بۇگىن بريفينگتە قالالىق ءبىلىم باسقارماسىنىڭ باسشىسى شولپان قادىروۆا مەكتەپتەر مەن كوللەدجدەردىڭ جاڭا وقۋ جىلىنا دايىندىعى تۋرالى ايتتى. ونىڭ ايتۋىنشا, 2020-2021 وقۋ جىلىندا ەلوردا بويىنشا 202 مىڭ مەكتەپ وقۋشىسى بولادى دەپ كۇتىلۋدە. (وتكەن وقۋ جىلىندا – 182 279). ءبىرىنشى سىنىپقا 27 مىڭنان استام وقۋشى قابىلداۋ جوسپارلانۋدا.
قازىرگە, 12 453 ءوتىنىش بەرىلىپ, 10090 قابىلداندى.(37%). قۇجاتتاردى قابىلداۋ ەلەكتروندى ۇكىمەت Egov.kz پورتالى ارقىلى جانە قاعاز تۇرىندە مەكتەپتەردە جۇرگىزىلۋدە. كوللەدجدەردە الداعى وقۋ جىلىندا 8 مىڭ ستۋدەنت, سونداي-اق 13 ماماندىق بويىنشا ەرەكشە ءبىلىم الۋ قاجەتتىلىگى بار 139 ءبىلىم الۋشى قابىلدانادى دەپ كۇتىلۋدە (وتكەن جىلى – 12 ماماندىق بويىنشا 105 بالا).
"1 قىركۇيەكتە جاڭا وقۋ جىلى بارلىق ەلوردا مەكتەپتەرىندە 1-11 سىنىپتار جانە كوللەدجدەردە قاشىقتان وقىتۋ فورماتىندا باستالادى. بۇل رەتتە قاتاڭ سانيتارلىق شارالاردى ساقتاي وتىرىپ, باستاۋىش سىنىپتىڭ وقۋشىلارى ءۇشىن "كەزەكشى سىنىپتاردىڭ" جۇمىسى جوسپارلانۋدا. ونىڭ قالاي جۇمىس ىستەيتىنىن تۇسىندىرە كەتسەك. باستاۋىش سىنىپ وقۋشىلارىنىڭ اتا-انالارىنىڭ ءوتىنىشى نەگىزىندە سانيتارلىق تالاپتاردى ساقتاي وتىرىپ "كەزەكشى سىنىپتار" اشىلاتىن بولادى. وقۋ بىرنەشە اۋىسىممەن جۇزەگە اسادى. سىنىپتار كىشى توپتارعا بولىنەدى. ول توپتاردا وقۋشى سانى 10-15 تەن اسپايتىن بولادى. ساباقتار ءبىر كابينەتتە وتكىزىلىپ, ءۇزىلىس ءار ءتۇرلى ۋاقىتتاردا بولادى. سونىمەن قاتار ساباقتاردىڭ ءبىر بولىگى قاشىقتان جۇرگىزىلەدى", دەدى ش.قادىروۆا.
باسقارما باسشىسى بارلىق سانيتارلىق شارالاردىڭ ساقتالۋى باستى مىندەتتەردىڭ ءبىرى ەكەنىن اتاپ ءوتتى. "ول ءۇشىن مەكتەپتەر دەزينفەكتسيالاۋ قۇرالدارىمەن, تەپلوۆيزورلارمەن, قورعانىس قۇرالدارىمەن قامتاماسىز ەتىلەدى. ءداستۇرلى فورماتتاعى وقۋ جاعدايىندا, ياعني كەزەكشى سىنىپتاردىڭ جۇمىسى ءۇشىن الگوريتم كەلەسىدەي بولادى: اتا-انالار بالالاردى «كەزەكشى سىنىپتارعا" اكەلەدى, بىراق عيماراتقا كىرمەيدى; مەكتەپتىڭ كىرەبەرىسى دەزينفەكتسيالىق كىلەمشەلەرمەن قامتاماسىز ەتىلەدى; مەكتەپكە كىرەر كەزدە بالانىڭ تەمپەراتۋراسىن ولشەنەدى; قولدى انتيسەكتيكپەن وڭدەۋ جانە ماسكانىڭ بولۋى مىندەتتەلەدى; بارلىق قاباتتاردا جانە ءاربىر «كەزەكشى سىنىپتا» انتيسانيتايزەرلەردى ورناتىلادى; سىنىپتى جەلدەتۋ, كۆارتستاۋ جانە ىلعالدى جيناۋ كەستەسى; قىزىل سىزىقپەن بەلگىلەي وتىرىپ, مەديتسينالىق كابينەتتەردىڭ جانىندا يزولياتور-بولمە اشۋ", دەدى باسقارما باسشىسى.
ول سونداي-اق قاشىقتان وقىتۋدىڭ قالاي وتەتىنىن ايتتى. "قاشىقتان وقىتۋ ءۇشىن ەڭ الدىمەن پەداگوگتەر مەن وقۋشىلاردىڭ كومپيۋتەر جانە ينتەرنەتپەن قامتاماسىز ەتىلۋى ماڭىزدى. پەداگوگتەر مەن وقۋشىلاردىڭ كومپيۋتەر مەن ينتەرنەتكە قاجەتتىلىگىنە مونيتورينگ جۇرگىزىلدى. قاجەتتى قۇرالدار ساتىپ الىناتىن بولادى. بۇل رەتتە تەحنيكانى قاجەت ەتەتىن از قامتىلعان جانە كوپ بالالى وتباسىلاردان شىققان وقۋشىلار مىندەتتى تۇردە كومپيۋتەرلەرمەن جانە روۋتەرلەرمەن قامتاماسىز ەتىلەدى", – دەدى ش.قادىروۆا.
جاڭا وقۋ جىلىندا وقۋشىلاردى وقۋلىقتارمەن قامتاماسىز ەتۋ جۇمىستارى دا جۇرگىزىلۋدە. "قامتاماسىز ەتۋ 100%-دى قۇرايدى. وقۋشىلار وقۋلىقتاردى 1 قىركۇيەككە دەيىن الادى", دەپ ءسوزىن تۇيىندەدى ش.قادىروۆا.
