ءماسليحات دەپۋتاتتارىنىڭ اۋقىمدى قىزمەتى

وسىدان 5 جىل بۇرىن بارلىق دەڭگەيدەگى ءماسليحات دەپۋتاتتارىنىڭ باسىن قۇرايتىن رەسپۋبليكالىق بىرلەستىك قۇرىلعان بولاتىن. اتالعان مەرزىم ىشىندە بىرلەستىك كوپتەگەن جۇمىستار اتقارىپ, ەكى كونفەرەن­تسياسىن وتكىزسە, ەندى ءۇشىنشى باسقوسۋلارىنا استاناعا جينالدى. “قازاقستان ءماسليحاتتارى دەپۋتاتتارىنىڭ بىرلەستىگى” رەسپۋبليكالىق قوعامدىق بىرلەس­تىگىنىڭ ءىىى كونفەرەنتسياسىنا ەلىمىزدىڭ بارلىق ايماقتارىنان وكىلدەر كەلدى. بۇگىندە بىرلەس­تىك­تىڭ 3925 مۇشەسىنىڭ 2955-ءى دەپۋتاتتار بولىپ تابىلسا, بۇل ەلىمىزدەگى بارلىق ءماسليحات دەپۋتاتتارىنىڭ 91 پايىزىن قۇرايدى. جانە, سونىمەن بىرگە, بىرلەستىكتىڭ ماقساتى مەن مىندەتىن ماقۇلداعان 1 مىڭعا جۋىق ادام وعان مۇشە بولىپ تىركەلگەن. ەسەپتى مەرزىمدە بىرلەستىك ەلدەگى بارلىق ساياسي ۇدەرىستەرگە بەلسەنە قاتىستى جانە بارلىق دەڭگەيدەگى ءماسليحاتتاردىڭ كۇش-جىگەرىن وسى باعىتتا ۇيلەستىردى, حالىقتىڭ مەملەكەتتىڭ جۇرگىزىپ وتىرعان ساياساتىنا دەگەن وڭ كوزقاراسىن قالىپتاستىرۋعا ۇلەسىن قوسىپ, قازاقستاننىڭ قوعامدىق جانە ساياسي ومىرىندە ەلەۋلى ءرول اتقاردى. وسىنى ايتقان بىرلەستىك توراعاسى قاسىمبەك مەديەۆ جينالعانداردى ءبىراز جايعا قانىقتىردى. ماسەلەن, بىرلەس­تىك­تىڭ ورتالىق كەڭەسى مەن ونىڭ بيۋروسى, سون­داي-اق جەكەلەگەن دەپۋتاتتارى قازاقستان رەس­پۋب­ليكاسىنىڭ قولدانىستاعى جانە ازىرلەنىپ جاتقان زاڭدارىنىڭ جوباسىنا ۇسىنىستار, تولىقتىرۋلار مەن وزگەرىستەر دايىنداۋ جونىندەگى جۇمىستارعا بەلسەنە قاتىسقان. اتاپ ايتقاندا, وننان استام زاڭنامالىق اكتىلەرگە ۇسىنىستار, وزگەرىستەر مەن تولىقتىرۋلار ەنگىزۋگە باستاماشى بولعان. ەسەپتى مەرزىم ىشىندە بىرلەستىكتىڭ ورتالىق كەڭەسىنىڭ ەكى كونفەرەنتسياسى, جەتى كەڭەيتىلگەن وتىرىسى, ورتالىق كەڭەس بيۋروسىنىڭ ون سەگىز ءماجىلىسى, بىرنەشە “دوڭگەلەك ۇستەلدەرى” وتكىزىلىپتى. سونداي-اق باياندامادا “قازاقستان ءماسليحاتتارى دەپۋتاتتارىنىڭ بىرلەستىگى” پارلامەنت سەناتىنىڭ توراعاسى قاسىم-جومارت توقاەۆتىڭ باسشىلىق ەتۋىمەن وسىدان ەكى جىل بۇرىن قۇرىلعان پارلامەنت سەناتىنىڭ جانىنداعى جەرگىلىكتى وكىلەتتى ورگاندارمەن (ماسليحاتتارمەن) ءوزارا ىقپال­داستىق جونىندەگى كەڭەسپەن وتە ناتيجەلى جۇمىستار اتقارعانى, بۇقارالىق اقپارات قۇرالدارىمەن تىعىز بايلانىستا جۇمىس ىستەگەنى زور ريزاشىلىقپەن اتالدى. باياندامادان سوڭ ءار وبلىستار مەن قالالاردان كەلگەن ءماسليحات حاتشىلارى ءسوز الدى. الماتى وبلىسىنان ارداق سىدىق, كۋرچاتوۆ قالاسىنان شاحمۇرات تولەۋباەۆ, پاۆلوداردان رينات گافۋروۆ, قاراعاندىدان قۇدايبەرگەن بەكسۇلتانوۆ ورتاعا شىعىپ, بىرلەستىك جۇمىسىن جوعارى باعالادى جانە قوعامدىق ۇيىمنىڭ اتقارعان ىستەرىنە ريزاشىلىقتارىن جەتكىزىپ, ونىڭ جەرگىلىكتى ءماسليحات تىنىسىن كەڭەيتۋگە كوپ ۇلەس قوسقانىن اتاپ ءوتتى. ءار دەڭگەيدەگى ءماسليحاتتار دەپۋتاتتارى باس قوسقان جيىننىڭ سوڭىندا وعان قاتىسۋشىلار بىرلەستىكتىڭ ورتالىق كەڭەسىنىڭ جاڭا توراعاسى ەتىپ تولەۋبەك مۇقاشەۆتى, ورىنباسارلىعىنا ۆلاديمير رەدكوكاشيندى, ال “قازاقستان ءماسليحاتتارى دەپۋتاتتارىنىڭ بىرلەستىگىنىڭ” قۇرمەتتى توراعالىعىنا قاسىمبەك مەديەۆتى سايلادى. انار تولەۋحانقىزى.