ورتالىق كوممۋنيكاتسيالار قىزمەتى الاڭىندا دەنساۋلىق ساقتاۋ مينيسترلىگى تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ كوميتەتىنىڭ توراعاسى تيمۋر سۇلتانعازيەۆ كارانتين رەجىمىن ساقتاماعان جاعدايلار كەزدەسىپ جاتقانىن ناقتى دالەلدەرمەن اتاپ ءوتتى.
ونىڭ ايتۋىنشا, 6-14 شىلدە ارالىعىندا مونيتورينگ توپتارى 16 572 نىساندى تەكسەرىپ, ونىڭ 1 617-سىندە سانيتارلىق نورمالاردىڭ بۇزىلعانى انىقتالدى. كەلەڭسىز جاعداي رەتكە كەلگەنشە 564 نىسان ءوز ەركىمەن قىزمەتىن توقتاتتى. اكىمشىلىك بۇزۋشىلىق تۋرالى 225 حاتتاما جاسالىپ, ايىپپۇل سالىندى.
ساۋدا جانە قوعامدىق تاماقتانۋ ورىندارىندا انىقتالعان نەگىزگى بۇزۋشىلىقتار – حالىقتىڭ ماسكا تاقپاۋى, الەۋمەتتىك اراقاشىقتىق بەلگىلەردىڭ بولماۋى, دەنە قىزۋىنىڭ ولشەنبەۋى, اۋانى تازارتپاۋ, اۋماقتى زارارسىزداندىرماۋ. سونداي جاعداي قوستاناي وبلىسىندا تىركەلگەن, سونداعى ءبىر نىساندا قىزمەتكەرلەر ماسكا, قولعاپ, انتيسەپتيك قولدانباعان.
اقمولا وبلىسىندا جۇمىس ىستەۋىنە تىيىم سالىنعان, اۋماعى 500 شارشى مەتردەن اساتىن دۇكەن جابىلماعان. وعان 638 940 تەڭگە ايىپپۇل سالىندى. سەمەيدە «الەم» ساۋدا ءۇيى مەن «ۆوسحود» بازارىنا دا كارانتين رەجىمىندە جۇمىس ىستەگەنى ءۇشىن ءتيىستى ايىپپۇلدار سالىندى.
كارانتينگە قاراماستان توي-جيىندار دا جاسالىپ جاتىر. الماتىدا 30 ادامعا ارنالعان بانكەت پەن 100 قوناققا ۇيلەنۋ تويىن جاساعانى ءۇشىن ەكى مەكەمەنىڭ يەلەرى اكىمشىلىك جاۋاپكەرشىلىككە تارتىلدى.
جالپى مۇنداي ساقتىق شارالارىنىڭ بۇزىلۋى ەلىمىزدىڭ بارلىق وڭىرىندە انىقتالعان.
«سونداي-اق مونيتورينگ توپتارىنا ءدارى-دارمەكتىڭ شەكتى باعاسى مەن ونىڭ زاڭسىز ساتىلۋىن قاداعالاۋ مىندەتى جۇكتەلگەن ەدى. ايماقتاردان كەلىپ تۇسكەن مالىمەتكە سايكەس, 1 400-دەن اسا ءدارىحانا ۇيىمىنا مونيتورينگ جاسالعان. جالپى مۇنداي ۇيىمداردىڭ سانى – 8 مىڭ. ايماقتاردا قاجەتتى ءدارى-دارمەكتى قىمبات باعامەن ساتۋ جاعدايى ءالى دە تىركەلىپ جاتىر. بۇعان قوسا جالپى قۇنى 110 ملن تەڭگەلىك تىركەلمەگەن ءدارى-دارمەكتىڭ 200 ءتۇرىنىڭ ساتىلىپ جاتقانى انىقتالدى. وسى جاعدايلار بويىنشا تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ كوميتەتىنە قاراستى وڭىرلىك دەپارتامەنتتەردە 65 اكىمشىلىك ماتەريال بار. قازىرگى تاڭدا جالپى سوماسى 972 مىڭ تەڭگە بولاتىن 12 اكىمشىلىك ايىپپۇل سالىندى. قازاقستاندا ءدارى-دارمەكتىڭ 6 478 ءتۇرى شەكتى باعامەن ساتىلادى. ءدارى-دارمەكتىڭ قىمباتقا ساتىلىپ جاتقانىن كورگەن ازاماتتار ءبىزدىڭ كوميتەتتىڭ اۋماقتىق دەپارتامەنتتەرىنە حابار بەرە الادى. بايلانىس قۇرالدارى كوميتەتتىڭ سايتىندا بار. مۇنداي جاعداي بويىنشا ەلەكتروندى ۇكىمەت پورتالى نەمەسە Dari.كz موبيلدىك قوسىمشاسى ارقىلى جۇگىنۋگە بولادى», دەدى تيمۋر سۇلتانعازيەۆ.
قازىرگى ۋاقىتتا اۋىر جاعدايدا جانساقتاۋ مەن انەستەزيولوگيا بولىمىندە ەمدەلىپ جاتقانداردىڭ سانى – 306 ادام. اۋىر جاعدايدا 265 سىرقات, وتە اۋىر جاعدايداعى 41 ناۋقاس بار. وكپەنى جاساندى جەلدەتۋ اپپاراتىنا قوسىلعان 67 ناۋقاس ەم قابىلداۋدا. ءينۆازيۆتى ەمەس وكپەنى جاساندى جەلدەتۋ اپپاراتىندا 133 سىرقات جاتىر. وزىنشە دەمالاتىن وكسيگەنوتەراپيا الىپ جاتقان سىرقاتتاردىڭ سانى – 106. ءوز بەتىنشە دەمالاتىن ناۋقاستاردىڭ سانى – 9265 ناۋقاس.
«وسى جىلدىڭ ناۋرىز ايىنان بەرى قىتايدان جالپى سوماسى 3 ملرد تەڭگەگە 696 مىڭ تەست-جۇيەسى ساتىپ الىندى. بۇگىنگە دەيىن قازاقستان اۋماعىندا 1 ملن 700 مىڭ زەرتتەۋ (پتر-تەست) جۇرگىزىلدى. ونىڭ 971 مىڭ زەرتتەۋى ۇلتتىق ساراپتاما ورتالىعىندا جاسالدى. قالعان تەستتەر جەكە مەديتسينالىق ۇيىمدار مەن مەديتسينالىق ۇيىمداردىڭ زەرتحانالارىندا الىندى. ۇلتتىق ساراپتاما ورتالىعىنىڭ بارلىق فيليالىندا وتاندىق تاۋار وندىرۋشىلەردىڭ تەست-جۇيەسىن قولدانۋ كوزدەلۋدە. ۇكىمەتتىڭ رەزەرۆى اياسىندا 1,2 ملن زەرتتەۋ جۇرگىزۋ ءۇشىن تەست-جۇيەلەرىن ساتىپ الۋ جوسپارلانعان. وتاندىق بولسىن, شەتەلدىك بولسىن تەست-جۇيەلەرىنە قويىلاتىن تەحنيكالىق تالاپتار بار. وسى تالاپتارعا بارىنشا سايكەس كەلەتىن تەست-جۇيەلەرى عانا ساتىپ الىنادى», دەدى تيمۋر سۇلتانعازيەۆ.
