ء"بىزدىڭ كوپبەيىندى مەديتسينالىق ورتالىق يزولياتورىندا قايتىس بولعان ناۋقاستار ماسەلەسىن ايتاتىن بولساق, 4 اي ىشىندە ستاتسيوناردا 46 ناۋقاس كوز جۇمدى. قايتىس بولعاندار سانى – 1,6%. ماۋسىم, شىلدە ايىندا كورسەتكىش كۇرت وسكەنى بايقالادى. ونىڭ بىرنەشە سەبەبى بار. بىرىنشىدەن, ناۋقاستار 50%-دان 100%-عا دەيىنگى كولەمدە وكپە تىندەرىنىڭ قابىنۋىمەن كەلەدى. دەمەك, مەديتسينالىق كومەك سۇرايتىنداردىڭ دەنى كەشىگىپ كەلەدى. دەگەنمەن, سوڭعى اپتادا ناۋقاستاردىڭ, ونىڭ ىشىندە اۋىر حالدە تۇسەتىندەردىڭ سانى ازايعانى بايقالادى", – دەدى ت. تسەچوەۆا.
دارىگەردىڭ ايتۋىنشا, ناۋقاستار اۋرۋ باستالعاننان 7-10 كۇن وتكەننەن كەيىن عانا اۋرۋحاناعا جۇگىنەدى. قاۋىپتى سەبەپتىڭ ءبىرى – ناۋقاستىڭ جاسى. كوبىنە 70-تەن اسقان ازاماتتار. ال 1950-1960 جىلى تۋعان ناۋقاستار اراسىندا كوز جۇمعاندار سانى ءبىرشاما از.
"تاعى ءبىر سەبەپ, ناۋقاستاردىڭ جاسىنان كەيىن قوسالقى اۋرۋلارىنىڭ بولۋى. سەمىزدىكتەن زارداپ شەگەتىن, قانت ديابەتى بار, جۇرەك-قان تامىرلارى جۇيەسى اۋرۋى بار ناۋقاستاردا (جۇرەكتىڭ يشەميكالىق اۋرۋى, ينفاركت بولۋى) كوز جۇمۋ ىقتيمالدىعى جوعارى. ال جاستار اراسىندا بۇل وتە سيرەك كەزدەسەتىن جاعداي", – دەپ اتاپ ءوتتى دارىگەر.
جۇقپالى اۋرۋلار ستاتسيونارى باسشىسىنىڭ ايتۋىنشا, ناۋرىز, ءساۋىر ايلارىندا بولعان جاعدايلار مەن بۇگىنگى كەزدەگى ناۋقاستاردىڭ جاعدايى بولەك. اۋرۋدىڭ كلينيكالىق كارتيناسى وزگەرگەن. ماسەلەن, بۇرىن وكپە تىندەرىنىڭ قابىنۋى عانا كەزدەسسە, قازىر پولياعزالىق جەتىسپەۋشىلىك كوپ كەزدەسەدى.
"ترومبوەمبوليالىق اسقىنۋلاردىڭ ۇلكەن پايىزى بايقالادى. ءماسسيۆتى ترومبتىڭ پايدا بولۋ مەحانيزمى ىسكە قوسىلادى. قازىرگى اۋا رايىنىڭ قولايسىزدىعىنان, ىستىق بولعاندىقتان, جۇرەگىندە اقاۋى بار ناۋقاستاردا ترومب پايدا بولۋى ابدەن مۇمكىن", – دەدى ت. تسەچوەۆا.
ەلوردالىق دەنساۋلىق ساقتاۋ باسقارماسى امبۋلاتوريالىق كەزەڭدە مەديتسينالىق كومەك كورسەتۋدى ۇيىمداستىرۋدىڭ ارقاسىندا ستاتسيونارلارعا پنەۆمونيامەن تۇسەتىندەردىڭ سانى ازايعانىن ايتادى.
"ەمحانالار كۇندەلىكتى سيمپتومسىز جانە كۆي جەڭىل ءتۇرى بار ناۋقاستارعا, پنەۆمونيامەن اۋىراتىن ناۋقاستارعا مونيتورينگ جۇرگىزەدى. بەينە بايلانىس فورماتىندا ونلاين-كەڭەستەر وتكىزىلەدى. ءۇي جاعدايىنداعى ستاتسيونارلار ۇيىمداستىرىلىپ, ناۋقاستار تەگىن ءدارى-دارمەكتەرمەن قامتاماسىز ەتىلەدى. امبۋلاتوريالىق كەزەڭدە مەديتسينالىق كومەكتى ۇيىمداستىرۋدىڭ ارقاسىندا پنەۆمونيامەن ءتۇسىپ جاتقان ناۋقاستاردىڭ سانى 20%-عا ازايدى (1333-تەن 1066-عا دەيىن)", – دەدى نۇر-سۇلتان قالالىق دەنساۋلىق ساقتاۋ باسقارماسى باستىعىنىڭ مىندەتىن اتقارۋشى ءاليا رۇستەموۆا.
قالادا كوروناۆيرۋستىڭ 7887 جاعدايى تىركەلدى, ولاردىڭ جارتىسىنان كوبى – 5155 ناۋقاس ەمدەلىپ شىقتى. كوز جۇمعاندار سانى – 81.
