىندا ۆيرتۋالدى قابىلداۋ قىزمەتى جۇمىس ىستەيدى. اسسيستەنتتەر كەلىپ تۇسكەن سۇراقتارعا 3-5 مينۋت ىشىندە جاۋاپ بەرەدى.
ء"بىز بەس كۇن بۇرىن ۆيرتۋالدى قابىلداۋدى ىسكە قوستىق, قازىردىڭ وزىندە 200-دەن استام ءوتىنىش كەلىپ ءتۇستى. كوبى گرانتتار مەن جەڭىلدىكتەر بار ماماندىقتارعا قۇجاتتاردى قالاي تاپسىرۋ كەرەگىن سۇراپ جاتىر. اۋىلدىق جەردەن كوپتەگەن وتىنىشتەر بار. ۆيرتۋالدى اسسيستەنت 24/7 رەجيمىندە جۇمىس ىستەيدى, بىردە-ءبىر سۇراق جاۋاپسىز قالمايدى", دەدى پوليتەحنيكالىق كوللەدجدىڭ ديرەكتورى قاسىمحان سەنعازىەۆ.
ونىڭ ايتۋىنشا, قازىرگى ۋاقىتتا بارلىق كەڭەستەردى كوللەدجگە بارىپ الۋعا بولادى. الايدا پاندەميا كەزىندە قاۋىپسىزدىك ماقساتىندا قارىم-قاتىناستى شەكتەگەن دۇرىس. ۆيرتۋالدى قابىلداۋ كوميسسيالارى 20 تامىزعا دەيىن 33 ەلوردالىق كوللەدجدىڭ سايتتارىندا جۇمىس ىستەيتىن بولادى.
