ونىڭ ايتۋىنشا, جالپى نەگىزگى قاعيدات بويىنشا بۇل تولەم جۇمىس ىستەپ جۇرگەن جانە كارانتيننىڭ كۇشەيتىلگەن شارالارىنا قاتىستى تابىسىنان ايرىلعان ازاماتتارعا تولەنەدى. الدىمەن, بۇل جاردەماقى اقىسىز دەمالىسقا جىبەرىلگەن جالدامالى جۇمىسكەرلەرگە بەرىلەدى. مۇندا ءوتىنىمدى تەك جۇمىس بەرۋشى جىبەرەدى. قويىلاتىن ءبىر عانا شارت – جۇمىسشىلاردىڭ جۇمىسى كارانتيندە توقتاپ قالسا عانا بەرىلەدى. ونى جەرگىلىكتى اۋدان, قالا بويىنشا شتاتتار, «اتامەكەن» ۇكپ وڭىرلىك وكىلدەرى تەكسەرەدى. سەبەبى قازىرگى شەكتەۋ شارالارى جەڭىلدەۋ بولعانىمەن, ءار وڭىردە باس سانيتارلىق دارىگەرلەر ءوز شەكتەۋلەرىن قويىپ جاتىر.
ەكىنشىدەن, كارانتيندە جۇمىسى تۇرالاعان جەكە كاسىپكەرلەرگە جانە جەكە پراكتيكامەن اينالىساتىن ازاماتتارعا 42 500 تەڭگە تولەنەدى. ولار ءوتىنىمدى وزدەرى بەرەدى. بۇل جولى ولارعا زەينەتاقى جارنالارىنىڭ, الەۋمەتتىك جارنالاردىڭ تولەنۋى نەمەسە تولەنبەۋى تۋرالى تالاپ قويىلمايدى.
ۇشىنشىدەن, ازاماتتىق-قۇقىقتىق سيپاتتاعى كەلىسىمدەر بويىنشا جۇمىس ىستەپ جۇرگەن فريلانسەرلەر دە جاردەماقى الا الادى. ول ءۇشىن ءوتىنىمدى تىكەلەي وزدەرى بەرەدى. مۇندا وسى جىلدىڭ 6 ايىنىڭ ىشىندە ءبىر رەت بولسا دا زەينەتاقىلىق جارنالارىن اۋدارۋ تۋرالى عانا تالاپ قويىلادى.
سونداي-اق ءوز بەتىنشە جۇمىس ىستەپ جۇرگەن ازاماتتار جۇمىسى توقتاپ كالسا, تولەم الا الادى. ولارعا الدىڭعىداي بىرىڭعاي جيىنتىق تولەم (بجت) تولەۋدىڭ قاجەتى جوق.
ال مەملەكەتتىك بيۋدجەت ەسەبىنەن زەينەتاقى, مەملەكەتتىك جاردەماقىلار, اتاۋلى الەۋمەتتىك كومەك نەمەسە ساقتاندىرۋ قورىنان ءتيىستى كولەمدە كومەك الىپ جۇرگەن ازاماتتار كارانتين كەزىندە بەرىلەتىن بىرجولعى تولەمدى الا المايدى.
بۇعان قوسا مينيستر جاقىن ارادا جۇمىستان شىعىپ كەتكەندەر جۇمىسپەن قامتۋ ورتالىعىنا حابارلاسۋ كەرەك ەكەنىن ايتتى. بۇل ورتالىق تۇرعىندارعا بوس ۆاكانسيالاردى نەمەسە باسقا دا جۇمىسپەن قامتۋ شارالارىن ۇسىنادى. ەگەر دە ەش جۇمىس لايىق كەلمەسە, ءۇش كۇندە جۇمىسسىز رەتىندە تىركەلەدى جانە اۆتوماتتى تۇردە مەملەكەتتىك ساقتاندىرۋ قورىنان جۇمىسسىزدىققا قاتىستى باسقا تولەم 6 اي بويى تولەنەدى.
