ايماقتار • 21 شىلدە، 2020

ليبەرالدى زاڭداردى قاتاڭداتپاسا بولمايدى

42 رەت كورسەتىلدى

جىل باسىنان بەرى سولتۇستىك قازاقستان وبلىسىندا ۇستالعان 19 ماس جۇرگىزۋشى سوت ارقىلى جۇرگىزۋشىلىك كۋالىگىنەن ايرىلعان، دەپ حابارلايدى Egemen.kz

الايدا سولاردىڭ كوبى كەزەكتە رەت ۇستالعانشا رولگە وتىرىپ، جۇرە بەرەدى. بۇل بىزدەگى زاڭنىڭ بوستىعى، سونىڭ سالدارىنان تۋىنداعان قۇقىلىق نيگيليزم دەگەن ءسوز. بىزدە زاڭ تالابى قاتاڭ بولماسا – ونى ەشكىم دە سىيلامايدى.

سوندىقتان، ماس بولعانى ءۇشىن جۇرگىزۋشىلىك كۋالىگى عانا الىنباي، كەم دەگەندە ءبىر جىل باس بوستاندىعىنان ايرىلسا – وندا جۇرگىزۋشى رولگە ەكىنشى رەت ماس بولىپ وتىرۋدان قورقار ەدى. قورىققان سوڭ زاڭدى سىيلار ەدى. بىزدەگى شەتەلدىكتەردىڭ ليبەرالدى زاڭ جوبالارىن كوشىرىپ الىپ، پارلامەنتكە ۇسىناتىن زاڭگەرلەرىمىز وندايدى ەلەمەيدى. حالىقتىڭ مەنتاليتەتى باسقا ەكەنىن ۇقپايدى.

سونىڭ ءبىر مىسالى مىناداي: شال اقىن اۋدانىنىڭ پوليتسياسى "متز-82" تراكتورىن ايداپ كەلە جاتقاندا 48 جاستاعى ماس جۇرگىزۋشىنى توقتاتقان. ول وتكەن كۇزدە عانا 3 جىلعا باسقارۋ قۇقىعىنان ايىرىلعانى بەلگىلى بولدى. ايتەۋىر، ۇلكەن اپات جاساۋعا ۇلگەرمەدى.

وسى وقيعادان ەكى كۇن وتكەننەن كەيىن عانا جامبىل اۋدانىنىنىڭ ەگىستىكتەگى جولىندا قوستاناي وبلىسىنىڭ 49 جاستاعى تۇرعىنى «Volkswagen Caravelle» اۆتوكولىگىن باسقارا الماي اۋدارىلعان. ماساڭ جۇرگىزۋشى ەمدەلۋگە جاتقىزىلدى. بۇرىن ول ماساڭ كۇيدە كولىك جۇرگىزگەنى ءۇشىن ەكى رەت جاۋاپقا تارتىلعان. ەكىنشى رەت ۇستالعاندا سوت شەشىمىمەن 2025 جىلعا دەيىن كولىك باسقارۋعا تىيىم سالىنعان. ال ول بولسا جەڭىل كولىكتى زۋلاتىپ جۇرە بەرگەن...

"ماساڭ كۇيدە كولىك باسقارۋ – جولداعى اپاتتىلىقتىڭ قاۋپىن تۋدىراتىن جول قوزعالىسى ەرەجەلەرىن ورەسكەل بۇزۋشىلى"، دەيدى سقو پد باستىعىنىڭ مىندەتىن اتقارۋشى، پوليتسيا پولكوۆنيگى ەڭبەك سەمبين.

ءبىر سوزبەن ايتقاندا، زاڭ قاتاڭداتىلماسا، زارداپ شەگۋ ازايمايدى.

 

سولتۇسستىك قازاقستان وبلىسى

سوڭعى جاڭالىقتار

ۇقساس جاڭالىقتار