ماقتاارالدا قۇرىلىس جۇمىستارى تاۋلىك بويى جۇرگىزىلۋدە

وڭتۇستىك قازاقستان • 21 شىلدە، 2020

ماقتاارالدا قۇرىلىس جۇمىستارى تاۋلىك بويى جۇرگىزىلۋدە

16 رەت كورسەتىلدى

ماقتاارال اۋدانىندا جاڭادان ىرگەتاسى قالانعان شاعىناۋداندا قۇرىلىس جۇمىستارى توقتاۋسىز جۇرۋدە. قۇرىلىس الاڭىندا 31 مەردىگەر مەكەمە، جالپى 386 تۇرعىن ءۇيدىڭ قۇرىلىسىنا 1427 ادام جۇمىلدىرىلعان، دەپ حابارلايدى Egemen.kz

عالىمجان ەلشىباي

شاعىناۋدان اۋىزسۋ، جارىق پەن گازبەن قامتاماسىز ەتىلىپ، بايلانىس جەلىسىمەن جابدىقتالادى. اباتتاندىرۋ جۇمىستارى اياسىندا ساياباق پەن 2 سپورت الاڭشاسى، 1200 ورىندىق مەكتەپ پەن 280 ورىندىق بالا-باقشا سالىنۋدا. سونداي-اق دارىگەرلىك امبۋلاتوريانىڭ قۇرىلىسى ءجۇرىپ جاتىر.

اۋدانعا جۇمىس ساپارىمەن بارعان وبلىس اكىمى ومىرزاق شوكەەۆ توتەنشە جاعدايدىڭ سالدارىن جويۋ جۇمىستارىن باقىلاپ، سۋ باسقان ورگەباس جانە فيردوۋسي اۋىلدارىنىڭ تۇرعىندارىمەن كەزدەستى. سالىنىپ جاتقان الەۋمەتتىك نىسانداردى ارالادى. ورگەباس اۋىلىندا ورنالاسقان ق.امانجولوۆ اتىنداعى №22 جالپى ورتا مەكتەبىنىڭ قۇرىلىسىن تەكسەردى. وبلىستىق بيۋدجەت ەسەبىنەن بىلتىر قۇرىلىسى باستالعان 200 ورىندىق جاڭا مەكتەپ بيىل پايدالانۋعا بەرىلمەك. سونداي - اق مۇندا فەلدشەرلىك-اكۋشەرلىك پۋنكت قۇرىلىسى باستالعان.

"قىسقا مەرزىمدە اۋقىمدى جۇمىستار اتقارىلدى. حالىقتى تىرشىلىكپەن قامتاماسىز ەتەتىن نىساندار مەن ينفراقۇرىلىمدار قالپىنا كەلتىرىلۋدە. تۇرعىنداردى ەرتەرەك باسپالارىنا جايعاستىرۋ ءۇشىن قۇرىلىس جۇمىستارى كۇشەيتىلدى. جاۋاپتى اۋدان اكىمدەرى، باسشىلارى وسىندا. قۇرىلىستى ۋاقىتىندا اياقتاۋ ءۇشىن كۇن-ءتۇن دەمەي ەڭبەك ەتۋدە"، دەدى ومىرزاق شوكەەۆ تۇرعىندارمەن كەزدەسۋدە.

ورگەباس ەلدى مەكەنىندە 209 ءۇي ورنالاسقان. وندا سۋ باسقان ۇيلەر بۇزىلىپ، اۋماعى تازارتىلىپ، ۇيلەردىڭ ىرگەتاسى قۇيىلعان، 70 ءۇيدىڭ قابىرعاسى قالانىپ، شاتىرلارى جابىلۋدا. قۇرىلىس جۇمىسىنا 613 ادام تارتىلعان. فيردوۋسي اۋىلىن قالپىنا كەلتىرۋ جۇمىستارى دا قارقىندى ءجۇرىپ جاتىر. بۇگىنگى تاڭدا ونداعى 96 ءۇيدىڭ قابىرعاسى قالانىپ، شاتىرلارى جابىلۋدا. جالپى قۇرىلىس جۇمىستارىنا 1002 ادام تارتىلعان. سونىمەن بىرگە، اۋىلداعى اۋىزسۋ جۇيەلەرىن قايتا قۇرۋ جۇمىستارى اياسىندا 33 شاقىرىم قۇبىر جۇرگىزىلىپ، ۇڭعىمالار بۇرعىلانعان. ابونەنتتىك جاشىكتەر ورناتىلىپ، جاڭا سۋ مۇناراسىن ورناتۋ جۇمىستارى باستالعان.