«ستۋدەنتتەر مەن دەكرەتتەگى ايەلدەرگە تاعى دا ءتۇسىندىرىپ كەتسەم. بۇل بىرجولعى تولەمدە «ستۋدەنت», «دەكرەتتەگى ايەل» دەگەن ساناتتار جوق. ياعني ستۋدەنتكە ستۋدەنت بولعانى ءۇشىن جاردەماقى تولەنبەيدى. وتكەندە دە سولاي بولعان. بىراق ستۋدەنت جالدانىپ جۇمىس ىستەسە, كارانتين كەسىرىنەن اقىسىز دەمالىسقا جىبەرىلسە, ول ءۇشىن جۇمىس بەرۋشىسى ءوتىنىش بەرە الادى. ال ەگەر ستۋدەنت جەكە كاسىپكەر بولىپ, اي سايىن بجت تولەپ جۇرگەن كاسىپكەر بولسا, ول جاعدايدا دا 42 500 تەڭگە الادى. ال ەندى وسى كۇنگە دەيىن بەيرەسمي جۇمىس ىستەدىم دەپ ءبىر رەت بجت تولەگەن ستۋدەنتتەر 42 500 تەڭگە الا المايدى. دەكرەتتەگى ايەلدەرگە قاتىستى ەرەجە وزگەرىسسىز قالاتىن بولدى. ول دەگەنىمىز – بالا 1 جاسقا تولمايىنشا مەملەكەتتەن جاردەماقى نەمەسە ساقتاندىرۋ قورىنان جاردەماقى الىپ جۇرەدى. سوندىقتان 1 جاسقا تولعانشا تولەمگە ۇمىتتەنە المايدى. ال 1 جاستان اسسا, ەگەر جۇمىسقا شىعىپ, تج بويىنشا اقىسىز دەمالىسقا شىقسا, ارينە الا الادى. جەكە كاسىبى بولىپ نەمەسە بجت تولەپ ءجۇرىپ, جۇمىسى توقتاسا, الا الادى», دەدى ب.نۇرىمبەتوۆ.
سونىمەن قاتار مينيستر 42 500 تەڭگەلىك كومەككە ءوتىنىمدى قانداي پورتال ارقىلى ۇسىنۋ كەرەك ەكەنىن اتاپ ءوتتى.
جالاقىسى ساقتالمايتىن دەمالىستا جۇرگەن جانە تولەمگە قۇقىعى بار قىزمەتكەرلەردىڭ ءتىزىمىن جۇمىس بەرۋشىلەر
egov.kz جانە 42500.enbek.kz پورتالدارى ارقىلى ۇسىنادى. ولاردىڭ قىزمەتىنىڭ شەكتەلۋ فاكتىسىن قۇرامىنا ۇكپ مەن كاسىپوداقتاردىڭ وكىلدەرى كىرەتىن اۋداندىق جانە قالالىق شتابتار راستايدى. باسقا ساناتتار تولەمدەردى تاعايىنداۋ ءۇشىن ءوز بەتىنشە ءوتىنىش بەرەدى. ول ءۇشىن ءبىز بىرنەشە جولدى قاراستىردىق. جالدامالى قىزمەتكەر بولىپ سانالمايتىن, تولەم تاعايىنداۋعا جاتاتىن ازاماتتار: egov.kz – «ەلەكتروندى ۇكىمەتتىڭ» ۆەب-پورتالى; 42 500.enbek.kz پورتالى; «ەلەكتروندى ۇكىمەت» telegram-bot-ى; Aitu مەسسەندجەرىندە
42 500.enbek.kz قوسىمشاسى; ەكىنشى دەڭگەيدەگى بانكتەردىڭ ءموبيلدى قوسىمشالارى مەن ينتەرنەت-رەسۋرستارى ارقىلى ءوتىنىم بەرە الادى.
سونداي-اق تولەمدەردى پرواكتيۆتى فورماتتا تاعايىنداۋ قاراستىرىلادى. قىزمەتى شەكتەلگەن, سوڭعى رەت تولەم العان ازاماتتاردان SMS ارقىلى تابىسى توقتاعانىن راستاۋ سۇرالادى. وڭ جاۋاپ پەن پرواكتيۆتى تۇردە تاعايىنداۋعا كەلىسىم بولعان جاعدايدا, تولەمدەر ءوتىنىمسىز تاعايىندالادى.
