*قاز-قالپىندا
بيىلعى قۇربان ايتتى تاۋەلسىز ەلىمىز, مەشىتتەرىمىز ۇلكەن يگى ءىس-شارالارمەن, ەڭ باستىسى, ۇلتتىق ناقىشپەن وتكىزدى. ۇلتتىق سپورت تۇرلەرىنەن (ارقان تارتىس, بالۋاندار كۇرەسى, گىر تاسىن كوتەرۋ, كوكپار, ت.ب.) جارىس ۇيىمداستىرىلدى. باس ءمۇفتي ەرجان قاجى مالعاجى ۇلى مۇرىندىق بولعان قايىرىمدىلىق اكتسيالارى باسقا دا ۇلتتاردى تاڭعالدىرسا كەرەك. وزگە ەمەس, ەلدىڭ ءوز اۋزىنان ەستىپ-بىلگەندەرىمىزدىڭ ءبىر پاراسىنا توقتالايىق.
*قاز-قالپىندا
بيىلعى قۇربان ايتتى تاۋەلسىز ەلىمىز, مەشىتتەرىمىز ۇلكەن يگى ءىس-شارالارمەن, ەڭ باستىسى, ۇلتتىق ناقىشپەن وتكىزدى. ۇلتتىق سپورت تۇرلەرىنەن (ارقان تارتىس, بالۋاندار كۇرەسى, گىر تاسىن كوتەرۋ, كوكپار, ت.ب.) جارىس ۇيىمداستىرىلدى. باس ءمۇفتي ەرجان قاجى مالعاجى ۇلى مۇرىندىق بولعان قايىرىمدىلىق اكتسيالارى باسقا دا ۇلتتاردى تاڭعالدىرسا كەرەك. وزگە ەمەس, ەلدىڭ ءوز اۋزىنان ەستىپ-بىلگەندەرىمىزدىڭ ءبىر پاراسىنا توقتالايىق.
«مەكتەپكە ەمەس, مەشىتكە بارا بەرەيىنشى...»
الماتى قالاسىنداعى «وربيتا» مەشىتى 100-گە جۋىق 3 جاستان جوعارى بۇلدىرشىندەرگە سىيلىق ۇلەستىردى. مەرەكەلىك شارادا بالالار جاتتاعان ولەڭدەرىن ايتىپ, ۇستازدىڭ سۇراقتارىنا تاڭدايلارى تاقىلداپ جاۋاپ بەرگەن. بالا ءتىلى – بال ەمەس پە؟ ءتۇرلى-ءتۇرلى سىيلىقتىڭ استىندا «كومىلگەن» ءبىر كىشكەنتاي قىز: «اناشىم, مەن ەندىگى جىلى مەكتەپكە ەمەس, مەشىتكە بارا بەرەيىنشى. مۇندا كۇشتى-ءى-ءى-ءى-ءى ەكەن. تاقپاق ايتقان سوڭ سىيلىق بەرەدى, تاعى ايتساڭ, تاعى سىيلىق بەرەدى, بەرە بەرەدى», – دەسە كەرەك. اناسى نە دەرىن بىلمەي, توسىلىپ قالعان كورىنەدى.
«قۇدالىق كولىكتە كەتىپ بارا جاتقاندايمىز...»
الماتىنىڭ تۇبىندە العاباس دەيتىن ۇلكەن اۋىل بار. قازاقتار كوپ قونىس تەپكەن. قۇربان ايتتىڭ ءبىرىنشى كۇنى. اۆتوبۋستاردىڭ ىشىنە شار ىلىنگەن, مەرەكەلىك اشەكەيلەر, ۇلتتىق زاتتارمەن ناقىشتالعان. قۇربان ايتتىڭ قۇرمەتىنە جولاقىسى – 0 تەڭگە. بۇل باستاما جايلى جولاۋشىلاردىڭ پىكىرىن بىلگەن جىگىتكە: «مىنا قادامدارىڭ قاتتى اسەر ەتەدى ەكەن. قۇددى قۇدالىققا بارا جاتقاندايمىز. جان-جاعىڭدا نەشە ءتۇرلى شارلار. شىنىمەن دە بۇگىن تويعا بارا جاتقانداي سەزىمدە وتىرمىز. بۇل وقيعا قۇربان ايتتىڭ مۇسىلمانداردىڭ ناعىز مەرەكەسى ەكەنىن سەزىندىرەدى», – دەپ جاۋاپ بەرىپتى.
«كۇندە قۇربان ايت بولسا عوي, شىركىن!»
الماتى قالاسىنىڭ ورتالىق مەشىتى اللا ءۇيىنىڭ اۋلاسىنا جەتىم بالالارعا ارناپ ويىن ورتالىعىن اشتى. ساحنالىق كورىنىستەر قويىلدى. 200-گە جۋىق بۇلدىرشىنگە سىيلىق تاراتىلدى, بالمۇزداق بەرىلدى, ارنايى داستارقان جايىلدى. قۋانىشى قوينىنا سىيماعان, كوزدەرى جاۋدىرەگەن ءبىر جەتىم بالا: «كۇندە قۇربان ايت بولسا عوي, شىركىن», – دەپ, سەزىمىن ءبىلدىرىپ قويىپتى. «جەردە جەتىم جىلاسا, كوكتە پەرىشتە كۇڭىرەنەدى», – دەگەن ءسوز بار. جەتىمگە قۋانىش سىيلاۋدان ارتىق ساۋاپ بار ما؟ جەتىمدەرىمىز جىلاماسىن. جىلاتپايىق. قۇربان ايتقا امان-ەسەندىكتە جەتە بەرەيىك.
اعابەك قونارباي ۇلى,
قمدب ءباسپاسوز حاتشىسى.
