كەشە, 16 قازان كۇنى ماسكەۋدىڭ يزمايلوۆو اۋدانىندا پىشاقتان العان جاراقاتتان قازا تاپقان ازەربايجان ازاماتىنىڭ دەنەسى تابىلدى. بۇل تۋرالى «ازاتتىق» راديوسى حابارلادى.
وسىمەن سوڭعى ەكى كۇننىڭ ىشىندە ازيالىق تيپتەس ەكىنشى ادام قازا تاۋىپ وتىر. بۇدان ءبىر كۇن بۇرىن, 15 قازاندا بيريۋلەۆو اۋدانىندا پىشاقتالعان 51 جاستاعى وزبەكستان ازاماتىنىڭ ءمايىتى تابىلعان بولاتىن.
وتكەن جەكسەنبىدە بيريۋلەۆو اۋدانىندا جۇزدەگەن ادام ميگرانتتارعا قارسى نارازىلىق شەرۋلەرىنە شىققان ەدى. نارازىلىق تانىتۋشىلار پوليتسيامەن قاقتىعىسىپ, ميگرانتتار جۇمىس ىستەيتىن كوكونىس قويماسىن قيراتۋعا ارەكەت جاساعان.تۇرعىنداردىڭ جاپپاي شەرۋگە شىعۋىنا ەگور ششەرباكوۆ ەسىمدى 25 جاسار جەرگىلىكتى جىگىتتىڭ كىسى قولىنان قازا تابۋى سەبەپ بولدى.
پوليتسەيلەر بۇرناعى كۇنى تۇندە ونىڭ ولىمىنە كۇدىكتى رەتىندە ازەربايجان ورحان زەينالوۆتى قاماۋعا الدى.
سونىمەن قاتار, بيريۋلەۆو اۋداندىق سوتى كوكونىس قويماسىنىڭ جۇمىسىن 90 كۇنگە توقتاتتى. قويما باسشىلىعىنىڭ ۇستىلەرىنەن «زاڭسىز ميگراتسيا ۇيىمداستىردى» دەگەن ايىپپەن قىلمىستىق ءىس قوزعالدى. قويما باسشىسى الياسحاب گادجيەۆكە ىزدەۋ جاريالاندى.
مۇرات ايتقوجا.
