كوروناۆيرۋس جۇقتىرعان جاعدايدا رەنتگەنگە قاشان تۇسكەن دۇرىس؟

قازاقستان • 21 شىلدە، 2020

كوروناۆيرۋس جۇقتىرعان جاعدايدا رەنتگەنگە قاشان تۇسكەن دۇرىس؟

1770 رەت كورسەتىلدى

كوروناۆيرۋس اۋرۋى قالاي اسقىنادى جانە ونىڭ قانداي كەزەڭدەرى بار؟ رەنتگەن جانە كومپيۋتەرلىك توموگرافيانى قاشان جاساعان دۇرىس؟ وسى جانە باسقا دا سۇراقتارعا نۇر-سۇلتان قالالىق فتيزيوپۋلمولوگيا ورتالىعىنىڭ ديرەكتورى اننا تسەپكە تىكەلەي ەفيردە جاۋاپ بەردى. دارىگەردىڭ ايتۋىنشا، جۇقپالى اۋرۋدىڭ ءتورت كەزەڭى بار. بۇل تۋرالى قالا اكىمدىگىنىڭ رەسمي سايتى حابارلادى، - دەپ جازادى Egemen.kz

اقمارال اعزامقىزى

ء"بىرىنشى – ينكۋباتسيالىق كەزەڭ. ياعني اۋرۋ تاسىمالداۋشى اداممەن بايلانىسقان ساتتەن باستاپ، 2-14 كۇن ارالىعىندا ۋاقىت وتكەن سوڭ، العاشقى بەلگىلەر بايقالادى. ەگەر تاسىمالداۋشىمەن بايلانىستا بولساڭىز، ءوز-ءوزىڭىزدى وقشاۋلاۋ كەرەك ەكەنى بەلگىلى. وسى ۋاقىتتا قانداي تەكسەرىستەن ءوتۋ قاجەت؟ شىن مانىندە، ەشتەڭە قاجەت ەمەس. ويتكەنى ودان ەش دياگنوستيكالىق پايدا جوق. تەك ءوزىڭىزدىڭ جاعدايىڭىزدى باقىلاۋدا ۇستاۋ قاجەت"، – دەپ ءتۇسىندىردى ا.تسەپكە.

كۆي-ءدىڭ ەكىنشى كەزەڭى تۇماۋعا ۇقساس. سودان كەيىن دەنە قىزۋى، السىزدىك، بۇلشىقەت، تاماق اۋرۋى، ءيىس پەن ءدام جوعالۋى مۇمكىن. جۇرەك اينۋى مەن قۇسۋ دا بايقالادى.

"رەنتگەن جانە كومپيۋتەرلىك توموگرافيا جاساۋ كەرەك پە؟ بۇل دا قاجەت ەمەس، ويتكەنى كوپتەگەن جاعدايدا كت-دان ەشتەڭە كورىنبەيدى. ناۋقاس بۇل زەرتتەۋدى جاساپ، ءبارى قالىپتى دەپ ويلاۋى مۇمكىن. الايدا اۋرۋ ەندى باستالعان. سوندىقتان مۇنداي زەرتتەۋلەر جۇرگىزۋدىڭ قاجەتى جوق"، – دەيدى دارىگەر.

ودان ءارى COVID-19-دىڭ ءۇشىنشى كەزەڭى باستالادى. ماماندار ونى "قىزعان كەزەڭ" دەپ اتايدى.

"سيمپتومدار ەرەكشە ايقىن بولادى. ەنتىگۋ، جوتەل، 38-دەن جوعارى دەنە قىزۋى بايقالادى. بۇل اۋرۋحاناعا جاتقىزۋ قاجەت كەزەڭ. مۇندا بارلىق زەرتتەۋلەر تۇسىنىكتى بولادى"، – دەيدى تسەپكە.

سوڭعى، ءتورتىنشى كەزەڭ – رەكونۆالەستسەنتسيا. "ياعني اۋرۋدان ايىعىپ، ساۋىعۋ كەزەڭى. بۇل كەزەڭ ۇزاق ۋاقىتقا سوزىلادى. 14 كۇننەن 3-6 ايعا دەيىن اعزا قالپىنا كەلەدى"، – دەپ تۇسىندىرەدى قالالىق فتيزيوپۋلمانولوگيا ورتالىعىنىڭ ديرەكتورى.

سونداي-اق ا.تسەپكە ءاربىر ادامدا اۋرۋ ءارتۇرلى وتەتىنىن جانە كەز كەلگەن كەزەڭدە اياقتالۋى مۇمكىن ەكەنىن اتاپ ءوتتى. نۇر-سۇلتان قالاسى اكىمدىگىنىڭ رەسمي ينستاگرام پاراقشاسىنان Covid-19 ينفەكتسياسىنىڭ فورمالارى تۋرالى باسقا دا سۇراقتارعا ماماننىڭ بەرگەن جاۋابىن كورۋگە بولادى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز