ورتالىق كوممۋنيكاتسيالار قىزمەتىنىڭ الاڭىندا نۇر-سۇلتان قالاسىنداعى №5 ەمحانانىڭ ديرەكتورى التىنشاش تابۋلدينا جانە №9 ەمحانانىڭ ديرەكتورى ساۋلە سماعۇلوۆا پاندەميا جاعدايىنداعى امبۋلاتوريالىق-ەمحانالىق ۇيىمداردىڭ قىزمەتى جونىندە ايتىپ بەردى.
الگوريتمگە سايكەس ەمحانا ماماندارى كۇن سايىن كۆي-ءدىڭ جەڭىل جانە سيمپتومسىز تۇرىمەن اۋىرعان تۇرعىندارعا قوڭىراۋ شالىپ, حابار الىپ تۇرادى. جالپى دارىگەرلەر ناۋقاستاردىڭ جاعدايىن, دەنە قىزۋىن ءبىلىپ, جوتەل, تىنىس الۋدىڭ ناشارلاۋى, السىزدىك, تەرشەڭدىك, ديارەيا, بورتپە سياقتى بەلگىلەردىڭ بار-جوعىن انىقتايدى.
«كلينيكالىق سيمپتومدار پايدا بولىپ, جاعدايى ناشارلاعان ناۋقاستاردى اۋرۋحاناعا جاتقىزۋ قاراستىرىلادى. ونداي تۇرعىنداردى كومپيۋتەرلىك توموگرافيادان وتكىزىپ, قاجەتتى تالداۋلار جۇرگىزىپ, ءارى قاراي اۋرۋحاناعا جاتقىزىلادى. دەنە قىزۋى ءۇش كۇننەن ارتىق ەمەس جانە سيمپتومدار بولماعان جاعدايدا پتر-تەستتى قايتا تاپسىرۋ قاجەتسىز ناۋقاستى باقىلاۋدان الىپ تاستايمىز. سونداي-اق COVID-19 انىقتالعان, بىراق سيمپتومسىز ناۋقاستار ساناتى بار. ءبىز ولاردى 14 كۇن بويى بايقايمىز. ەگەر وسى كەزەڭدە ەشقانداي سيمپتومدار بايقالماسا, ناۋقاس ءوزىن جاقسى سەزىنسە, ءبىز ونى قانداي دا ءبىر زەرتتەۋ جۇرگىزبەستەن, سونىڭ ىشىندە پتر-دياگنوستيكادان وتكىزبەستەن باقىلاۋدان الىپ تاستاي الامىز», دەدى التىنشاش تابۋلدينا.
ونىڭ ايتۋىنشا, امبۋلاتورلىق كەزەڭدە ادامداردىڭ ءوزىن ءوزى ەمدەۋى, ءدارى-دارمەكتەردى ءوز بەتىنشە ساتىپ الۋى, ءتىپتى كەيبىرەۋى تامشىلاتىپ ءدارى ەگۋى كۇردەلى ماسەلە بولىپ تۇر.
ال №9 ەمحانانىڭ ديرەكتورى ساۋلە سماعۇلوۆا بارلىق امبۋلاتوريا-
لىق-كلينيكالىق ۇيىمداردا COVID-19 انىقتاۋ ءۇشىن پتر-دياگنوستيكا ءۇشىن بيوماتەريال الىناتىن پروۆيزورلىق بولىمشەلەر, ناۋقاستاردى شۇعىل قابىلداۋعا ارنالعان قوسىمشا فيلتر-كابينەتتەر اشىلعانىن جەتكىزدى.
ەمحانالاردا جۇمىس ىستەيتىن ءموبيلدى بريگادالار ناۋقاستاردى ۇيىنە بارىپ قارايدى, تەمپەراتۋراسىن, ارتەريالىق قان قىسىمىن, تامىردىڭ سوعۋىن, قانداعى وتتەگى مولشەرىن ولشەيدى. اۋرۋدىڭ بەلگىلەرى بايقالعان جاعدايدا, پتر-دياگنوستيكاعا بيوماتەريال الادى. سونىڭ قورىتىندىسى بويىنشا ەمدەۋ تاعايىندالادى.
سونىمەن قاتار ەمحانالاردا امبۋلاتوريالىق ءدارى-دارمەكپەن قامتاماسىز ەتۋ بريگادالارى جۇمىس ىستەيدى. ولار سوزىلمالى اۋرۋلارى بار ادامدارعا ءدارى-دارمەكتى ۇيگە جەتكىزىپ بەرەدى.
بارلىق بەيىندى ماماندار مەن ۋچاسكەلىك تەراپەۆتتەر قاشىقتان ونلاين-رەجىمدە جۇمىس ىستەيدى. ول ءۇشىن ءموبيلدى قوسىمشا ارقىلى ۋچاسكەلىك دارىگەردىڭ قابىلداۋىنا الدىن الا جازىلۋعا جانە ونلاين-رەجىمدە مەديتسينالىق كەڭەس الۋعا بولادى. قاجەت بولعان جاعدايدا ۋچاسكەلىك دارىگەر بەيىندى مامانعا كەڭەس الۋعا جىبەرەدى.
سۇراق-جاۋاپ بارىسىندا دارىگەرلەر تۇماۋعا قارسى ەكپە ەگۋ تۋرالى ايتتى.
«تۇماۋعا قارسى ەكپە ەگۋ ۇلتتىق ەگۋ كۇنتىزبەسىنە كىرمەيدى. بىراق جەرگىلىكتى بيۋدجەت ەسەبىنەن ديسپانسەرلىك ەسەپتە تۇرعان, سوزىلمالى اۋرۋلارى بار ادامدارعا, قاۋىپتى توپتاعى بالالارعا, جۇكتى ايەلدەرگە, سونداي-اق مەديتسينا قىزمەتكەرلەرىنە جىل سايىن ەكپە ساتىپ الىنادى. مەنىڭ ويىمشا, وسى جىلى بۇل جۇمىس جالعاسىن تابادى جانە ۆاكتسينانى قاجەت بولعان جاعدايدا ەرتەرەك وتكىزەمىز», دەدى №5 ەمحانانىڭ ديرەكتورى.
اتالعان ەمحانادا COVID-19 ىندەتىنىڭ جەڭىل ءتۇرى انىقتالعان 16 جۇكتى ايەل دارىگەرلەردىڭ ۇدايى باقىلاۋىندا بولىپ, ناتيجەسىندە بارلىعى دەنى ساۋ بالانى دۇنيەگە اكەلدى.
