ەلىمىزدىڭ باس پروكۋراتۋراسى ۇلكەن حالىقارالىق شۋ تۋدىرعان گەرمانياداعى ەلشىلىك قىزمەتكەرلەرىنە قاتىستى قىلمىستىق ءىس قوزعادى. فرانكفۋرتتاعى باس كونسۋل احات الپىسباەۆ پەن ونىڭ كومەكشىسى قازىر تۇتقىندا. بۇل تۋرالى «كتك» تەلەارناسى حابارلادى.
ەكەۋىنە ءىرى كولەمدە كونتراباندامەن اينالىستى دەگەن ايىپ تاعىلعان. سىرتقى ىستەر ءمينيسترى بۇل ارەكەتتى ماسقارا دەپ باعالاپ, شەتەلدەگى بارلىق قىزمەتكەرلەرىن جاپپاي تەكسەرۋگە تاپسىرما بەردى. «وكىنىشكە وراي, ارامىزدان وسىنداي سۇمىرايلار شىعىپ جاتىر. بىراق بۇل كورگەنسىزدىك, مادەنيەتسىزدىك جاۋاپسىز قالمايدى. فرانكفۋرتتاگى وسى ماسقارادان كەيىن كونسۋلدارگا قاتىستى تالاپتى كۇشەيتتىك. قازىر شەتەلدەگى بارلىق كونسۋلدىقتاردى تەكسەرىپ, تارتىپكە كەلتىرىپ جاتىرمىز»,- دەدى سىرتقى ىستەر ءمينيسترى ەرلان ىدىرىسوۆ.
گەرمانياداعى باس كونسۋل احات الپىسباەۆ پەن ونىڭ كومەكشىسى ءادىروۆ ديپلوماتيالىق پوشتامەن گەرمانياعا زاڭسىز جولمەن ءىرى كولەمدە تەمەكى تاسىمالداعان. قالتا قامىن كۇيتتەگەندەر وسى ەلدەگى شىلىم باعاسىنىڭ قىمباتتىعىن وزدەرىنشە پايدالانباق بولسا كەرەك. قازاقستاندىق ديپلوماتتاردى بىرنەشە اي بويى جاسىرىن اڭدىعان نەمىس كەدەنشىلەرى كۇدىكتىلەردى ۇستاۋ ءۇشىن ارنايى وپەراتسيا دا ۇيىمداستىرعان. ەندى ديپلوماتتاردى ەلىمىزگە ەكستراداتسيالاۋ ءۇشىن كەلىسسوزدەر جۇرگىزىلىپ جاتىر. باس كونسۋل مەن ونىڭ كومەكشىسى ءتىپتى گەرمانيادا سوتتالۋى مۇمكىن.
دانيار تۇيمەباي.
